وزیراعلیٰ پنجاب مریم نواز نے طلبہ کے لیے اعلیٰ تعلیم کے مواقع بڑھانے، میڈیکل تعلیم کو ان کی دہلیز تک پہنچانے کے لیے منڈی بہاءالدین میں رسول میڈیکل کالج قائم کرنے کا اعلان کردیا۔
یونیورسٹی آف رسول میں طلبہ سے خطاب کرتے ہوئے مریم نواز نے کہا کہ نئے میڈیکل کالج کے داخلے جنوری 2027 سے شروع ہوں گے جبکہ طلبہ کو الیکٹرک بائیکس کی فراہمی 5 نومبر2026 سے شروع کی جائے گی۔
انہوں نے کہا کہ حکومت یونیورسٹی آف ہیلتھ سائنسز سے منسلک جدید تدریسی اسپتال قائم کرنے کے لیے بھی کام کررہی ہے جس سے میڈیکل تعلیم اور علاج معالجے کی سہولیات کو فروغ ملے گا۔
سب سے زیادہ پڑھی جانے والی
وزیراعلیٰ نے بتایا کہ ان کے عہدہ سنبھالنے سے پہلے یونیورسٹی آف رسول میں طلبہ کی تعداد 149 تھی جو اب بڑھ کر تقریباً 3 ہزار ہوگئی ہے۔ ان کے مطابق یونیورسٹی میں نئے شعبے متعارف کرانے کے ساتھ اربوں روپے مالیت کا بنیادی ڈھانچہ بھی تیار کیا گیا ہے۔
نئے شعبوں میں سماجی علوم و انسانی علوم، لائف سائنسز، بزنس مینجمنٹ، میڈیکل و ہیلتھ سائنسز، انجینئرنگ و ٹیکنالوجی اور کمپیوٹر سائنسز شامل ہیں۔ مریم نواز نے کہا کہ ان اقدامات کا مقصد منڈی بہاءالدین اور قریبی علاقوں کے طلبہ کو اپنے گھروں کے قریب اعلیٰ تعلیم کے مواقع فراہم کرنا ہے۔
میرٹ پر لیپ ٹاپ اور اسکالرشپس کی تقسیم
یونیورسٹی، نرسنگ اور میڈیکل کالجوں کے طلبہ میں لیپ ٹاپ اور ہونہار اسکالرشپس کے چیک تقسیم کرتے ہوئے انہوں نے کہا کہ مالی معاونت طلبہ کا حق ہے حکومت کا احسان نہیں اور لیپ ٹاپ و اسکالرشپس کی تقسیم میں صرف میرٹ کو معیار بنایا جائے گا۔
مریم نواز نے کہا کہ کسی کی سیاسی وابستگی، ذاتی اثرورسوخ یا سفارش کی بنیاد پر تعلیمی سہولتیں نہیں دی جانی چاہئیں۔ انہوں نے طلبہ پر زور دیا کہ وہ ان مواقع سے فائدہ اٹھا کر ڈاکٹر، انجینئر، اساتذہ، سرکاری افسر اور ملک کے مستقبل کے رہنما بنیں۔
انہوں نے کہا کہ پاکستان کی 68 فیصد سے زیادہ آبادی 30 سال سے کم عمر افراد پر مشتمل ہے، اس لیے نوجوانوں کی تعلیم اور ترقی کے مواقع میں سرمایہ کاری ضروری ہے۔
طلبہ میں الیکٹرک بائیکس کی تقسیم 5 نومبر سے
مریم نواز نے اعلان کیا کہ پنجاب بھر میں طلبہ کو الیکٹرک بائیکس دینے کا عمل 5 نومبر سے شروع ہوگا۔ طالبات کو گلابی جبکہ طلبہ کو سیاہ رنگ کی بائیکس فراہم کی جائیں گی۔
ان کے مطابق اس اقدام کا مقصد طلبہ کو تعلیمی اداروں اور کام کی جگہوں تک آمدورفت میں سہولت دینا اور خاندانوں پر سفری اخراجات کا بوجھ کم کرنا ہے۔ وزیراعلیٰ پہلے بھی صوبائی یوتھ اقدام کے تحت ایک لاکھ الیکٹرک بائیکس تقسیم کرنے کا اعلان کرچکی ہیں۔
بااثر ملزمان کے خلاف کارروائی کا عزم
وزیراعلیٰ نے کہا کہ قانون سب کے لیے برابر ہونا چاہیے اور دولت یا سیاسی اثرورسوخ کی بنیاد پر کسی کو استثنیٰ نہیں ملنا چاہیے۔ انہوں نے لاہور میں خاتون اسکوٹر سوار پر مبینہ تشدد، پیٹرول پمپ ملازم کو تھپڑ مارنے اور ملتان میں 15 سالہ یتیم لڑکے کی گاڑی تلے آکر ہلاکت کے واقعات کا حوالہ دیا۔
مریم نواز نے کہا کہ خواتین، بچوں اور کمزور شہریوں کا تحفظ ریاست کی ذمہ داری ہے۔ انہوں نے ضمانت پر رہائی سے متعلق تحفظات چیف جسٹس پاکستان اور چیف جسٹس لاہور ہائی کورٹ کے سامنے اٹھانے کے ارادے کا اظہار بھی کیا۔
انہوں نے متاثرین پر زور دیا کہ وہ تشدد اور بدسلوکی کے واقعات رپورٹ کریں، حکومت اور پولیس ان کا ساتھ دیں گی۔ ان کا کہنا تھا کہ کسی غریب شہری کی عزت نفس مجروح نہیں ہونی چاہیے۔
منڈی بہاءالدین کے ترقیاتی منصوبے
مریم نواز نے منڈی بہاءالدین میں سڑکوں کی بہتری، گرین بسوں، بس اسٹاپس، تجارتی مراکز، نئی مارکیٹ، فوڈ اسٹریٹ اور پارکس سمیت ترقیاتی منصوبوں کا ذکر کیا۔ انہوں نے کہا کہ حکومت کا مقصد عوام کو بہتر سفری، تجارتی اور تفریحی سہولتیں فراہم کرنا ہے۔
وزیراعلیٰ نے بے گھر افراد کو اپنی چھت اپنا گھر اسکیم میں درخواست دینے کی ہدایت کرتے ہوئے دعویٰ کیا کہ ڈھائی سال میں ڈھائی لاکھ گھر تعمیر کیے گئے ہیں۔ انہوں نے2 ایسے طلبہ کو بھی گھر فراہم کرنے کا وعدہ کیا جنہوں نے محنت کے باوجود اپنے گھر نہ ہونے کی شکایت کی تھی۔
مریم نواز نے نوجوانوں سے پاکستان کے ساتھ وفاداری کا عہد لینے کے ساتھ کہا کہ انہیں احتجاج، توڑ پھوڑ اور تشدد کے بجائے تعلیم، اسکالرشپس، لیپ ٹاپ اور بہتر مستقبل کے مواقع ملنے چاہئیں۔ انہوں نے طلبہ پر زور دیا کہ وہ محنت کریں اور ملک کی ترقی میں اپنا کردار ادا کریں۔
