آزاد کشمیر میں عام انتخابات اور مخصوص نشستوں پر انتخاب کے بعد نومنتخب ارکان نے حلف اٹھا لیا ہے، جبکہ آج اسپیکر اور ڈپٹی اسپیکر کا انتخاب کیا جائے گا۔
آزاد جموں و کشمیر قانون ساز اسمبلی کے اسپیکر اور ڈپٹی اسپیکر کے انتخاب کا شیڈول جاری کر دیا گیا ہے۔ اسپیکر اور ڈپٹی اسپیکر کے انتخاب کے لیے کاغذات نامزدگی آج صبح جمع کرائے گئے۔
بعد ازاں کاغذات نامزدگی کی جانچ پڑتال ہوئی ، کاغذات نامزدگی واپس لینے کا وقت 11 بجکر 45 منٹ مقرر کیا گیا تھا، امیدواروں کی حتمی فہرست دوپہر 12 بجے جاری کی جائے گی۔
سب سے زیادہ پڑھی جانے والی
کاغذات جمع کرانے سے کچھ دیر قبل پیپلز پارٹی اور ن لیگ نے اپنے ڈپٹی اسپیکر کے امیدوار تبدیل کر دیئے ، پیپلز پارٹی نے اسپیکر کے لیے قاسم مجید اور ڈپٹی اسپیکر کے لیے عامر غفار لون کو جبکہ مسلم لیگ ن کی جانب سے احمد رضا قادری ڈپٹی اسپیکر کے عہدے کے لیے نامزد کر دیا۔
شیڈول کے مطابق اسپیکر کا انتخاب آج دوپہر 2 بجے اسمبلی اجلاس جبکہ ڈپٹی اسپیکر کا انتخاب دوپہر 3 بجے اسمبلی سیکرٹریٹ میں ہو گا۔
آزاد جموں و کشمیر قانون ساز اسمبلی مجموعی طور پر 53 ارکان پر مشتمل ہے۔ ان میں 45 نشستوں پر براہ راست انتخابات ہوتے ہیں، جبکہ 8 نشستیں مخصوص ہیں۔ مسلم لیگ ن کو 33 نشستوں کیساتھ برتری حاصل ہے جبکہ پیپلز پارٹی دوسرے نمبر پر پے۔
45 نشستوں میں 33 نشستیں آزاد کشمیر کے انتخابی حلقوں کیلئے جبکہ 12 نشستیں پاکستان میں مقیم کشمیری مہاجرین کے لیے مختص ہیں۔ باقی 8 مخصوص نشستوں میں خواتین کی 5، ٹیکنوکریٹس و دیگر پروفیشنلز کی ایک، علما و مشائخ کی ایک اور اوورسیز کشمیریوں کی ایک نشست شامل ہے۔
دوسری جانب ذرائع کا کہنا ہے کہ چوہدری طارق فاروق کو اسپیکر قانون ساز اسمبلی آزاد جموں و کشمیر کے لیے نامزد کر دیا گیا ہے، ن لیگ کے قائد نواز شریف نے چودھری طارق فاروق کی نامزدگی کی منظوری دے دی ہے۔
