چائنا مینڈ اسپیس ایجنسی نے اعلان کیا ہے کہ شینژو 21 مشن کے تین خلا باز 210 دن خلا میں گزارنے کے بعد بحفاظت زمین پر واپس آ گئے ہیں، جو چین کے خلائی اسٹیشن پر کسی ایک عملے کا طویل ترین قیام ہے۔
خلاباز ژانگ لو، وو فی اور ژانگ ہونگ ژانگ جمعہ کی شام شینژو 22 خلائی جہاز کے ذریعے زمین پر اترے۔ حکام کے مطابق تینوں خلا باز مکمل طور پر صحت مند ہیں اور مشن کو کامیاب قرار دیا گیا ہے۔
خلائی جہاز کا ریٹرن کیپسول اندرونی منگولیا کے ڈونگ فینگ لینڈنگ سائٹ پر کامیابی سے اترا، جبکہ تمام خلا باز محفوظ طریقے سے کیپسول سے باہر آ گئے۔
مشن کمانڈر ژانگ لو نے کامیاب واپسی پر اظہار خیال کرتے ہوئے کہا کہ یہ کامیابی ٹیم ورک اور ریاستی حمایت کا نتیجہ ہے۔ انہوں نے اپنے ساتھ ایک سیب بھی زمین پر واپس لایا، جو انہوں نے سائنسی کارکنوں کو خراجِ تحسین پیش کرنے کے لیے محفوظ رکھا تھا۔
210 دن کے اس مشن کے دوران خلا بازوں نے متعدد اہم سائنسی تجربات کیے، جن میں مائیکرو گریوٹی میں فزکس، خلائی طب، اور نئی ٹیکنالوجیز پر تحقیق شامل ہے۔ پہلی بار چین کے خلائی اسٹیشن پر چوہوں کی افزائش، چیری ٹماٹر اور گندم کی کاشت بھی کامیابی سے کی گئی۔
اس کے علاوہ عملے نے تین خلائی چہل قدمیاں کیں اور خلائی ملبے سے بچاؤ کے آلات کی تنصیب سمیت کئی تکنیکی کام انجام دیے۔
