پارلیمنٹ کے مشترکہ اجلاس نے خیبرپختونخوا میں ایمرجنسی کے نفاذ کی توثیق سے متعلق قرارداد منظور کرلی جس کے حق میں 214 جبکہ مخالفت میں 56 ارکان نے ووٹ دیا۔
دونوں ایوانوں کے مشترکہ اجلاس میں پیپلز پارٹی، پاکستان مسلم لیگ (ن) اور متحدہ قومی موومنٹ (ایم کیو ایم) کے ارکان نے قرارداد کی حمایت کی، جبکہ اپوزیشن نے ایوان میں احتجاج کرتے ہوئے ’گورنر راج نامنظور‘ کے نعرے لگائے۔
اسپیکر قومی اسمبلی ایاز صادق کی صدارت میں ہونے والے اجلاس میں وفاقی وزیر پارلیمانی امور ڈاکٹر طارق فضل چوہدری نے خیبرپختونخوا میں ایمرجنسی اور گورنر راج کے نفاذ سے متعلق قرارداد پیش کی۔
اجلاس میں چیئرمین سینیٹ یوسف رضا گیلانی اور نائب وزیراعظم اسحاق ڈار سمیت دیگر ارکان شریک ہوئے۔
گزشتہ روز قومی اسمبلی اور سینیٹ نے بھی خیبر پختونخوا میں ایمرجنسی کے نفاذ کی متفقہ طور پر توثیق کی تھی۔
خیبر پختونخوا میں ایمرجنسی کے نفاذ سے پہلے آخری وقت تک کوشش کی، محسن نقوی
پارلیمنٹ کے مشترکہ اجلاس سے خطاب کرتے ہوئے وفاقی وزیر داخلہ محسن نقوی نے کہا کہ وفاقی حکومت نے دہشت گردی کے خلاف جنگ میں خیبر پختونخوا حکومت کو ساتھ ملانے کی پوری کوشش کی، تاہم صوبائی حکومت اس معاملے میں قیادت کرنے کے لیے تیار نہیں تھی۔
محسن نقوی نے کہا کہ رواں سال فروری میں پشاور میں ایپکس کمیٹی کا اجلاس ہوا تھا، جس میں انہوں نے، کور کمانڈر پشاور اور وزیراعلیٰ خیبر پختونخوا نے شرکت کی تھی۔ اس اجلاس کا مقصد دہشت گردی کے خلاف مشترکہ حکمت عملی طے کرنا تھا۔
انہوں نے کہا کہ ایپکس کمیٹی کا اجلاس بلانے کے لیے انہیں بہت مشکلات کا سامنا کرنا پڑا۔ اجلاس کے بعد صرف اتنا اعلان کرنا تھا کہ دہشت گردی کا مل کر مقابلہ کیا جائے گا لیکن اس حوالے سے جاری ہونے والی پریس ریلیز سب کے سامنے ہے۔
محسن نقوی کے مطابق اجلاس کے روز ہی بعض فوجی اہلکار شہید ہوئے تھے، ان کے بقول انہوں نے وزیراعلیٰ خیبر پختونخوا سے باقاعدہ درخواست کرکے انہیں شہدا کے جنازوں میں شرکت کے لیے لے جانے کی کوشش کی، انہوں نے دعویٰ کیا کہ یہ آخری موقع تھا جب وزیراعلیٰ خیبر پختونخوا نے کسی فوجی افسر یا جوان کے جنازے میں شرکت کی۔
انہوں نے کہا کہ خیبر پختونخوا میں دہشت گردی کے درجنوں واقعات پیش آئے، جوان شہید ہوتے تھے، لیکن اگلے روز وزیراعلیٰ فوج کے خلاف بات کرتے تھے۔
وفاقی وزیر داخلہ نے کہا کہ دہشت گردی کے معاملے پر مذاکرات میں شریک تمام ارکان کا مؤقف واضح تھا اور انہوں نے پاکستان کے لیے مل کر کام کرنے پر اتفاق کیا تھا۔ ان کے مطابق اسد قیصر نے بھی دہشت گردی کے خلاف اقدامات کی حمایت کی تھی تاہم انہوں نے ان سے کہا تھا کہ ان کے مؤقف اور صوبائی حکومت کے اقدامات میں فرق ہے، اس لیے وہ اپنی حکومت سے بات کریں۔
محسن نقوی نے الزام عائد کیا کہ خیبر پختونخوا حکومت کے بعض رہنماؤں نے تحریک طالبان پاکستان (ٹی ٹی پی) کی مذمت تک نہیں کی۔ انہوں نے کہا کہ صوبائی حکومت کے وزیراطلاعات سے متعلق بھی یہ سوال اٹھایا گیا تھا کہ انہوں نے ٹی ٹی پی کی مذمت کیوں نہیں کی۔
انہوں نے کہا کہ وفاقی حکومت کی جانب سے خیبر پختونخوا میں پولیس کو مضبوط بنانے کے لیے پانچ اضلاع کا منصوبہ بھی تیار کیا گیا تھا، جس کے تحت چھ ماہ میں سول مسلح فورسز کو پیچھے ہٹا کر پولیس کو آگے لانا تھا۔ تاہم، ان کے بقول اس منصوبے پر عمل درآمد میں رکاوٹیں آئیں۔
وزیر داخلہ نے کہا کہ دہشت گردی کے خلاف جنگ کی قیادت صوبائی حکومت کو کرنی چاہیے تھی، جبکہ فوج، فرنٹیئر کور اور دیگر اداروں نے اس کی معاونت کرنا تھی، ان کے مطابق صوبائی حکومت یہ قیادت لینے کے لیے تیار نہیں تھی۔
’حکومتی ٹیم مذاکرات سے خود نہیں اٹھی تھی‘
محسن نقوی نے کہا کہ وفاقی حکومت نے مذاکرات کے دوران دوسری جانب کے مطالبات پورے کرنے کی کوشش کی اور مذاکرات سے خود نہیں اٹھی تھی۔
انہوں نے کہا کہ مذاکرات کے دوران حکومتی وفد مشاورت کے لیے الگ کمرے میں بیٹھا رہا جبکہ وفاقی وفد انتظار کرتا رہا اور اس نے جلد فیصلہ کرنے کے لیے دباؤ نہیں ڈالا۔
ان کے مطابق مذاکرات کے دوران زیرِ بحث دستاویز میں آخری نکتے کے علاوہ باقی تمام مطالبات دوسری جانب سے پیش کیے گئے تھے۔ لانگ مارچ ختم کرنے کی شرط بھی شیری رحمان کی تجویز پر شامل کی گئی تھی، جس پر انہوں نے مؤقف اختیار کیا کہ اگر یہ شرط رکھنی ہے تو اسے بھی شامل کر لیا جائے۔
وزیر داخلہ نے کہا کہ وزیراعظم، صدر اور بلاول بھٹو زرداری کی جانب سے مذاکرات کی بات سامنے آنے کے بعد وفاقی حکومت نے بات چیت کی کوششیں کیں، انہوں نے دعویٰ کیا کہ مذاکرات ناکام ہونے کے آخری وقت تک بھی وفاقی حکومت انہیں کامیاب بنانے کی کوشش کرتی رہی۔
’وفاقی حکومت نے خیبر پختونخوا کے مالی مسائل حل کرنے کے لیے بھی کوششیں کیں‘
محسن نقوی نے کہا کہ وفاقی حکومت نے خیبر پختونخوا کے مالی مسائل حل کرنے کے لیے بھی کوششیں کیں۔ ان کے مطابق وہ خود وزیراعلیٰ خیبر پختونخوا کو وزیر خزانہ اور وزیراعظم کے پاس لے کر گئے اور احسن اقبال سمیت دیگر حکام کے ساتھ اجلاسوں میں صوبے کے مالی مسائل حل کرنے کی کوشش کی۔
انہوں نے کہا کہ سیاسی مؤقف میں اختلاف اپنی جگہ لیکن وفاقی حکومت نے دہشت گردی کے معاملے کو سیاسی فائدے کے لیے استعمال نہیں کیا۔
وزیر داخلہ نے مزید کہا کہ وفاقی حکومت نے خیبر پختونخوا کے 12 اضلاع میں ایمرجنسی نافذ کرنے کی تجویز بھی دی تھی، جس پر ان کے بقول دوسری جانب نے اتفاق کیا تھا۔
’پی ٹی آئی سے مذاکرات کے لیے آج بھی تیار ہیں‘
وفاقی وزیر داخلہ محسن نقوی نے کہا کہ پی ٹی آئی سے مذاکرات کے لیے آج بھی تیار ہیں۔
وزیر داخلہ نے شفیع جان پر بھی تنقید کرتے ہوئے دعویٰ کیا کہ انہوں نے دہشت گردوں کی مذمت نہیں کی، محسن نقوی کا کہنا تھا کہ صوبائی حکومت کے بعض رہنماؤں کے بیانات اور رویے نے وفاق کے لیے صورت حال مزید مشکل بنا دی۔
وفاقی وزیر داخلہ نے واضح کیا کہ حکومت پی ٹی آئی سے مذاکرات کے لیے پہلے بھی تیار تھی اور اب بھی تیار ہے۔ ان کے مطابق وفاقی حکومت نے مذاکرات میں ہمیشہ پہل کی اور سیاسی اتفاقِ رائے کے ذریعے مسئلے کا حل نکالنے کی کوشش کی۔
وفاقی وزیر داخلہ نے دہشت گردی کے حوالے سے بات کرتے ہوئے کہا کہ بالکل ہم نے یہ نہیں کہا کہ یہ پی ٹی آئی کر رہی ہے ہم ہمیشہ کہہ رہے تھے کہ آپ ساتھ نہیں کھڑے ہوئے، آپ کے کچھ نیچے کے لوگ دہشت گردوں سے ملے ہوئے ہیں۔
عمران خان کی صحت کے حوالے سے وزیر داخلہ نے کہا کہ ان کی طبیعت خراب ہوتی ہے تو رات کو ہی انہیں اسپتال لے جایا جاتا ہے۔ وزیر داخلہ نے عمران خان سے ملاقاتوں کے بارے میں کہا کہ عمران خان سے ملاقاتیں ہو رہی تھیں اور ہوتی رہیں گی۔
اپوزیشن نے کہا کہ ہم مذاکرات کے لیے بانی پی ٹی آئی سے پوچھتے ہیں اور بات کرتے ہیں، وزیر داخلہ نے کہا کہ اتنی ہمت ہونی چاہیے کہ جو فیصلہ کریں وہیں پر کریں، ایسا نہیں ہونا چاہیے کہ ہم جیل میں جا کر ان سے پوچھ کر بتاتے ہیں۔
انہوں نے کہا کہ اپوزیشن سے سیاسی مذاکرات پر بھی اتفاق ہوا تھا۔اس کا پہلا پوائنٹ اپوزیشن لیڈر اور وزیراعظم کی ملاقات تھی تاکہ سیاسی بات چیت شروع ہو سکے۔
اس کے علاوہ ایک سیاسی کمیٹی تشکیل ہونی تھی جس میں تمام امور پر بات چیت ہونا تھی، اس کے علاوہ علاج معالجے یا سہولتوں کے حوالے سے جو قانونی حق ہے اس پر بات ہونا تھی۔
صوبے میں دہشت گردی کے خلاف ایکشن پلان پر بات ہونا تھی، یہ ایکشن پلان ان کی اپنی حکومت نے منظور کیا تھا۔
وزیر داخلہ کا فارم 47 کے معاملے پر اچکزئی کو جواب
وزیر داخلہ محسن نقوی نے کہا کہ ہمیں ایمرجنسی لگانے میں بالکل خوشی نہیں ہوئی لیکن مجبوراً جب کوئی راہ نہیں بچی تو ایسا کرنا پڑا۔ وزیر داخلہ کا کہنا تھا کہ ہم کراچی میں ہوتے تھے لیکن خیبرپختونخوا میں جنازوں پر پہنچ جاتے تھے لیکن صوبائی حکومت کا کوئی بندہ نہیں پہنچتا تھا۔
وزیر داخلہ محسن نقوی نے اپنے خطاب کے آخر میں اپوزیشن لیڈر محمود اچکزئی کو مخاطب کرتے ہوئے کہا کہ ”میں سیاسی باتیں نہیں کرتا لیکن اچکزئی صاحب نے کہا کہ آپ لوگ قسم کھا کر کہیں کہ فارم 47 کی وجہ سے سیٹ نہیں ملی تو میں آپ سے کہتا ہوں کہ پہلے آپ تو اپنی سیٹ کی قسم کھا لیں۔“ جس پر پورا ایوان قہقہے سے گونج اٹھا۔
پی ٹی آئی دور میں 35 سے 40 ہزار ٹی ٹی پی جنگجوؤں کی واپسی، اسحاق ڈار کا الزام
نائب وزیراعظم اور وزیر خارجہ اسحاق ڈار نے محسن نقوی کے خطاب سے قبل اپنی باری پر اظہار خیال کرتے ہوئے کہا کہ پی ٹی آئی کی سابق حکومت پر دہشت گردی میں اضافے کا ذمہ دار ہونے کا الزام عائد کرتے ہوئے کہا ہے کہ عمران خان کے دورِ حکومت میں افغانستان سے 35 ہزار سے 40 ہزار تک ٹی ٹی پی جنگجوؤں کو پاکستان واپس لایا گیا، جبکہ 100 سے زائد خطرناک مجرموں کو جیلوں سے رہا کیا گیا۔ انہوں نے خیبر پختونخوا میں ایمرجنسی اور گورنر راج کے نفاذ کا دفاع کرتے ہوئے کہا کہ یہ فیصلہ وفاقی کابینہ میں تفصیلی مشاورت کے بعد کیا گیا۔
پارلیمنٹ کے مشترکہ اجلاس سے خطاب کرتے ہوئے اسحاق ڈار نے سوال اٹھایا کہ افغانستان فرار ہونے والے ٹی ٹی پی جنگجوؤں کو پاکستان واپس آنے کی اجازت کس نے دی اور قید عسکریت پسندوں کی رہائی کے فیصلے کس کی منظوری سے کیے گئے؟ ان کا کہنا تھا کہ پاکستان نے دہشت گردی کے خاتمے کے لیے فوجی آپریشنز، سکیورٹی اہلکاروں کی قربانیوں اور بھاری مالی اخراجات کے ذریعے بڑی کامیابیاں حاصل کیں، لیکن ان کے بقول بعض غلط فیصلوں کے باعث ملک میں دوبارہ دہشت گردی بڑھی۔
انہوں نے کہا کہ ملک مزید دہشت گردی کا متحمل نہیں ہو سکتا اور سیاسی قیادت کو عملی تعاون کے ذریعے یہ ثابت کرنا ہوگا کہ وہ دہشت گردی کے خلاف متحد ہے۔
ضربِ عضب، ردالفساد اور نیشنل ایکشن پلان کا حوالہ
اسحاق ڈار نے دہشت گردی کے خلاف پاکستان کی کارروائیوں کا ذکر کرتے ہوئے کہا کہ دسمبر 2014 میں آرمی پبلک اسکول پشاور پر حملے کے بعد سیاسی جماعتیں ایک قومی حکمتِ عملی پر متفق ہوئیں، جس کے نتیجے میں نیشنل ایکشن پلان تشکیل دیا گیا۔ ان کے مطابق پی ٹی آئی بھی اس عمل کا حصہ تھی۔
انہوں نے آپریشن ضربِ عضب اور آپریشن ردالفساد کا حوالہ دیتے ہوئے کہا کہ ان کارروائیوں کے دوران سینکڑوں ارب روپے خرچ کیے گئے اور دہشت گرد نیٹ ورکس کو ختم کرنے کے لیے بڑی قربانیاں دی گئیں۔
نائب وزیراعظم نے سوال کیا کہ جب ان آپریشنز کے نتیجے میں دہشت گردی میں نمایاں کمی آئی تھی تو بعد میں جنگجوؤں کی واپسی کی اجازت کیوں دی گئی؟ انہوں نے کہا کہ سکیورٹی اہلکاروں، شہریوں اور بچوں کی قربانیوں کو چند افراد کے فیصلوں کی وجہ سے ضائع نہیں ہونے دینا چاہیے۔
ٹی ٹی پی سے مذاکرات پر پی ٹی آئی سے سوالات
اسحاق ڈار کی تنقید کا مرکز عمران خان کے دورِ حکومت، خصوصاً 2021 اور 2022 میں ٹی ٹی پی کے ساتھ ہونے والے مذاکرات بھی تھے۔ ان مذاکرات میں افغان طالبان نے رابطوں میں سہولت کاری کی تھی جبکہ جنگ بندی اور افغانستان سے جنگجوؤں کی واپسی جیسے معاملات زیرِ بحث آئے تھے۔
اسحاق ڈار کے مطابق جنگجوؤں کی واپسی اور قیدیوں کی رہائی نے سابقہ فوجی کارروائیوں سے حاصل ہونے والی کامیابیوں کو نقصان پہنچایا۔ انہوں نے کہا کہ دہشت گردی کے خلاف مؤثر حکمتِ عملی کے لیے سیاسی جماعتوں کو اختلافات سے بالاتر ہو کر مشترکہ لائحۂ عمل اختیار کرنا ہوگا۔
گورنر راج کے لیے چار شرائط کیا تھیں؟
نائب وزیراعظم نے بتایا کہ جمعیت علمائے اسلام (ف) کے سربراہ مولانا فضل الرحمان نے حکومت اور پی ٹی آئی کے درمیان اختلافات کم کرنے کے لیے دوبارہ مذاکرات کی کوشش کی تھی۔ ان کے مطابق وزیراعظم شہباز شریف سے ملاقاتوں کے بعد اس معاملے پر وفاقی کابینہ نے تقریباً ڈھائی گھنٹے غور کیا اور خیبر پختونخوا کی صورت حال سے نمٹنے کے لیے چار شرائط طے کیں۔
اسحاق ڈار کے بیان کے مطابق یہ شرائط صوبائی قیادت میں تبدیلی، دہشت گردی اور ٹی ٹی پی کی واضح الفاظ میں مذمت، دہشت گردی کے خلاف وفاقی حکومت کے ساتھ مشترکہ طور پر کام کرنے کی یقین دہانی اور ان اضلاع میں ہنگامی اقدامات جہاں امن و امان کی صورت حال قابو سے باہر ہو چکی ہو۔
انہوں نے دعویٰ کیا کہ وہ اور وفاقی وزیر داخلہ محسن نقوی کابینہ کا مؤقف مولانا فضل الرحمان تک پہنچانے کے لیے مقرر کیے گئے تھے، تاہم مولانا فضل الرحمان نے ان شرائط پر مطلوبہ یقین دہانیاں کرانے سے معذوری ظاہر کی۔
اسحاق ڈار کے مطابق وزیراعظم نے کابینہ اجلاس میں صورت حال کو ”اب یا کبھی نہیں“ کے مرحلے سے تعبیر کیا کیونکہ حکومت کے خیال میں مزید تاخیر ممکن نہیں رہی تھی۔
خیبر پختونخوا کو دہشت گردی کے خلاف 800 ارب روپے سے زائد ملنے کا دعویٰ
اسحاق ڈار نے خیبر پختونخوا میں انسدادِ دہشت گردی کے لیے مختص وسائل کے استعمال پر بھی سوالات اٹھائے۔ انہوں نے ساتویں قومی مالیاتی کمیشن (این ایف سی) ایوارڈ کا حوالہ دیتے ہوئے کہا کہ دسمبر 2009 میں طے پانے والے اس انتظام کے تحت صوبے کو وفاقی قابلِ تقسیم محاصل میں اضافی ایک فیصد حصہ دیا گیا تھا تاکہ دہشت گردی کے باعث پیدا ہونے والے اخراجات پورے کیے جا سکیں۔
ان کے مطابق 2010-11 سے ستمبر 2026 تک خیبر پختونخوا کو اس مد میں تقریباً 799.36 ارب روپے موصول ہوئے۔
نائب وزیراعظم نے سوال کیا کہ آیا صوبائی حکومت نے ان وسائل کو انسدادِ دہشت گردی کے محکمے (سی ٹی ڈی)، فرانزک لیبارٹریوں، تفتیشی سہولتوں اور قانون نافذ کرنے والے اداروں کی استعداد بڑھانے پر مؤثر انداز میں خرچ کیا؟ ان کا کہنا تھا کہ دہشت گردی کے خلاف کارروائیوں میں فوج پر مسلسل انحصار شہری قانون نافذ کرنے والے اداروں کی صلاحیت کے حوالے سے سوالات پیدا کرتا ہے۔
اسحاق ڈار نے خیبر پختونخوا میں گورنر راج کے دفاع میں آئین کے آرٹیکل 234 کا حوالہ دیتے ہوئے کہا کہ وفاقی حکومت نے صدارتی اعلان پارلیمنٹ کے مشترکہ اجلاس کے سامنے پیش کرکے آئینی طریقۂ کار اختیار کیا ہے۔
انہوں نے آرٹیکل 234 کی ذیلی شق 3 کا ذکر کرتے ہوئے کہا کہ اس شق کے تحت اعلان کو دو ماہ کے اندر مشترکہ اجلاس سے منظور کرانا ضروری ہے۔ منظوری کے بعد اس کی مدت میں دو، دو ماہ کی توسیع کی جا سکتی ہے، تاہم مجموعی مدت چھ ماہ سے زیادہ نہیں ہو سکتی۔
ان کے مطابق صدر مملکت نے یک طرفہ طور پر فیصلہ نہیں کیا بلکہ وفاقی کابینہ نے تفصیلی غور و خوض کے بعد اقدام کی حمایت کی۔ دوسری جانب پی ٹی آئی نے صوبائی حکومت کی معطلی کو سیاسی محرکات پر مبنی قرار دیتے ہوئے اس کے آئینی جواز پر اعتراض کیا ہے۔
’عمران خان بشریٰ بی بی سے باقاعدگی سے ملتے ہیں‘
نائب وزیراعظم اسحاق ڈار نے یہ دعویٰ بھی کیا کہ سابق وزیراعظم عمران خان کی اہلیہ بشریٰ بی بی باقاعدگی سے ان سے ملاقات کر رہی ہیں۔ ان کے مطابق انہیں ان ملاقاتوں کی تحریری طور پر تصدیق موصول ہوئی ہے۔
اپنے خطاب کے اختتام پر اسحاق ڈار نے سیاسی جماعتوں پر زور دیا کہ وہ دہشت گردی کے خلاف مشترکہ حکمتِ عملی اپنائیں اور خیبر پختونخوا کے عوام کے تحفظ کو ترجیح دیں۔ ان کا کہنا تھا کہ سیاسی مفاہمت اپنی جگہ اہم ہے، لیکن دہشت گردی کے مسئلے کو مزید مؤخر نہیں کیا جا سکتا۔
قبل ازیں پارلیمنٹ کے مشترکہ اجلاس کے آغاز میں صدر مملکت کی جانب سے خیبرپختونخوا میں ایمرجنسی کے نفاذ سے متعلق اعلان کے کاغذات آئین کے آرٹیکل 232 کی شق 7 کے تحت پیش کیے گئے جبکہ گورنر راج کے نفاذ سے متعلق دستاویزات آرٹیکل 234 کی شق 3 کے تحت ایوان کے سامنے رکھی گئیں۔
قرارداد پیش ہونے کے بعد اپوزیشن نے احتجاج کیا اور ارکان کی گنتی کرانے کا مطالبہ کیا۔ وفاقی وزیر قانون اعظم نذیر تارڑ نے کہا کہ اپوزیشن گنتی کا مطالبہ کر رہی ہے تو گنتی کرا دی جائے، جس کے بعد اسپیکر نے ارکان سے درخواست کی کہ جو قرار داد کے حق میں ہے وہ اپنی نشستوں سے کھڑے ہوجائیں اور پھر گنتی کی گئی تو قرارداد کے حق میں 214 اور مخالفت میں 56 ووٹ سامنے آئے۔
اجلاس کے آغاز پر اسپیکر ایاز صادق نے پشاور میں آج صبح اسکول کی چھت گرنے سے کے افسوس ناک واقعے کا ذکر کیا، جس میں 32 طلبہ اور 2 خاتون اساتذہ جاں بحق ہوگئیں، ایوان میں جاں بحق ہونے والوں کے لیے دعائے مغفرت کی گئی۔
قرارداد کی منظوری کے بعد اسپیکر نے ایوان میں بحث کا آغاز بھی کروا دیا۔
ریاستی معاملات آئین کے تحت چلائے جاتے ہیں، وزیر قانون
وفاقی وزیرقانون اعظم نذیرتارڑ نے بحث کا آغاز کرتے ہوئے کہا کہ خیبرپختونخوا کے معاملے پرپارلیمان کے دونوں ایوانوں میں بحث ہوئی، آئینی تقاضے کے مطابق معاملہ اب پارلیمنٹ کےمشترکہ اجلاس میں لایا گیا ہے۔
اعظم نذیر تارڑ کا کہنا تھا کہ خیبرپختونخوا کے انتظامی اورقانون سازی امورسے متعلق طریقہ کاردیا گیا ہے، ریاستی معاملات آئین کےتحت چلائے جاتے ہیں۔
انہوں نے کہا کہ اجلاس میں اپوزیشن کی جانب سے سوالات کے جوابات دیئے جائیں گے، کچھ حلقوں کی جانب سے حکومتی اقدام کو 12 اکتوبر سے جوڑا گیا ہے۔
اعظم نذیر تارڑ کا مزید کہنا تھا کہ اسلام آباد اور پشاور میں ایپکس کمیٹی کے اجلاس ہوتے رہے ہیں، ایک ہی روز میں لکی مروت، ٹانک اور باجوڑ میں دہشتگردی کے واقعات ہوئے، بحرانی وقت میں وزیراعلیٰ کو زخمیوں کے پاس اسپتال میں ہونا چاہیے تھا۔ایسے وقت میں ریاست کو ترجیح دے کر سیاست کو پیچھے رکھنا پڑتا ہے ۔
گورنر خیبرپختونخوا نے صدر کو تفصیلی خط کے ذریعے معاملات سے آگاہ کیا جس میں قومی سلامتی کی رپورٹس شامل تھیں ۔
وفاقی کابینہ نے وزیر اعظم کو ایمرجنسی اور گورنر راج کی تجویز دی، وزیراعظم نے منظوری کے بعد سمری وزیراعظم کو بھیجی، صدر مملکت نے اس رپورٹس کی روشنی میں ایمرجنسی کی منظوری دی ۔
انہوں نے مزید کہا کہ خیبرپختونخوا کو جی ڈی پی کا ایک فیصد دینے کا فیصلہ ہوا، رواں سال خیبرپختونخوا کو 13 ہزار ارب روپے دیے گئے ہیں ۔
جب تک سہیل آفریدی کا پتا نہیں چلے گا ہم کوئی مذاکرات نہیں کریں گے، محمود اچکزئی
اپوزیشن لیڈر محمود خان اچکزئی نے اپنے خطاب میں کہا کہ آئیں کل سے مذاکرات کریں، آئیں طے کریں کہ یہ ایوان آئین کے تحت چلے گا، آئین کو بالادستی دیں ہم آپ کے ساتھ ہیں ۔
محمود اچکزئی نے مزید کہا کہ افغان طالبان آپ کی پیداوار ہیں، انگریز بھی افغانستان پر اپنی مرضی چاہتا تھا، آپ بھی افغانستان میں اپنی مرضی چاہتے ہیں۔
انہوں نے سوال اٹھایا کہ دہشت گردوں نے 1200 قبائلی عمائدین ،علما، ملکان کو قتل کیا اس وقت آپ کی ایمرجنسی کہاں تھیں؟
انہوں نے چیلنج کیا کہ پشتون کو دہشت گرد ثابت کریں میں یہ کرسی چھوڑ دوں گا، پشتون کا قصور یہ ہے کہ وہ غلامی قبول کرنے کو تیار نہیں تھا۔
انہوں نے دو ٹوک الفاظ میں کہا کہ ”جب تک ہمارے وزیر اعلیٰ سہیل آفریدی کا پتا نہیں چلے گا ہم کوئی مذاکرات نہیں کریں گے۔“
محمود اچکزئی کا کہنا تھا کہ ایمل ولی خان کی طرف سے بھی کہنا چاہتا ہوں، مولانا فضل الرحمن ہمارے ساتھ ہوں گے، سندھ کے لوگ بھی ہمارے ساتھ ہوں گے ۔
انہوں نے الزام لگا یا کہ ہمارے پانیوں اور معدنیات پر قبضے کی کوشش ہورہی ہے ،ہم اپنی معدنیات اور پانیوں کا تحفظ کریں گے۔
کسی ایک صوبے کی اپنی الگ خارجہ پالیسی نہیں ہو سکتی، شیری رحمان
پیپلزپارٹی کی سینیٹر شیری رحمان نے اپوزیشن لیڈر کو مخاطب کرتے ہوئے اپنے خطاب میں کہا کہ مارشل لا کی بات نہ کریں، ہم سے پوچھیں کہ مارشل لا میں کیا ہوتا ہے، کتنی سختیاں جھیلنی پڑتی ہیں۔
پارلیمنٹ کے مشترکہ اجلاس میں اظہار خیال کرتے ہوئے ان کا کہنا تھا کہ پی ٹی آئی کی مرکزی قیادت مذاکرات میں شامل نہیں ہوئی، اسد قیصر اوربیرسٹر گوہر نے کہا کہ ہم دہشتگردی کے خلاف آپ کے ساتھ ہیں۔
انہوں نے کہا کہ اپوزیشن کے 5 میں سے 3 مطالبات ماننا آپ کی ہی فتح تھی۔اپوزیشن کی اپنی ہی قیادت نے اپنے نمائندوں کے پیروں تلے سے زمین کھینچی۔آپ کی قیادت نے مذاکرات کے بجائے لانگ مارچ کی بات کی، لانگ مارچ سے کوئی نہیں ڈرتا، کئی لانگ مارچز آئے اور چلے گئے، اپوزیشن کو دوسرے ملک سے ڈکٹیشن آ رہی تھی اور ہمیں اس کی آواز بھی آ رہی تھی۔
شیری رحمان کا مزید کہنا تھا کہ عمران خان کے علاج اور قانونی رسائی کے معاملے پر بات چیت ہو گئی تھی، مذاکراتی کمیٹی کے ہاتھ میں خود کوئی اختیار نہیں تھا، کسی ایک صوبے کی اپنی الگ خارجہ پالیسی نہیں ہو سکتی۔
پاک فوج ہماری ہے ہمارا جینا مرنا پاکستان میں ہے، بیرسٹر گوہر
چیئرمین پاکستان تحریک اںصاف (پی ٹی آئی) بیرسٹر گوہر نے اپنے خطاب میں کہا کہ ہم پر دہشت گردی کی پشت پناہی کا الزام لگایا گیا جسے میں مسترد کرتا ہوں۔
شہبازشریف کو مخاطب کرتے ہوئے انہوں نے کہا کہ ”وزیراعظم صاحب آپ نے ہمیں زخم دیا ہے، بین الاقوامی سطح پر اس بیان کے اثرات ہوں گے۔“
بیرسٹر گوہر کا کہنا تھا کہ پاک فوج ہماری ہے ہمارا جینا مرنا پاکستان میں ہے، آپ نے وفاق کو داؤ پر لگا دیا ہے،ہم دہشت گردی کی ہر شکل کی مذمت کرتے ہیں۔
انہوں نے مزید کہا کہ ایک ملاقات کے ڈر سے پوری حکومت ختم کردی، اگر ہم دہشت گردی کی پشت پناہی کر رہے ہیں تو ہمیں پھانسی دے دو اگر ہم اس ملک کے نہیں ہیں تو آج بتا دیں، ہماری نسلیں آپ کو معافی مانگنے پر مجبور کریں گی۔
بیرسٹر گوہر نے مزید کہا کہ ہم سب کچھ کرسکتے ہیں دہشت گردی کی پشت پناہی نہیں کر سکتے،جتنا جلدی الزام واپس لیں وہ بہتر ہے،ہم آپ کے ایمرجنسی، گورنر راج اور فوج بلانے کو مسترد کرتے ہیں،ہم وہ پاکستان بنائیں گے جس میں آپ کا علاج ہوگا۔
قبل ازیں اجلاس کے دوران وزیراعظم شہباز شریف نے اپوزیشن لیڈر محمود خان اچکزئی کی نشست پر جا کر ان سے ملاقات کی۔ دونوں کچھ دیر تک کھڑے ہوکر باتیں کرتے رہے۔ پھر وزیر اعظم کے ایوان سے جانے کے بعد وزیر دفاع خواجہ آصف نے بھی محمود خان اچکزئی سے ملاقات کی۔
قومی اسمبلی میں اے این پی کے سربراہ ایمل ولی خان کی چیئرمین پی پی پی بلاول بھٹو زرداری سے بھی ملاقات ہوئی،اس دوران ایمل ولی خان نے اپنے موبائل پر بلاول بھٹو زرداری کا نمبر ایڈ کروایا،بلاول بھٹو زرداری اور ایمل ولی خان کچھ دیر آپس میں باتیں کرتے رہے۔
نوٹ:مزید تفصیلات شامل کی جا رہی ہیں۔
