اسلام آباد: پاکستان انسٹیٹیوٹ آف میڈیکل سائینسز (پمز) اسپتال میں آتشزدگی کے واقعے کی تحقیقات کے لیے انکوائری کمیٹی کے قیام کا نوٹیفکیشن جاری کر دیا گیا۔
نوٹیفکیشن کے مطابق ریٹائرڈ وفاقی سیکرٹری شاہد خان کو انکوائری کمیٹی کا چیئرمین مقرر کیا گیا ہے، جبکہ میجر جنرل ریٹائرڈ ڈاکٹر خورشید اترا، ڈاکٹر نبیل اعوان اور ڈپٹی کمشنر اسلام آباد کمیٹی کے رکن ہوں گے۔
کمیٹی پمز اسپتال میں آگ لگنے کی وجوہات اور واقعے کی مکمل ٹائم لائن کا تعین کرے گی۔ جبکہ اسپتال عملے، فائر بریگیڈ اور ریسکیو اداروں کے ہنگامی ردعمل اور امدادی کارروائیوں کا بھی جائزہ لیا جائے گا۔
سب سے زیادہ پڑھی جانے والی
کمیٹی نومولود اور ہائی رسک بچوں کے انخلا سے متعلق ایس او پیز پر عملدرآمد، پمز میں فائر سیفٹی انفراسٹرکچر اور حفاظتی ضوابط کا بھی جائزہ لے گی۔
انکوائری کمیٹی واقعے میں غفلت کے مرتکب افراد اور ان کی ذمہ داری کا تعین کرے گی، جبکہ آئندہ ایسے واقعات کی روک تھام کے لیے پمز کے انتظامی نظام میں اصلاحات کی سفارشات بھی پیش کرے گی۔
نوٹیفکیشن کے مطابق کمیٹی 48 گھنٹوں میں عبوری رپورٹ وزیراعظم کو پیش کرے گی، جبکہ مکمل تحقیقات اور سفارشات پر مشتمل جامع رپورٹ 5 روز میں پیش کی جائے گی۔
وزارت قومی صحت کو فوری طور پر انکوائری کمیٹی کو نوٹیفائی کرنے اور ضروری معاونت فراہم کرنے کی ہدایت بھی کی گئی ہے۔
