پیٹرولیم ڈویژن نے 10 ستمبر سے پیٹرولیم مصنوعات کی نئی قیمتوں کا نوٹیفکیشن جاری کردیا، جس کے مطابق پیٹرول اور ہائی اسپیڈ ڈیزل کی قیمتوں میں اضافہ کیا گیا ہے۔
نوٹیفکیشن کے مطابق پیٹرول کی قیمت میں 3 روپے 40 پیسے فی لیٹر اضافہ کیا گیا ہے، جس کے بعد پیٹرول کی نئی قیمت 367 روپے 75 پیسے فی لیٹر مقرر کردی گئی ہے۔ اس سے قبل پیٹرول کی قیمت 364 روپے 35 پیسے فی لیٹر تھی۔
ہائی اسپیڈ ڈیزل کی قیمت میں 6 روپے 72 پیسے فی لیٹر اضافہ کیا گیا ہے، جس کے بعد ڈیزل کی نئی قیمت 392 روپے 67 پیسے فی لیٹر ہوگئی ہے۔ اس سے قبل ڈیزل کی قیمت 385 روپے 95 پیسے فی لیٹر تھی۔
سب سے زیادہ پڑھی جانے والی
پیٹرولیم ڈویژن کی جانب سے جاری نوٹیفکیشن کے مطابق نئی قیمتوں کا اطلاق 10 ستمبر سے ہوگا۔ قیمتوں میں اضافے کے بعد ملک بھر میں پیٹرول اور ڈیزل کی قیمتیں ایک مرتبہ پھر بڑھ گئی ہیں۔
پیٹرول کی قیمت میں اضافے کا براہ راست اثر موٹر سائیکلوں، گاڑیوں اور دیگر ٹرانسپورٹ کے اخراجات پر پڑے گا، جبکہ ڈیزل مہنگا ہونے سے مال بردار گاڑیوں، پبلک ٹرانسپورٹ اور زرعی شعبے کے اخراجات بھی بڑھ سکتے ہیں۔
حکومت کی جانب سے پیٹرولیم مصنوعات کی قیمتوں کا تعین عالمی منڈی میں خام تیل کی قیمتوں، روپے کی قدر اور دیگر متعلقہ عوامل کو مدنظر رکھتے ہوئے کیا جاتا ہے۔
نئی قیمتوں کے نفاذ کے بعد شہریوں نے پیٹرولیم مصنوعات کی قیمتوں میں اضافے پر تشویش کا اظہار کیا ہے۔
