آئل اینڈ گیس ریگولیٹری اتھارٹی (اوگرا) نے 15 اکتوبر کے لیے پیٹرولیم مصنوعات کی قیمتوں میں ردوبدل کا نوٹیفکیشن جاری کر دیا۔
نوٹیفکیشن کے مطابق پیٹرول کی قیمت میں ایک روپے 20 پیسے فی لیٹر اضافہ جبکہ ڈیزل کی قیمت میں 17 پیسے فی لیٹر کمی کردی گئی ہے، نئی قیمتوں کے مطابق پیٹرول 393 روپے 86 پیسے فی لیٹر دستیاب ہو گا۔
دوسری جانب ڈیزل کی قیمت میں معمولی کمی کی گئی ہے، نوٹیفکیشن کے مطابق ڈیزل کی فی لیٹر قیمت 17 پیسے کم ہونے کے بعد 396 روپے 65 پیسے ہو گئی ہے۔
سب سے زیادہ پڑھی جانے والی
پیٹرول اور ڈیزل کی قیمتوں میں تبدیلی سے صارفین کے اخراجات پر مختلف اثرات مرتب ہوں گے۔
پیٹرول کی قیمت میں اضافے سے موٹر سائیکلوں، گاڑیوں اور دیگر پیٹرول سے چلنے والی سواریوں کے استعمال کے اخراجات بڑھیں گے، جبکہ ڈیزل کی قیمت میں کمی سے ڈیزل استعمال کرنے والے صارفین کو معمولی ریلیف ملے گا۔
واضح رہے کہ پیٹرولیم مصنوعات کی قیمتوں میں ردوبدل کا نوٹیفکیشن اوگرا کی جانب سے جاری کیا گیا ہے، جس کے تحت 15 اکتوبر سے نئی قیمتیں نافذ العمل ہوں گی۔
پاکستان میں پیٹرولیم مصنوعات کی قیمتوں کے تعین میں عالمی منڈی میں تیار شدہ پیٹرول اور ڈیزل کی قیمتیں، درآمدی اخراجات، پریمیم، فریٹ اور دیگر متعلقہ عوامل اہم کردار ادا کرتے ہیں۔
اوگرا کے مطابق قیمتوں میں ردوبدل عالمی مارکیٹ میں قیمتوں اور دیگر اخراجات میں تبدیلی کے مطابق کیا جاتا ہے، اس کے علاوہ روپے اور ڈالر کی شرح تبادلہ، حکومتی ٹیکس اور لیویز بھی صارفین کے لیے مقرر کردہ حتمی قیمت پر اثر انداز ہوتے ہیں۔
اسی وجہ سے عالمی منڈی میں خام تیل کی قیمت میں کمی کا مطلب یہ نہیں کہ پاکستان میں پیٹرول اور ڈیزل کی قیمتیں لازماً اسی تناسب سے کم ہوں گی۔ مقامی قیمتوں کا انحصار درآمد کیے جانے والے تیار شدہ ایندھن کی قیمت اور دیگر متعلقہ اخراجات پر بھی ہوتا ہے۔
