دبئی: ویمن ایشیا کپ 2026 میں پاکستان نے شاندار کارکردگی کا مظاہرہ کرتے ہوئے ہانگ کانگ کو 72 رنز سے شکست دے کر سیمی فائنل کے لیے کوالیفائی کرلیا۔
پاکستان نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 143 رنز بنائے، جواب میں ہانگ کانگ کی پوری ٹیم 19 اوورز میں 71 رنز پر آؤٹ ہوگئی۔
پاکستان کی فتح میں نَشرا سندھو کی شاندار باؤلنگ نے اہم کردار ادا کیا، جنہوں نے صرف 7 رنز دے کر 6 وکٹیں حاصل کیں اور پلیئر آف دی میچ قرار پائیں۔
پاکستان کی جانب سے شوال ذوالفقار نے سب سے زیادہ 47 رنز کی اننگز کھیلی، انہوں نے 35 گیندوں پر 6 چوکے لگائے۔
سب سے زیادہ پڑھی جانے والی
عائشہ ظفر نے 19 گیندوں پر 26 رنز بنائے، جبکہ کپتان فاطمہ ثنا 24 رنز کے ساتھ ناٹ آؤٹ رہیں، توبہ حسن نے 14 اور نَشرا سندھو نے 3 رنز بنائے۔
144 رنزکے ہدف کے تعاقب میں ہانگ کانگ کی ٹیم پاکستانی باؤلرز کے سامنے بے بس نظر آئی، کاری چان 30 رنز کے ساتھ نمایاں رہیں، جبکہ یاسمین داسوانی نے 13 رنز بنائے۔
دیگر بیٹرز خاطر خواہ مزاحمت نہ کرسکیں اور پوری ٹیم 71 رنز پر پویلین لوٹ گئی۔
نَشرہ سندھو نے 4 اوورز میں صرف 7 رنز دے کر 6 وکٹیں حاصل کیں، فاطمہ ثنا، سعدیہ اقبال اور اُمِ ہانی نے بھی ایک، ایک وکٹ حاصل کی۔
خیال رہے کہ پاکستان ویمن ٹیم نے ایشیا کپ کے پہلے میچ میں تھائی لینڈ کوشکست دی تھی جبکہ دوسرے میچ میں روایتی حریف بھارت نے قومی ٹیم کو 7 وکٹوں سے شکست دی تھی۔
