خیبر پختونخوا کے دارالحکومت پشاور کے علاقے دیر کالونی میں ایک نجی اسکول کی چھت گرنے سے 32 بچے اور 2 خاتون ٹیچرز جاں بحق جبکہ اسکول کے مالک کو گرفتار کر لیا گیا ہے۔
ریسکیو حکام کے مطابق ان کے کنٹرول روم کو 8 بج کر 48 منٹ پر اسکول کی چھت گرنے کی اطلاع ملی جس کے فوراً بعد ریسکیو آپریشن کا آغاز ہوا جو 4 گھنٹے تک جاری رہا۔ اس دوران ملبے تلے بچوں کو نکال کر لیڈی ریڈنگ اسپتال اور نصیر اللہ بابر میموریل اسپتال منتقل کیا جاتا رہا جہاں ایمرجنسی نافذ کر دی گئی تھی۔
اہم نکات:
- حادثے کے وقت اسکول میں 110 بچے موجود تھے۔
- جاں بحق بچوں کی عمریں 4 سے 14 سال کے درمیان تھیں۔
- جاں بحق بچوں میں 3 بچیاں، 25 بچے اور دو خاتون ٹیچرشامل ہیں جبکہ 5 بچوں کی شناخت نہیں ہو سکی۔
- اسکول کی عمارت تین منزلہ تھی اور چھتیں ناپختہ تھیں۔
- عمارت کی خستہ حالی اور کمزور ڈھانچہ حادثے کی ممکنہ وجوہات ہیں۔
- اسکول کی رجسٹریشن اور حادثے کی وجوہات جاننے کے لیے تین رکنی تحقیقاتی کمیٹی قائم کی گئی ہے۔
پشاور کے لیڈی ریڈنگ اسپتال کی جانب سے جاری کی گئی فہرست کے مطابق حادثے کے بعد کل 53 افراد اسپتال لائے گے جن میں سے 36 کی صنف مرد اور 12 کی صنف عورت تھی۔ ان میں سے 31 بچے اور 2 خاتون ٹیچرز جاں بحق ہو گئے جبکہ 17 زخمی بچوں کو طبی امداد دینے کے بعد ڈسچارج کر دیا گیا۔
فہرست کے مطابق جاں بحق ہونے والے بچوں میں 3 بچیاں اور 25 بچے شامل ہیں جبکہ 5 بچوں کی شناخت نامعلوم ہے۔
جاں بحق ہونے والے تمام بچوں میں سب سے کم عمر بچہ 4 سال جبکہ سب سے بڑے بچے کی 14 سال نوٹ کی گئی ہے۔
لیڈی ریڈنگ اسپتال کے مطابق 3 بچوں کو طبی نگرانی میں رکھا گیا ہے جبکہ کسی بھی زخمی کو اسپتال میں داخل نہیں کیا گیا۔
ادھر نصیر اللہ بابر میموریل اسپتال کی انتظامیہ کے مطابق اسپتال میں 34 بچوں کو لایا گیا جن میں سے ایک بچے کی سانس کی ڈور پہلے ہی ٹوٹ چکی تھی جبکہ 33 زخمی حالت میں تھے۔
اسپتال کے مطابق ان میں سے 32 بچوں کو ابتدائی طبی امداد دے کر ڈسچارج کر دیا گیا۔
ریسکیو ترجمان کے مطابق آپریشن میں ریسکیو 1122 کی 16 ایمبولینسز، 2 ڈیزاسٹر وہیکلز اور 60 سے زائد اہلکاروں نے حصہ لیا اور فوری طور پر 45 بچوں کو نکالا گیا۔
پولیس کے مطابق ملبے تلے دبے بچوں کونکالنے کے لیے آپریشن میں ریسکیو حکام، پولیس، پاک فوج کے اہلکاروں کے علاوہ نجی تنظیموں اور مقامی رضا کاروں نے بھی حصہ لیا جبکہ زخمی بچوں اور ٹیچرز کو پشاور کے لیڈی ریڈنگ اسپتال اور نصیر اللہ بابر میموریل اسپتال منتقل کیا گیا۔
View this post on Instagram
110 بچے موجود تھے، اسکول مالک گرفتار
کیپیٹل سٹی پولیس آفیسر (سی سی پی او) پشاور ڈاکٹر میاں سعید کا کہنا ہے کہ یہ علاقہ تھانہ یکہ توت کی حدود میں آتا ہے اور حادثے کے وقت 110 بچے عمارت میں موجود تھے۔
واضح رہے کہ حادثے کے وقت اسکول مالک اور انتظامیہ دونوں جائے وقوع سے غائب پائے گئے جس کے باعث ریسکیو حکام اور میڈیا ابتدائی طور پر اسکول میں موجود بچوں کی تعداد سے بھی لاعلم تھے۔
سی سی پی او نے مزید کہا کہ یہ اسکول الخیر نامی ایک رفاعی تنظیم کی زیر نگرانی چلایا جا رہا تھا جس کے مالک کو گرفتار کر لیا گیا ہے۔
View this post on Instagram
انہوں نے کہا کہ واقعے کی ایف آئی آر بھی درج کی جائے گی اور ضلعی انتظامیہ سے مل کر مکمل تحقیقات بھی ہوں گی جس میں دیکھا جائے گا کہ تنظیم رجسٹرڈ ہے یا نہیں اور اسے اسکول چلانے کا این او سی کس نے جاری کیا۔
اس بارے میں ذرائع کا کہنا ہے کہ یہ مڈل اسکول تھا جو پرائیوٹ اسکول ریگولیٹری اتھارٹی (پی ایس آر اے) کے ساتھ رجسٹرڈ تھا۔ ذرائع کے مطابق اسکول کی عمارت خستہ حال تھی جبکہ اتھارٹی نے عمارت کا معائنہ کیے بغیر ہی لائسنس جاری کیا۔
معاملے کی انکوائری کے لیے خیبرپختونخوا کے ایلیمنٹری اینڈ سیکنڈری ایجوکیش ڈپارٹمنٹ نے 3 رکنی کمیٹی تشکیل دی ہے جو نہ صرف اس حادثے کی وجوہات کا تعین کرے گی بلکہ مستقبل میں ایسے افسوسناک واقعات سے بچنے کے لیے سفارشات بھی پیش کرے گی۔
چھت گری کیسے؟
ہم نیوز کے پشاور سے نمائندے انور زیب کے مطابق یہ پرائیویٹ اسکول دیر کالونی میں رنگ روڈ پر واقع تھا جس کی گراؤنڈ فلور کے علاوہ 2 منزلیں اور تھیں۔ پہلی منزل کے چاروں اطراف کمرے بنے ہوئے تھے جبکہ درمیان میں اوپن ایریا ہے۔
ان کے مطابق واقعے میں 2 کلاس رومز منہدم ہوئیں جس سے چھٹی اور ساتویں کلاس کے بچے زیادہ متاثر ہوئے۔ ایک طرف بالائی منزل کا ایک کمرہ گرا جبکہ اس کے نیچے موجود کمرہ بھی منہدم ہوگیا۔
سی سی پی او کا کہنا ہے کہ اسکول کی عمارت 3 منزلوں پر مشتمل تھی جس کی چھتیں سیمنٹ کے بجائے چوکے سے بنیں تھیں یعنی کچی چھتیں تھیں۔ ان کے مطابق چھت گرنے کی بنیادی وجہ اس کا کمزور ڈھانچہ تھا جو زیادہ بوجھ نہ سہہ سکا۔
چھت گرنے کی ممکنہ وجوہات کے بارے میں ہم نیوز پشاور کی رپورٹر علیشبہ خٹک کا کہنا ہے کہ عمارت کی حالت اچھی نہیں تھی جو حالیہ بارشوں کے باعث مخدوش ہوئی اور اس افسوسناک حادثے کی وجہ بنی۔
View this post on Instagram
انور زیب کے مطابق یہ حادثہ ایک گنجان آباد رہائشی علاقے میں پیش آیا جس کے بعد بچوں کے لواحقین اور مقامی افراد کی بڑی تعداد فوراً موقع پر پہنچی اور ریسکیو حکام کے ساتھ امدادی کارروائیوں میں حصہ ڈالنے کی کوشش کی۔
جائے وقوع پر مقامی افراد کی رش کی وجہ سے ریسکیو حکام کو امدادی کارروائیوں میں مشکلات کا سامنا ہونے کی بھی اطلاعات ملیں جبکہ تنگ سڑکوں اور زیادہ ٹریفک کی وجہ سے زخمیوں کو اسپتال منتقل کرنے میں بھی مشکلات پیش آتی ہیں۔
وزیراعظم شہبازشریف، صدر مملکت آصف علی زرداری، اور گورنرخیبرپختونخوا فیصل کریم کنڈی سمیت وفاقی اور صوبائی حکومتی رہنماؤں اور سیاسی قیادت نے واقعے میں جانی نقصان پر اظہار افسوس کرتے ہوئے جاں بحق بچوں کےلواحقین سے اظہارتعزیت کیا ہے اور واقعہ کی تحقیقات کرکہ ذمہ داران کے خلاف کارروائی کی ہدایت کی ہے۔
رواں سال اسکولوں کی چھتیں گرنے کے 4 بڑے حادثات
رواں سال ملک میں اسکولوں کی چھتیں گرنے کے 4 بڑے حادثات پیش آچکے ہیں جو سیالکوٹ، ڈیرہ غازی خان اور لاہور میں رونما ہوئے۔
View this post on Instagram
21 فروری 2026 کو سیالکوٹ میں زیر تعمیر سرکاری گرلز ہائی اسکول کا شیڈ گرنے سے آٹھویں جماعت کی ایک طالبہ جاں بحق ہوئی، 7 مئی 2026 کو ڈیرہ غازی خان میں نجی اسکول کے کلاس روم کی چھت گرنے سے 4 طلبہ جاں بحق ہوئے۔
30 جون 2026 کو لاہور کے علاقے کاہنہ میں ٹیوشن سینٹر کی چھت گرنے سے 14 بچے جاں بحق ہوئے۔ اس کے علاوہ 2 جولائی 2026 کو لاہور کے علاقے باغبانپورہ میں زیر تعمیر اسکول کی عمارت کا ایک حصہ گرنے سے 8 سالہ بچہ جاں بحق ہوا۔
