وزیر اعظم شہباز شریف نے پاکستان تحریک انصاف (پی ٹی آئی) کو خیبر پختونوا میں دہشت گردی اور محرومیوں کا ذمہ دار کا ٹھہراتے ہوئے ’فیلڈ مارشل صاحب کے ساتھ مل کر‘ صوبے سے پائیدار امن قائم کرنے اور ‘ خوشیوں اور ترقی کا دور واپس لانے’ کا ’وعدہ‘ کیا ہے۔
وہ خیبرپختونخوا میں امن و امان، سکیورٹی صورتحال اور استحکام سے متعلق امور کا جائزہ لینے کے لیے گورنر ہاؤس پشاور میں ہونے والے صوبائی ایپکس کمیٹی کے اجلاس سے خطاب کر رہے تھے۔
یہ اجلاس ایسے وقت میں ہوا جب وفاقی حکومت صوبے میں ایمرجنسی اور گورنر راج کے نفاذ کے بعد نئے سیاسی، سکیورٹی اور انتظامی ڈھانچے کو مضبوط کرنے کی کوششیں کر رہی ہے۔
سب سے زیادہ پڑھی جانے والی
اجلاس میں آرمی چیف فیلڈ مارشل عاصم منیر، نائب وزیراعظم اسحاق ڈار، وزیر داخلہ محسن نقوی، وزیر اطلاعات عطا اللہ تارڑ اور رانا ثناء اللہ کے علاوہ گورنر خیبرپختونخوا فیصل کریم کنڈی، چیف سیکریٹری، انسپکٹر جنرل پولیس، کور کمانڈر پشاور، صوبائی مشیران کے علاوہ وفاقی اور صوبائی حکومت کے اعلیٰ افسران شریک ہوئے۔
خطاب کے آغاز پر وزیر اعظم نے پشاور میں نجی اسکول کی چھت گرنے کے سانحے پر اظہار افسوس کرتے ہوئے کہا کہ انہوں نے ”گورنر سے اس وقت بات کی تھی کہ مہربانی کر کے نہ صرف ان بچوں کے ورثاء سے آپ ملیں گے، لیکن اس سانحے کی شفاف تحقیق ہونی چاہیے۔“
یہ واقعہ گورنر راج کے نفاذ کے چھٹے روز یعنی 16 اکتوبر کو پشاور کی دیر کالونی میں پیش آیا تھا جس میں چھت گرنے سے 32 بچے اور 2 خاتون ٹیچرز جاں بحق ہو گئے تھے۔
خطاب میں شہباز شریف نے خیبر پختونخوا میں امن و امان کی بگڑتی صورت حال، دہشت گردی میں اضافے اور عوامی مسائل پر پی ٹی آئی حکومت کے غیر سنجیدہ رویے کو صوبے میں ایمرجنسی اور گورنر راج نافذ کرنے کے فیصلے کی بنیادی وجہ قرار دیا۔
انہوں نے کہا، ”کے پی خدانخواستہ جلتا رہے اور ہم بیٹھ کے تماشا دیکھیں اور بانسری بجائیں، یہ ممکن نہیں ہے۔ اٹ از نیکسٹ ٹو امپاسیبل۔“
گورنر راج کا حتمی فیصلے لینے سے قبل کے حالات پر روشنی ڈالتے ہوئے وزیراعظم نے اجلاس کو بتایا کہ ہم نے ’آخری کوشش‘ کے طور پر پی ٹی آئی سے مذاکرات کے لیے ایک ٹیم تشکیل دی، جس نے ’دن رات محنت کی‘
ان کے مطابق محسن نقوی نے انہیں فون کر کہ کہا کہ ”شہباز صاحب مبارک ہو معاملہ طے ہو گیا ہے“ جس پر انہوں نے معاہدے پر دستخط ہونے کا پوچھا تو انہیں بتایا گیا کہ وہ ڈرافٹ ”سہیل افریدی کو دکھانے کے لیے لے گئے ہیں اور چند منٹوں میں آ جائیں گے۔ ریسٹ از ہسٹری۔“
یاد رہے کہ 2 اکتوبر کو حکومت اور پی ٹی آئی کے درمیان شروع ہونے والے مذاکرات میں 3 اکتوبر کو ڈیڈلاک آ گیا تھا جس کا ذمہ دار حکومتی رہنماؤں نے وزیر اعلیٰ خیبر پختونخوا سہیل آفریدی کو ٹھہراتے ہوئے مؤقف اختیار کیا تھا کہ پی ٹی آئی کی مذاکراتی ٹیم با اختیار نہیں تھی جسے صوبائی حکومتی ٹیم نے دہشت گردی کے خلاف وفاقی حکومت کے مؤقف کو نہ ماننے پر مجبور کیا۔
شہباز شریف کے مطابق اس کے بعد انہوں نے صدر مملکت آصف علی زرداری سے 2 مرتبہ مشاورت کی اور پھر خیبر پختونخوا میں گورنر راج نافذ کرنے کا فیصلہ کیا۔
انہوں نے واضح کیا کہ حکومت دہشت گردی کے معاملے پر خاموش تماشائی نہیں بن سکتی، ہر چیز کی ایک حد ہوتی ہے جس کے بعد اسے مکمل ختم ہونا چاہیے۔
وزیراعظم نے کہا کہ خیبر پختونخوا پاکستان کی پہلی مضبوط دفاعی دیوار ہے، جہاں کے عوام، پولیس، قانون نافذ کرنے والے اداروں اور مسلح افواج نے دہشت گردی کے خلاف جنگ میں بے مثال قربانیاں دی ہیں۔ ان کے بقول، 2017-18ء تک پاکستان میں امن قائم ہو چکا تھا، تاہم بعد کے برسوں میں دہشت گردی کی واپسی نے ان قربانیوں کو شدید نقصان پہنچایا۔
انہوں نے کہا کہ دہشت گردی کے خلاف جنگ میں 80 ہزار افراد شہید ہوئے اور ملکی معیشت کو اربوں ڈالر کا نقصان اٹھانا پڑا۔ وزیراعظم نے دہشت گردی کے دوبارہ پھیلاؤ پر افسوس کا اظہار کرتے ہوئے کہا کہ ان حالات کا جامع جائزہ لینے اور ماضی کی غلطیوں سے سبق سیکھنے کی ضرورت ہے۔
شہباز شریف نے کہا کہ گزشتہ حکومت کے دور میں خیبر پختونخوا پولیس کی 5 ہزار خالی اسامیاں پُر نہیں کی گئیں، سیف سٹی منصوبے نامکمل رہے اور محکمہ انسداد دہشت گردی کی استعداد، پولیس کی تربیت اور پیشہ ورانہ صلاحیتوں میں خاطر خواہ اضافہ نہیں کیا گیا۔
انہوں نے کہا کہ 2010ء کے نیشنل فنانس کمیشن (این ایف سی) ایوارڈ کے تحت خیبر پختونخوا کو دہشت گردی کے خلاف جنگ میں اس کے کردار کے پیش نظر اضافی ایک فیصد وسائل فراہم کرنے کا فیصلہ کیا گیا تھا، جس کے تحت 800 ارب روپے سے زائد رقم دی جا چکی ہے یا فراہم کی جا رہی ہے۔
وزیراعظم نے کہا کہ اتنے وسائل کی فراہمی کے باوجود صوبے میں دہشت گردی کا خاتمہ نہ ہونا اور اس کے مقابلے کے لیے درکار صلاحیتوں میں کمی تشویش ناک ہے۔ انہوں نے صوبائی حکومتوں پر تنقید کرتے ہوئے کہا کہ وفاق نے دہشت گردی کے خاتمے اور صوبے کی ترقی کے لیے تعاون کی پیشکش کی، تاہم مطلوبہ پیش رفت نہ ہو سکی۔
ایڈوائزری کونسل سے عوامی مسائل حل کرنے کی توقع
وزیراعظم نے کہا کہ خیبر پختونخوا کے عوام گزشتہ 13 برس سے بہتر علاج، معیاری تعلیم، تحفظ، کرپشن کے خاتمے اور بنیادی سہولیات کی فراہمی کے منتظر ہیں۔ انہوں نے ایڈوائزری کونسل کے ارکان کو پیشہ ورانہ مہارت رکھنے والے افراد قرار دیتے ہوئے امید ظاہر کی کہ وہ گورنر کی قیادت میں صوبے کے حالات بہتر بنانے کے لیے مؤثر کردار ادا کریں گے۔
انہوں نے کہا کہ حکومت کی اولین ترجیحات میں امن و امان کی بحالی، صحت و تعلیم کی سہولیات میں بہتری، عوام کے جان و مال کا تحفظ اور بدعنوانی کا خاتمہ شامل ہیں۔
شہباز شریف نے صوبے میں مبینہ بدعنوانی کی مثالیں دیتے ہوئے دعویٰ کیا کہ سٹی امپروومنٹ پراجیکٹ میں صاف پانی کی فراہمی کے منصوبے کے تحت 100 ارب روپے کی کرپشن ہوئی، جبکہ ضلع کوہستان کے ڈسٹرکٹ اکاؤنٹس آفس میں 37 ارب روپے کی لوٹ مار کی گئی۔ انہوں نے پیلیسر گولڈ پراجیکٹ میں بھی من پسند افراد کو ٹھیکے دینے اور اربوں روپے کی مبینہ بدعنوانی کے الزامات عائد کیے۔
وزیراعظم نے ان الزامات کی تفصیلات پیش کرتے ہوئے کہا کہ عوامی وسائل کے ضیاع اور بدعنوانی کے خلاف مؤثر اقدامات ضروری ہیں۔
معیشت کی بحالی اور وفاقی حکومت کا تعاون
وزیراعظم نے کہا کہ گزشتہ ڈھائی برس میں وفاقی حکومت نے معیشت کو مستحکم کرنے کے لیے مسلسل کوششیں کیں اور سیاسی و عسکری قیادت کے تعاون سے معاشی استحکام کی جانب پیش رفت ہوئی ہے۔
انہوں نے کہا کہ عالمی منڈی میں تیل کی بلند قیمتوں کے باوجود پاکستان جیسے توانائی درآمد کرنے والے ملک کے لیے معاشی استحکام برقرار رکھنا ایک بڑا چیلنج ہے۔ ان کے مطابق، دہشت گردی کے خلاف کارروائیوں اور معاشی ترقی کے لیے قومی سطح پر مشترکہ کوششیں ناگزیر ہیں۔
اپنے خطاب کے اختتام پر وزیراعظم نے کہا کہ وفاقی حکومت خیبر پختونخوا کے عوام کی محرومیوں کے خاتمے اور صوبے کو ترقی کی راہ پر گامزن کرنے کے لیے کوئی کسر اٹھا نہیں رکھے گی۔
انہوں نے کہا کہ وفاقی حکومت، گورنر، ایڈوائزری کونسل اور عسکری قیادت کے تعاون سے خیبر پختونخوا کو دوبارہ ترقی کی دوڑ میں دوسرے صوبوں کے ہم پلہ لانے کی کوشش کی جائے گی، بلکہ ان کی خواہش ہے کہ صوبہ دیگر صوبوں سے بھی آگے بڑھے۔
وزیراعظم نے کہا کہ خیبر پختونخوا کے عوام نے پاکستان کے قیام کے وقت بھی ملک کا بھرپور ساتھ دیا تھا اور اب ان کی محرومیوں کا ازالہ کرنا قومی ذمہ داری ہے۔ انہوں نے امید ظاہر کی کہ مشترکہ کوششوں سے صوبے میں امن، خوشحالی اور ترقی کا دور واپس آئے گا۔
عوام امن، استحکام اور ترقی چاہتی ہے، گورنر
اس سے قبل گورنر فیصل کریم کنڈی نے اجلاس سے خطاب کرتے ہوئے وزیر اعظم شہباز شریف، فیلڈ مارشل عاصم منیر اور وفاقی وزراء کا شکریہ ادا کیا جو ان کے مطابق ”امن و امان کے مسائل پر غور و خوض اور ان کے حل کے لیے مشترکہ حکمت عملی مرتب کرنے کی غرض سے تشریف لائے۔“
انہوں نے کہا کہ خیبر پختونخوا میں امن کا قیام اور عوام کا تحفظ ہماری مشترکہ ترجیح ہے اور ’پرامن آئینی اقدام‘ اس بات کا ثبوت ہے کہ صوبے کے عوام امن، استحکام اور ترقی چاہتی ہے۔
انہوں نے خیبرپختوا میں گورنر راج اور ایمرجنسی کے نفاذ کے تناظر میں ”اپنی عوام کو خراج تحسین پیش“ کیا جنہوں نے ان کے مطابق ”اشتعال انگیزی کے باوجود تحمل کا مظاہرہ کیا“۔
اس موقع پر گورنر نے دعویٰ کیا کہ اس دوران ”صوبے میں کوئی ناخوشگوار واقعہ پیش نہیں آیا، جو ہماری عوام کے ذمہ دارانہ رویے اور امن کے لیے ان کی وابستگی کا ثبوت ہے۔“
انہوں نے دہشت گردی کے خلاف جنگ میں اپنی جانوں کا نذرانہ پیش کرنے والے شہدا کو خراج عقیدت پیش کرتے ہوئے کہا کہ ”خیبر پختونخوا کی عوام، پولیس، پاک فوج، فرنٹیئر کور اور فیڈرل کانسٹیبلری نے اس سرزمین کے امن کے لیے بے پناہ قربانیاں دی ہیں۔“
گورنر کے پی کا ماننا تھا کہ ”ان قربانیوں کا تقاضا ہے کہ ہم دہشت گردی کے خاتمے کے لیے اپنی کوششوں کو مزید موثر بنائیں۔“
انہوں نے وفاقی حکومت اور تمام متعلقہ قومی اداروں کا شکریہ ادا کیا ”جنہوں نے موثر منصوبہ بندی، مربوط حکمت عملی اور باہمی تعاون کے ذریعے اس عمل کو آگے بڑھایا“۔
خیبر پختونخوا کے امن و استحکام کے لیے وفاقی حکومت کے تعاون کو ’نہایت اہم‘ قراردیتے ہوئے انہوں نے کہا کہ ”ہماری اجتماعی ترجیح کل بھی خیبر پختونخوا کی عوام تھی، آج بھی ہے اور آئندہ بھی رہے گی۔“
اپنی اور اپنی ایڈوائزری کونسل کی ترجیحات کا ’واضح طور پر اعادہ‘ کرتے ہوئے انہوں نے کہا کہ ”ہماری پہلی ترجیح امن کا قیام اور دہشت گردی کا خاتمہ ہے۔ پہلے دن سے ہماری توجہ پولیس کی استعداد کار بڑھانے، سیکیورٹی اداروں کی معاونت اور ضم شدہ اضلاع کی ترقی پر مرکوز رہی ہے۔“
فیصل کریم کنڈی نے خیبر پختونخوا کی عوام کو امن اور ترقی میں سے کسی ایک کا انتخاب کرنے کا مشورہ دیتے ہوئے کہا کہ ”یہ ہم سب کی مشترکہ ذمہ داری ہے کہ انہیں دونوں (امن اور ترقی) فراہم کریں۔ ہمیں مل کر ثابت کرنا ہے کہ جب ترجیحات واضح ہوں، ادارے ایک پیج پر ہوں اور مقصد عوام کی خدمت ہو، تو خیبر پختونخوا میں امن بھی قائم ہو سکتا ہے اور ترقی بھی ممکن بنائی جا سکتی ہے۔“
انہوں نے ضم شدہ اضلاع کی ترقی کو کے پی کے نئے حکومتی انتظام کی خصوصی ترجیح قرار دیتے ہوئے کہا کہ ”ان علاقوں کی عوام نے دہشت گردی کے خلاف جنگ میں بھاری قیمت ادا کی ہے۔ اب ان کا حق ہے کہ انہیں بہتر تعلیم، صحت، روزگار اور معاشی مواقع میسر آئیں۔“
انہوں نے وفاقی حکومت کے تعاون سے ضم شدہ اضلاع کو قومی ترقی کے دھارے میں شامل کرنے کے لیے اپنا کردار ادا کرتے رہنے کے عزم کا اظہار کیا۔
’دہشت گردوں اور ان کے سہولت کاروں کے خلاف کارروائی ناگزیر ہے‘
گورنر خیبر پختونخوا نے کہا ہے کہ دہشت گردی کے خلاف کامیابی کا اصل معیار عوام کا اعتماد بحال کرنا، پولیس اور محکمہ انسداد دہشت گردی (سی ٹی ڈی) کی پیشہ ورانہ صلاحیت بڑھانا اور دہشت گردی کے پورے نیٹ ورک کا خاتمہ ہے۔
ان کا کہنا تھا کہ دہشت گردوں کے ساتھ ان کے سہولت کاروں، معاون نیٹ ورکس اور مالی معاونت کے ذرائع کے خلاف بھی منظم اور مؤثر کارروائی ضروری ہے۔
گورنر نے بتایا کہ ان کے دفتر اور مشاورتی ٹیم نے مختصر وقت میں صوبے کے مسائل، انتظامی خلا اور چیلنجز کا جائزہ لے کر قابلِ عمل تجاویز تیار کی ہیں، جن سے بریفنگ میں آگاہ کیا جائے گا۔ ان کے مطابق مقصد صرف مسائل کی نشاندہی کرنا نہیں بلکہ واضح ترجیحات، قابلِ عمل حل اور نتائج پر مبنی حکمت عملی پیش کرنا ہے۔
انہوں نے وفاقی حکومت سے مسلسل تعاون کی امید ظاہر کرتے ہوئے کہا کہ خیبر پختونخوا میں امن و امان کے قیام، عوام کی بہتری اور بالخصوص ضم شدہ اضلاع کی ترقی کے لیے وفاق اور صوبے کے درمیان اشتراک ضروری ہے۔
گورنر کا کہنا تھا کہ صدر مملکت، وزیراعظم اور چیف آف ڈیفنس فورسز کی رہنمائی میں وفاقی حکومت، قومی اداروں اور صوبائی انتظامیہ کا مضبوط تعاون صوبے میں پائیدار امن اور خوشحالی کی بنیاد بن سکتا ہے۔
انہوں نے کہا کہ خیبر پختونخوا کے عوام کو تنہا نہیں چھوڑا جا سکتا، ان کی قربانیوں کو فراموش نہیں کیا جا سکتا اور ان کی ترقی مزید مؤخر نہیں ہونی چاہیے۔
خیبر پختونخوا کے امن، ترقی، اور خوشحالی کو پاکستان کے مفاد میں قرار دیتے ہوئے انہوں نے کہا کہ وہ اس کو ”ایک ایسا مثالی صوبہ بنائیں جہاں امن قائم ہو، دہشت گردی کا خاتمہ ہو، ادارے موثر انداز میں کام کریں، عوام کو بروقت انصاف ملے اور ترقی کے ثمرات ہر علاقے تک پہنچیں۔“
ایمرجنسی اور گورنرراج
11 اکتوبر کو صدر مملکت آصف علی زرداری نے وفاقی کابینہ کی سفارش پر آئین کے آرٹیکل 232 کے تحت ایمرجنسی اور آرٹیکل 234 کے تحت گورنر راج کے نفاذ کی منظوری دی تھی۔
وفاقی حکومت نے اس اقدام کی وجہ صوبے میں بگڑتی ہوئی سکیورٹی صورتحال اور انسدادِ دہشت گردی کی کوششوں میں پاکستان تحریک انصاف کی صوبائی حکومت کے مبینہ طور پر ناکافی تعاون کو قرار دیا تھا۔
گورنرراج کے نفاذ کے بعد انتظامی اختیارات گورنر فیصل کریم کنڈی کو منتقل ہوگئے تھے۔وفاقی حکومت نے گورنر کی معاونت کے لیے 11 رکنی مشاورتی کونسل کے قیام کا اعلان بھی کیا تھا جبکہ دہشت گردی سے متاثرہ 12 اضلاع کے لیے الگ ایریا ڈیولپمنٹ سیکریٹریٹ قائم کیا گیا۔
ان اضلاع میں ڈیرہ اسماعیل خان، ٹانک، لکی مروت، بنوں، باجوڑ، مہمند، خیبر، کرم، اورکزئی، اپر جنوبی وزیرستان، لوئر جنوبی وزیرستان اور شمالی وزیرستان شامل ہیں۔
وفاقی حکومت نے سول انتظامیہ کی معاونت کے لیے آئین کے آرٹیکل 245 کے تحت پاک فوج کی تعیناتی کی بھی منظوری دی تھی۔
ایمرجنسی اور گورنر راج کے اقدامات کو پارلیمانی منظوری کے لیے بھی پیش کیا گیا تھا۔ قومی اسمبلی اور سینیٹ نے 14 اکتوبر کو ان کی توثیق کی جبکہ پارلیمنٹ کے مشترکہ اجلاس نے 15 اکتوبر کو اپوزیشن کے احتجاج کے دوران 214 کے مقابلے میں 56 ووٹوں سے قرارداد منظور کرلی تھی۔
17 اکتوبر کو وفاقی حکومت نے جرگہ مشاورت کے بعد 12 متعلقہ اضلاع کے لیے علاقائی نمائندہ و ترقیاتی کونسل کے 48 ارکان بھی مقرر کیے تھے۔
دوسری جانب ان اقدامات کو پشاور ہائیکورٹ میں چیلنج کردیا گیا ہے۔ عدالت نے 20 اکتوبر کو ایمرجنسی اور گورنر راج کے خلاف درخواستوں پر فیصلہ محفوظ کیا تھا۔
21 اکتوبر کو عدالت نے سہیل آفریدی کے اہل خانہ کی جانب سے مبینہ غیر قانونی حراست کے الزامات کے بعد اعلیٰ صوبائی حکام سے ان کے مقام اور قانونی حیثیت سے متعلق رپورٹس طلب کی تھیں۔ اس مقدمے کی سماعت 3 نومبر تک ملتوی کردی گئی تھی۔
