آئل اینڈ گیس ریگولیٹری اتھارٹی (اوگرا) نے 24 اکتوبر سے 26 اکتوبر 2026 تک کے لیے پیٹرولیم مصنوعات کی قیمتوں کا تعین کردیا۔
اوگرا کی جانب سے جاری نوٹیفکیشن کے مطابق ڈیزل کی فی لیٹر قیمت ایک روپے 91 پیسے اضافے کے بعد 393 روپے 66 پیسے ہوگئی ہے۔
دوسری جانب پیٹرول کی قیمت میں کوئی تبدیلی نہیں کی گئی اور اس کی فی لیٹر قیمت 377 روپے 71 پیسے برقرار رکھی گئی ہے۔
سب سے زیادہ پڑھی جانے والی
نوٹیفکیشن کے مطابق نئی قیمتوں کا اطلاق 24 اکتوبر سے 26 اکتوبر 2026 تک ہوگا، اس طرح اس مدت کے دوران پیٹرول استعمال کرنے والے صارفین کو فی لیٹر قیمت میں کوئی تبدیلی کا سامنا نہیں کرنا پڑے گا تاہم ڈیزل استعمال کرنے والوں کو فی لیٹر ایک روپے 91 پیسے اضافی ادا کرنا ہوں گے۔
ڈیزل کی قیمت میں اضافے سے ٹرانسپورٹ، مال برداری اور زرعی شعبے کے اخراجات متاثر ہونے کا امکان ہے، کیونکہ بسوں، ٹرکوں اور متعدد زرعی مشینوں میں ڈیزل استعمال ہوتا ہے۔
اس کے نتیجے میں اشیائے ضروریہ کی ترسیل کے اخراجات پر بھی اثر پڑ سکتا ہے، تاہم اس حوالے سے قیمتوں میں اضافے کا حتمی اثر دیگر عوامل پر منحصر ہوگا۔
واضح رہے کہ پاکستان میں پیٹرولیم مصنوعات کی قیمتوں کے تعین میں عالمی منڈی میں تیار شدہ پیٹرول اور ڈیزل کی قیمتیں، درآمدی اخراجات، پریمیم، فریٹ اور دیگر متعلقہ عوامل اہم کردار ادا کرتے ہیں۔
اوگرا کے مطابق قیمتوں میں ردوبدل عالمی مارکیٹ میں قیمتوں اوردیگر اخراجات میں تبدیلی کے مطابق کیا جاتا ہے، اس کے علاوہ روپے اور ڈالر کی شرح تبادلہ، حکومتی ٹیکس اور لیویز بھی صارفین کے لیے مقرر کردہ حتمی قیمت پر اثر انداز ہوتے ہیں۔
