آزاد کشمیر کی قانون ساز اسمبلی میں مخصوص نشستوں پر پولنگ شروع ہو گئی ہے۔
آزاد جموں کشمیر کی قانون ساز اسمبلی میں 8 مخصوص نشستوں کے انتخاب کے لیے پولنگ کا عمل صبح 10 بجے سے دوپہر 2 بجے تک جاری رہے گا، سیکرٹری الیکشن کمیشن پولنگ کے پریزائیڈنگ افسر ہوں گے۔
خواتین کی 5 مخصوص نشستوں پر 6 امیدوار مدمقابل ہیں ، مسلم لیگ ن کی 4 اور پیپلز پارٹی کی دو امیدوار آمنے سامنے ہیں ، 5 خواتین، ایک ٹیکنوکریٹ، ایک علما و مشائخ اور ایک اوورسیز کشمیری کی نشست کے لیے پولنگ ہو رہی ہے۔
سب سے زیادہ پڑھی جانے والی
خواتین کی نشستوں پر پیپلز پارٹی کی زوبیہ خورشید، ٹیکنوکریٹ نشست پر ن لیگ کے افتخار گیلانی اور پیپلز پارٹی کے صاحبزادہ ذوالفقار، علما و مشائخ نشست پر ن لیگ کے مظہر سعید اور پیپلز پارٹی کے طارق محمود مدمقابل ہیں۔ اوورسیز کشمیریوں کی نشست پر ن لیگ کے عبدالرحمان آرائیں بلامقابلہ منتخب ہو چکے ہیں۔
ایوان مکمل ہونے کے بعد نومنتخب ممبران اسمبلی حلف اٹھائیں گے، اسپیکر اور ڈپٹی اسپیکر کا انتخاب ہو گا۔
خیال رہے کہ پونچھ اور سدھنوتی میں انتخاب نہ ہونے کے باعث 7 ممبران کے بغیر حکومت سازی کا عمل سرانجام دیا جا رہا ہے۔
آزاد کشمیر کے عام انتخابات میں مسلم لیگ ن 25 نشستوں کے ساتھ سب سے بڑی جماعت جبکہ پاکستان پیپلز پارٹی 12 نشستوں کے ساتھ دوسرے نمبر پر ہے۔
دریں اثناء آزاد کشمیر میں حکومت سازی کے اہم مرحلے کے پیش نظر مسلم لیگ (ن) آزاد کشمیر کی پارلیمانی پارٹی کا اہم اجلاس مظفرآباد کے نجی ہوٹل میں ہوا، جس میں حکومت سازی کے آئندہ لائحہ عمل سمیت اہم سیاسی امور پر مشاورت کی گئی۔
اجلاس کی صدارت مسلم لیگ (ن) آزاد کشمیر کے صدر شاہ غلام قادر نے کی، جبکہ پارٹی قیادت سمیت تمام نومنتخب ارکان اسمبلی نے اجلاس میں شرکت کی۔ اس کے علاوہ وفاقی وزیر ڈاکٹر طارق فضل چوہدری اور انوشہ رحمان بھی شریک ہوئیں۔ مسلم لیگ (ن) آزاد کشمیر کے صدر شاہ غلام قادر، سابق وزیراعظم آزاد کشمیر راجہ فاروق حیدر بھی اجلاس میں موجود تھے۔
ذرائع کے مطابق اجلاس میں آزاد کشمیر میں حکومت سازی کے آئندہ لائحہ عمل پر اہم مشاورت کی گئی، جبکہ مخصوص نشستوں پر انتخاب کے حوالے سے ارکان اسمبلی کو ہدایات دینے پر بھی غور کیا گیا۔
ذرائع کا کہنا ہے کہ خواتین کی مخصوص نشستوں کے لیے ووٹنگ کے حوالے سے پینلز کی تشکیل پر مشاورت مکمل کرلی گئی ہے۔ مسلم لیگ (ن) آزاد کشمیر نے خواتین کی 5 مخصوص نشستوں میں سے 4 پر اپنی امیدواروں کو کامیاب کرانے کی حکمت عملی مرتب کی ہے۔
اجلاس میں اسپیکر اور ڈپٹی اسپیکر قانون ساز اسمبلی کے انتخاب کے معاملے پر بھی غور کیا گیا، تاہم ذرائع کے مطابق مسلم لیگ (ن) تاحال قائد ایوان، اسپیکر اور ڈپٹی اسپیکر کے ناموں کا حتمی فیصلہ نہیں کرسکی۔
ذرائع کے مطابق قائد ایوان، اسپیکر اور ڈپٹی اسپیکر کے ناموں کی حتمی منظوری مسلم لیگ (ن) کے قائد میاں نواز شریف دیں گے۔
