حکومت نے تین دن کے لیے پیٹرولیم مصنوعات کی نئی قیمتوں کا اعلان کر دیا۔
وفاقی حکومت نے پیٹرولیم مصنوعات کی قیمتوں میں ردوبدل کرتے ہوئے پیٹرول کی قیمت میں 3 روپے 93 پیسے فی لیٹر کمی کر دی، جبکہ ہائی اسپیڈ ڈیزل کی قیمت برقرار رکھی گئی ہے۔
وزارتِ توانائی کے پیٹرولیم ڈویژن کی جانب سے 16 اکتوبر 2026 کو جاری کیے گئے اعلامیہ کے مطابق نئی قیمتوں کا اطلاق 17 اکتوبر سے 19 اکتوبر 2026 تک ہوگا۔
مزید پڑھیں
نوٹیفکیشن کے مطابق پیٹرول کی قیمت 390 روپے 23 پیسے فی لیٹر سے کم ہو کر 386 روپے 30 پیسے فی لیٹر ہوگئی ہے۔دوسری جانب ہائی اسپیڈ ڈیزل کی قیمت 396 روپے 96 پیسے فی لیٹر پر برقرار رکھی گئی ہے۔
وزارتِ توانائی کے مطابق پیٹرولیم مصنوعات کی قیمتوں میں ردوبدل عالمی حالات، بین الاقوامی مارکیٹ میں پیٹرولیم مصنوعات کی قیمتوں، پریمیم اور دیگر اخراجات کو مدنظر رکھتے ہوئے کیا گیا ہے۔
عالمی مارکیٹ میں خام تیل کی قیمتیں
پاکستان میں پیٹرولیم مصنوعات کی قیمتوں میں ردوبدل کا تعلق عالمی منڈی میں خام تیل کی قیمتوں، تیار شدہ پیٹرولیم مصنوعات کے نرخوں، درآمدی اخراجات، پریمیم اور دیگر متعلقہ عوامل سے ہوتا ہے۔
پاکستان میں قیمتوں کا تعین کرتے وقت صرف خام تیل کی قیمت نہیں بلکہ عالمی منڈی میں پیٹرول اور ڈیزل کی قیمتوں میں تبدیلی بھی اہم کردار ادا کرتی ہے۔
عالمی سطح پر تیل کی قیمتوں پر عموماً خام تیل کی پیداوار، بڑے تیل پیدا کرنے والے ممالک کے فیصلوں، مشرقِ وسطیٰ کی صورتِ حال، عالمی طلب، رسد اور امریکی ڈالر کی قدر جیسے عوامل اثر انداز ہوتے ہیں۔
رائٹرز کے مطابق عالمی منڈی میں خام تیل کی قیمتیں جمعے کو کچھ کم ہوئیں تاہم ہفتہ وار بنیاد پر اضافے کی جانب گامزن رہیں، مشرقِ وسطیٰ میں تیل کی سپلائی متاثر ہونے کے خدشات اور امریکا میں خام تیل کے ذخائر میں توقع سے زیادہ کمی نے قیمتوں کو سہارا دیا۔
