سعودی عرب کے شہر الاحساء میں دو گاڑیوں کے درمیان خوفناک تصادم کے نتیجے میں ایک ہی خاندان کے 7 افراد سمیت 9 افراد جاں بحق ہوگئے۔
سعودی پریس ایجنسی (SPA) کے مطابق الاحساء میں پیش آنے والے افسوسناک ٹریفک حادثے میں ایک ہی خاندان کے 7 افراد جان کی بازی ہار گئے۔ جاں بحق ہونے والوں میں والدین اور ان کے 5 بچے شامل ہیں۔
حادثے کے نتیجے میں دوسری گاڑی میں سوار 2 نوجوان بھی شدید زخمی ہوئے تاہم وہ جانبر نہ ہوسکے اور موقع پر ہی دم توڑ گئے۔
سب سے زیادہ پڑھی جانے والی
حادثے کی اطلاع ملتے ہی امدادی ٹیمیں جائے وقوعہ پر پہنچ گئیں اور دونوں گاڑیوں میں پھنسے افراد کو نکالنے کے لیے کارروائی شروع کی۔
امدادی اہلکاروں نے گاڑیوں کو کاٹ کر متاثرین کو باہر نکالا، تاہم تمام متاثرین اس وقت تک جاں بحق ہوچکے تھے۔
حادثے کے باعث علاقے میں خوف و ہراس پھیل گیا جبکہ واقعے کی اطلاع ملنے پر متعلقہ حکام نے بھی کارروائی شروع کردی۔
حادثے کی وجوہات جاننے کے لیے تحقیقات جاری ہیں، تاہم ابتدائی طور پر دو گاڑیوں کے درمیان شدید ٹکر کو حادثے کی وجہ قرار دیا جا رہا ہے۔
افسوسناک حادثے میں ایک ہی خاندان کے 7 افراد کی موت نے علاقے میں غم کی فضا پیدا کردی، جبکہ جاں بحق افراد کے اہلخانہ اور عزیز و اقارب شدید صدمے سے دوچار ہیں۔
