نائب وزیراعظم اور وزیر خارجہ اسحاق ڈار نے کہا کہ امریکا اور ایران کے درمیان طے پانے والے معاہدے کا خیر مقدم کرتے ہیں، ہم 19جون کو جنیوا میں ہونے والی باضابطہ دستخطی تقریب کے منتظر ہیں۔
اسحاق ڈار نے کہا کہ مثبت پیشرفت خطے میں دیرپا امن، استحکام اور خوشحالی کی بنیاد بنے گی، پاکستان ہر اس کوشش کی حمایت کیلئے تیار ہے جو اس پیشرفت کو مزید مستحکم کرے۔
ایران کیساتھ ڈیل مکمل ، آبنائے ہرمز جمعہ کو معاہدے پر دستخط کے بعد کھل جائے گی ، ڈونلڈ ٹرمپ
ان کا کہنا تھا کہ یہ پیش رفت مسلسل سفارتی روابط اور تصادم کے بجائے مکالمے کو ترجیح دینے کی عکاسی کرتی ہے، یہ پیشرفت بین الاقوامی برادری کیلئے حوصلہ افزا پیغام ہے۔
انہوں نے مزید کہا کہ پیشرفت سے عالمی منڈیوں، معیشت اور خصوصاً ترقی پذیر ممالک کیلئے علاقائی استحکام آئے گا۔
اسحاق ڈار نے کہا کہ اس پورے عرصے کے دوران پاکستان متعلقہ فریقوں کیساتھ فعال طور پر رابطے میں رہا، پاکستان مسلسل تحمل اور تعمیری مکالمے کی حمایت کرتا رہا، پاکستان کامؤقف رہا کہ مسائل کا واحد حل مذاکرات اور سفارتکاری ہی ہیں۔
امریکا اور ایران میں معاہدہ طے پا گیا ، باضابطہ دستخط 19 جون کو سوئٹزرلینڈ میں ہوں گے ، شہباز شریف
انہوں نے کہا کہ ہم پاکستان پر امریکا اور ایران دونوں کی قیادت کے اعتماد کو سراہتے ہیں، دونوں ممالک کا تنازع کے پرامن حل کیلئے سنجیدہ کردار قابل تحسین ہے۔
اسحاق ڈار نے کہا کہ سعودی عرب، قطر،ترکی، مصر،اقوام متحدہ اور بین الاقوامی شراکت داروں کے شکر گزار ہیں، برادر ممالک اور عالمی شراکت داروں نے اس پیشرفت کو ممکن بنانے میں مدد کی۔
