ملتان: کوٹ رب نواز کے قریب باراتیوں کی کوسٹر تیز رفتار کار سوار کو بچاتے ہوئے الٹ گئی، حادثے میں 25 افراد زخمی ہوگئے۔
ہم نیوز کے مطابق ریسکیو ملتان کے ترجمان کا کہنا تھا کہ باراتیوں کو لے کر جانے والی کوسٹر ملتان سے میلسی کی جانب جارہی تھی۔
باراتی شادی کی تقریب میں شرکت کے بعد واپس میلسی جارہے تھے کہ کوٹ رب نواز کے قریب اچانک ایک کار سڑک پر آگئی۔
سب سے زیادہ پڑھی جانے والی
ترجمان کے مطابق کوسٹر کے ڈرائیور نے کار سوار کو بچانے کی کوشش کی، تاہم تیز رفتاری کے باعث کوسٹر بے قابو ہوکر سڑک پر الٹ گئی، حادثے کے نتیجے میں کوسٹر میں سوار متعدد باراتی زخمی ہوگئے۔
4 زخمی نشتر اسپتال منتقل
ریسکیو حکام کے مطابق حادثے کی اطلاع ملتے ہی امدادی ٹیمیں موقع پر پہنچ گئیں اورزخمیوں کو فوری طبی امداد فراہم کی، حادثے میں زخمی ہونے والے 4 باراتیوں کو تشویشناک حالت کے پیش نظر نشتراسپتال منتقل کردیا گیا۔
ترجمان ریسکیو ملتان نے بتایا کہ حادثے میں زخمی ہونے والے دیگر 21 باراتیوں کو موقع پر ہی طبی امداد فراہم کی گئی، ان کی حالت کے حوالے سے مزید تفصیلات سامنے نہیں آئیں۔
حادثے کی وجہ کیا بنی؟
ریسکیو ترجمان کے مطابق ابتدائی طور پرحادثے کی وجہ تیز رفتار کوسٹر کا کار سوار کو بچانے کی کوشش کرنا بنی۔ کوسٹر ملتان سے میلسی جارہی تھی اور اس میں شادی کی تقریب سے واپس آنے والے باراتی سوار تھے۔
حادثے کے بعد امدادی کارروائی مکمل کی گئی جبکہ متعلقہ اداروں کی جانب سے واقعے کی مزید تفصیلات بھی جمع کی جارہی ہیں۔
