کوہاٹ اور ملا کنڈ تعلیمی بورڈ آف انٹرمیڈیٹ اینڈ سیکنڈری ایجوکیشن نے انٹرمیڈیٹ سالانہ امتحانات 2026 کے نتائج کا اعلان کردیا۔
آکسفورڈ سائنس اسکول اینڈ کالج کرک کی طالبہ ہدیہ طارق نے 1142 نمبر حاصل کرکے مجموعی طور پر پہلی پوزیشن حاصل کرلی۔
کوہاٹ بورڈ کے جاری کردہ نتائج کے مطابق کیڈٹ کالج کوہاٹ کے طالب علم محمد ولید یوسف نے 1136 نمبر حاصل کرکے دوسری پوزیشن حاصل کی جبکہ اسی ادارے کے محمد ثعبان نے 1132 نمبرلے کرتیسری پوزیشن حاصل کی۔
سب سے زیادہ پڑھی جانے والی
پری انجینئرنگ گروپ میں کیڈٹ کالج کوہاٹ کے طالب علم محمد ہابیل اورعمرزاہد خان نے 1122، 1122 نمبر حاصل کرکے مشترکہ طور پر پہلی پوزیشن حاصل کی۔
جنرل سائنس گروپ میں کیڈٹ کالج کوہاٹ کے محمد ولید یوسف نے 1136 نمبرحاصل کرکے پہلی پوزیشن اپنے نام کی۔
بورڈ کے مطابق انٹرمیڈیٹ سالانہ امتحانات 2026 میں مجموعی طور پر 54 ہزار 224 طلبا و طالبات نے حصہ لیا، جن میں سے 15 ہزار 862 امیدوار کامیاب قرار پائے۔
کوہاٹ بورڈ کے انٹرمیڈیٹ امتحانات کا مجموعی کامیابی کا تناسب 29.25 فیصد رہا۔
نتائج کے اعلان کے موقع پر پوزیشن ہولڈرز طلبا و طالبات کی کامیابی کو نمایاں کیا گیا جبکہ کامیاب امیدواروں کو مبارکباد بھی دی گئی،بورڈ کے مطابق طلبا اپنے نتائج متعلقہ تعلیمی بورڈ کے جاری کردہ طریقہ کار کے تحت چیک کرسکتے ہیں۔
دوسری جانب ملاکنڈ تعلیمی بورڈ نے انٹرمیڈیٹ کے سالانہ امتحانات کے نتائج کا اعلان کردیا، نجی کالجز کی طالبات نے نمایاں کارکردگی کا مظاہرہ کرتے ہوئے بیشتر پوزیشنز اپنے نام کرلیں۔
ملاکنڈ بورڈ کا بھی انٹرمیڈیٹ سالانہ امتحانات کے نتائج کا اعلان
ملاکنڈ بورڈ کے نتائج کے مطابق مجموعی طور پر 12 پوزیشن ہولڈرز میں 10 طالبات جبکہ 2 طلبہ شامل ہیں، نجی کالج کی طالبہ ایمنہ ملک نے 1133 نمبر حاصل کرکے پہلی پوزیشن حاصل کی۔
نتائج کے مطابق نجی کالج ہی کے ایک طالب علم نے 1132 نمبر حاصل کرکے دوسری پوزیشن اپنے نام کی، اسی طرح نجی کالج کی طالبہ سلوٰی اقبال نے 1118 نمبر حاصل کرکے تیسری پوزیشن حاصل کی۔
ملاکنڈ تعلیمی بورڈ کے انٹرمیڈیٹ سالانہ امتحانات کے نتائج کے اعلان کے بعد پوزیشن ہولڈرز کے نام سامنے آگئے۔ نتائج میں طالبات کی نمایاں کامیابی خاص طور پر توجہ کا مرکز رہی، جہاں 12 میں سے 10 پوزیشنز طالبات نے حاصل کیں۔
بورڈ حکام کی جانب سے پوزیشن ہولڈرز کو کامیابی پر مبارکباد پیش کی گئی جبکہ طلبا و طالبات نے نتائج پر خوشی کا اظہار کیا۔ تعلیمی اداروں کی انتظامیہ نے بھی نمایاں پوزیشن حاصل کرنے والے طلبا و طالبات کی کارکردگی کو سراہا۔
ملاکنڈ بورڈ کے تحت انٹرمیڈیٹ کے سالانہ امتحانات میں شریک امیدوار اپنے نتائج بورڈ کے مقررہ طریقہ کار کے مطابق چیک کرسکتے ہیں۔
