سابق قومی کپتان محمد یوسف نے اسٹار بلے باز بابر اعظم کی مسلسل خراب کارکردگی پر تشویش کا اظہار کرتے ہوئے انہیں خصوصی کوچنگ حاصل کرنے کا مشورہ دے دیا۔
سماجی رابطے کی ویب سائٹ ایکس پر اپنے بیان میں محمد یوسف نے لکھا کہ بابر اعظم کو اس وقت تک فرسٹ کلاس کرکٹ نہیں کھیلنی چاہیے جب تک وہ خصوصی کوچنگ کے ذریعے اپنی تکنیکی خامیاں دور نہیں کرلیتے۔
انہوں نے کہا کہ ڈومیسٹک کرکٹ میں مسلسل مشکلات کا سامنا بابر اعظم کے اعتماد اور کیریئر کو مزید نقصان پہنچا سکتا ہے، اس لیے انہیں انگلینڈ یا آسٹریلیا کی کسی کرکٹ اکیڈمی میں بھیجا جانا چاہیے تاکہ ماہر کوچز کی رہنمائی میں اپنی خامیوں پر قابو پاسکیں۔
سب سے زیادہ پڑھی جانے والی
’بابر اعظم اب بھی ملک کے بہترین کھلاڑیوں میں شامل ہیں‘
سابق کپتان نے اپنے پیغام میں لکھا کہ بابر اعظم اب بھی پاکستان کے بہترین کھلاڑیوں میں شامل ہیں اور مناسب رہنمائی کے ساتھ وہ دوبارہ اپنی بہترین فارم حاصل کرسکتے ہیں۔
انہوں نے حالیہ ون ڈے سہ ملکی سیریز میں بابر اعظم کی کارکردگی کا حوالہ دیتے ہوئے کہا کہ انہیں اپنی بیٹنگ میں بہتری کے لیے خصوصی توجہ اور محنت کی ضرورت ہے۔
I don’t think #BabarAzam should be playing first class cricket until he fixes his technical issues through specialized coaching. Struggling in domestic cricket could further harm his confidence and career. Send him to an academy in #England or #Australia. He is still Pakistan’s top player, and with the right guidance and a little effort, he can return to his best. I said this four years ago, and nobody listened. Please listen now 🙏
— Mohammad Yousaf (@yousaf1788) November 1, 2026
واضح رہے کہ پاکستان، انگلینڈ اور سری لنکا کے درمیان کھیلی گئی سہ ملکی سیریز میں بابر اعظم پانچ میچز میں 23.60 کی اوسط سے صرف 118 رنز بنا سکے اور کوئی نصف سنچری اسکور نہیں کرسکے۔ فائنل میں سری لنکا کے خلاف وہ صفر پر آؤٹ ہوگئے تھے۔
’مشورے پر سنجیدگی سے غور کیا جائے‘
محمد یوسف نے مزید کہا کہ وہ چار سال قبل بھی بابر اعظم کے لیے یہی تجویز دے چکے ہیں، تاہم اس وقت کسی نے ان کی بات پر توجہ نہیں دی، اب انہیں امید ہے کہ ان کے مشورے پر سنجیدگی سے غور کیا جائے گا۔
ٹیم کے کپتان شاہین شاہ آفریدی نے سہ فریقی سیریز کے فائنل میں کامیابی کے بعد پریس کانفرس میں کہنا تھا کہ بابر اعظم ایک اچھے کھلاڑی ہیں اور وہ دومیسٹک کرکٹ میں واپس جا رہے ہیں اور جلد ہی وہ کم بیک کریں گے۔
