چیئرمین پیپلز پارٹی بلاول بھٹو زرداری نے پاکستان تحریک انصاف (پی ٹی آئی) سمیت اپوزیشن جماعتوں کو مخاطب کرتے ہوئے کہا ہے کہ اگر ملک میں دہشت گردی کے خاتمے کے لیے ایک ’متفقہ پلان‘ بنالیں تو ہم خیبرپختونخوا سے ایمرجنسی ختم کرسکتے ہیں۔
وہ سانحہ کارساز کی برسی کے موقع پر کراچی میں جائے حادثہ پر میڈیا سے گفتگو کررہے تھے۔
بلاول بھٹو کا یہ بیان خیبرپختونخوا میں ایمرجنسی اور گورنر راج کے ایک ہفتے بعد سامنے آیا ہے۔ وفاقی حکومت کی جانب سے یہ اقدام اس جواز کے ساتھ کیا گیا تھا کہ خیبرپختونخوا حکومت دہشت گردی کے خلاف جنگ سے ’دانستہ طور پر لاتعلق‘ ہے۔ یہ پیش رفت تحریک انصاف کی جانب سے اپنے جیل میں قید بانی عمران خان کی رہائی کے مطالبے پر اسلام آباد مارچ کے بعد سامنے آئی تھی۔
بلاول بھٹو نے میڈیا سے گفتگو میں کہا کہ ملک اس نہج پر پہنچ چکا ہے جہاں ”خیبر سے خضدار تک دہشت گرد حملے ہو رہے ہیں۔“
سب سے زیادہ پڑھی جانے والی
انہوں نے افسوس کا اظہار کرتے ہوئے کہا کہ 2021 میں کابل میں حکومت کی تبدیلی کے بعد پاکستان کی اُس وقت کی حکومت نے ”افغانستان میں موجود دہشت گردوں کو بھی واپس بلا کر ہمارے سوات، ملاکنڈ اور سابق قبائلی علاقوں میں آباد کرنے کا فیصلہ کیا۔“
بلاول کا اشارہ سابق وزیر اعظم عمران خان کے ان منصوبوں کی جانب تھا جن کے تحت تحریک طالبان پاکستان (ٹی ٹی پی) کے ارکان کو ملک میں دوبارہ آباد کیا جانا تھا۔
بلاول نے مزید کہا کہ پاکستان میں جیلوں میں قید دہشت گردوں کو بھی رہا کر دیا گیا تھا۔
انہوں نے کہا، ”آج پاکستان کو ان غلط فیصلوں کے نتائج بھگتنا پڑ رہے ہیں۔“
انہوں نے کہا کہ پیپلزپارٹی کے کارکنوں نے بہادری سے دہشت گردی کا مقابلہ کیا اور اسے اپنی ذمہ داری سمجھا۔ ملک کی سلامتی کے لیے ہماری بہادر افواج قربانیاں دے رہی ہیں، جبکہ دہشت گردی کے خلاف جنگ میں فوج، پولیس اور عوام سمیت ہر طبقے کے لوگ شہید ہوئے ہیں۔
واضح رہے کہ 18 اکتوبر 2007 کو کراچی میں بے نظیر بھٹو کی وطن واپسی کے جلوس پر دو خودکش حملے ہوئے تھے، جن میں 180 سے زائد افراد جاں بحق ہوئے۔
’سہیل آفریدی دہشتگردوں کا مقابلہ نہیں کرسکتے تو پیپلزپارٹی کرے گی‘
بلاول بھٹو نے اعلان کیا کہ دہشت گردوں کے خلاف جنگ جاری رہے گی اور ہم متحد ہوکر ان کا مقابلہ کریں گے۔ خیبرپختونخوا میں دہشت گردی کے واقعات ہو رہے ہیں جبکہ کچھ قوتیں سوات میں پاکستان کا جھنڈا اتارنا چاہتی ہیں، لیکن پاکستان کے کسی بھی حصے سے قومی پرچم اتارنے کی اجازت نہیں دی جائے گی۔
انہوں نے کہا کہ سہیل آفریدی دہشت گردوں کا مقابلہ کرنے کے لیے تیار نہیں تو پیپلزپارٹی یہ ذمہ داری ادا کرے گی۔
چیئرمین پیپلز پارٹی نے واضح کیا کہ ملک میں کسی کو انتشار پھیلانے کی اجازت نہیں دیں گے۔ جبکہ احتجاجی سیاست ملک کی ترقی کی راہ میں بڑی رکاوٹ ہے اور پاکستان اس وقت تاریخی معاشی بحران سے گزر رہا ہے۔ جمہوری نظام میں بہتری کی ضرورت ہوتی ہے، تاہم نقصان اس وقت ہوتا ہے جب دہشت گردی کے خطرے کو سنجیدگی سے نہیں لیا جاتا۔
انہوں نے اس عزم کا اظہار کیا کہ ملک کو دہشت گردوں سے پاک کرکے رہیں گے اور قومی سلامتی کے لیے تمام قوتوں کو مل کر دہشت گردی کا مقابلہ کرنا ہو گا۔ تاہم ایسا لگ رہا ہے کہ حالات بہتر ہونے کے بجائے مزید خراب ہوں گے۔
’مولانا فضل الرحمان چاہیں تو ایمرجنسی ختم کرانے میں کردار ادا کرسکتے ہیں‘
ایک سوال کے جواب میں بلاول بھٹو زرداری نے کہا کہ مولانا فضل الرحمان کا بحیثیت اپوزیشن رکن حکومت پر تنقید کرنے کا حق ہے جبکہ پیپلز پارٹی نے آئینی اور قانونی طریقے سے دہشت گردی کا مقابلہ کرنے کے لیے ایمرجنسی لگائی ہے۔
انہوں نے کہا کہ مولانا فضل الرحمان اور ان کی پارٹی نے دہشت گردی میں نقصان اٹھایا ہے اور وہ دہشت گردی کے خلاف ہمارا ساتھ دیتے تو ٹھیک رہتا، مولانا فضل الرحمان اگر چاہیں تو ایمرجنسی ختم کرنے میں اپنا کردار ادا کر سکتے ہیں۔
’سیاسی پیش رفت کیلئے کمپرومائز ضروری ہے‘
بلاول بھٹو زرداری نے کہا کہ بڑی اصلاحات کے لیے کمپرومائز (سمجھوتا) ضروری ہوتا ہے۔ انہوں نے اٹھارہویں آئینی ترمیم اور ایک فوجی حکمران کو اقتدار سے ہٹانے کو اس کی مثالیں قرار دیا۔
انہوں نے کہا، ”سمجھوتا کوئی بری چیز نہیں۔ سیاست اور سمجھوتا ساتھ ساتھ چلتے ہیں۔“ ان کا کہنا تھا کہ بے نظیر بھٹو نے بھی سمجھوتے کیے تھے اور تبدیلی لانے کے لیے بعض اوقات مشکل فیصلے کرنا اور سیاسی مفاہمت اختیار کرنا ضروری ہوتا ہے۔
بلاول بھٹو زرداری کا کہنا تھا کہ ”ہم نے سمجھوتے کے ذریعے ایک آمر کو وردی اتارنے پر مجبور کیا۔ اٹھارہویں آئینی ترمیم بھی سمجھوتے کے ذریعے متعارف کرائی گئی تھی۔“
انہوں نے کہا کہ پیپلز پارٹی وفاقی حکومت کا حصہ نہیں ہے، بلکہ اپنے سیاسی دائرے میں رہتے ہوئے سیاست کر رہی ہے اور اپنے کارکنوں اور عوام کے لیے کام کر رہی ہے۔
’گلگت بلتستان کو صوبہ بنانے پر اتفاق ہے تو بنادیں‘
بلاول بھٹو زرداری نے کہا کہ ”اگر گلگت بلتستان کو صوبہ بنانے پر اتفاقِ رائے ہے تو اسے صوبہ بنا دیں۔“
انہوں نے کہا کہ جہاں اتفاقِ رائے موجود ہو وہاں نئے صوبے بنائے جا سکتے ہیں۔ آئین میں نئے صوبوں کے قیام کے لیے واضح طریقۂ کار موجود ہے، جس کے تحت متعلقہ صوبائی اسمبلیوں سے قراردادوں کی منظوری بھی ضروری ہے۔
