محکمہ موسمیات نے ملک کے مختلف علاقوں میں آج رات موسلادھار بارش کی پیشگوئی کر دی۔
محکمہ موسمیات نے آج رات ملک کے مختلف علاقوں میں موسلادھار بارش کی پیشگوئی کرتے ہوئے شہریوں کو احتیاطی تدابیر اختیار کرنے کی ہدایت کی ہے۔
آج رات اسلام آباد اور راولپنڈی میں موسلادھار بارش متوقع ہے جبکہ لاہور، سیالکوٹ، گوجرانوالہ اور پشاور میں بھی بارش کا امکان ظاہر کیا گیا ہے۔
محکمہ موسمیات نے خبردار کیا ہے کہ شدید بارشوں کے باعث ندی نالوں میں طغیانی کا خدشہ ہے، جس سے نشیبی علاقوں میں پانی جمع ہونے اور آمدورفت متاثر ہونے کا امکان ہے۔
دوسری جانب مری، گلیات اور آزاد کشمیر کے پہاڑی علاقوں میں موسلادھار بارش کے باعث لینڈ سلائیڈنگ کا خدشہ بھی ظاہر کیا گیا ہے، محکمہ موسمیات نے شہریوں اور متعلقہ اداروں کو ممکنہ صورتحال کے پیش نظر ضروری احتیاطی اقدامات اور پیشگی انتظامات یقینی بنانے کی ہدایت کی ہے۔
واضح رہے کہ محکمہ موسمیات نے 13 جولائی تک ملک کے مختلف حصوں میں بارشوں کی پیشگوئی کرتے ہوئے کہا ہے کہ پنجاب، خیبرپختونخوا، بلوچستان، سندھ، آزاد کشمیر اور گلگت بلتستان میں گرج چمک کے ساتھ بارش کا امکان ہے، جبکہ بعض علاقوں میں موسلادھار بارش بھی متوقع ہے۔
محکمہ موسمیات کے مطابق بالائی پنجاب، پوٹھوہار، اسلام آباد، مری، گلیات اور شمالی علاقوں میں بارش ہونے کی توقع ہے۔ لاہور، راولپنڈی، اٹک، چکوال اور جہلم میں گرج چمک کے ساتھ بارش کا امکان ظاہر کیا گیا ہے، جبکہ گوجرانوالہ، گجرات، سیالکوٹ، نارووال اور حافظ آباد میں بھی بارش متوقع ہے۔
اسی طرح فیصل آباد، ٹوبہ ٹیک سنگھ، جھنگ، سرگودھا، میانوالی، خوشاب اور بھکر میں بارش کی پیشگوئی کی گئی ہے، جبکہ شیخوپورہ، ننکانہ صاحب، قصور، اوکاڑہ، ساہیوال اور پاکپتن میں موسلادھار بارش ہونے کا امکان ہے۔ ڈی جی خان، راجن پور، لیہ، مظفر گڑھ، بہاولنگر اور رحیم یار خان میں بھی بارش متوقع ہے۔
خیبرپختونخوا کے بیشتر اضلاع میں گرج چمک کے ساتھ شدید بارش کی پیشگوئی کی گئی ہے۔ پشاور، مردان، صوابی، نوشہرہ، چارسدہ، کوہاٹ اور ہنگو کے علاوہ سوات، دیر، چترال، شانگلہ، بونیر، بٹگرام، مانسہرہ اور ایبٹ آباد میں بھی بارش کا امکان ہے۔
محکمہ موسمیات کے مطابق آزاد کشمیر اور گلگت بلتستان میں 11 سے 13 جولائی کے دوران وقفے وقفے سے بارشیں متوقع ہیں۔ مظفرآباد، نیلم ویلی، راولاکوٹ، باغ، حویلی، پونچھ، کوٹلی، میرپور اور بھمبر میں بارش کی پیشگوئی کی گئی ہے، جبکہ گلگت، سکردو، استور، دیامر، غذر، گانچھے، شگر، نگر اور ہنزہ میں گرج چمک کے ساتھ بارش کا امکان ظاہر کیا گیا ہے۔
پی ڈی ایم اے نے گلیشیائی جھیلوں کے پھٹنے کا الرٹ جاری کر دیا
بلوچستان کے شمال مشرقی اضلاع میں بھی گرج چمک کے ساتھ بارش متوقع ہے۔ ژوب، شیرانی، موسیٰ خیل، بارکھان، سبی، کوہلو اور زیارت ان علاقوں میں شامل ہیں جہاں بارش ہونے کا امکان ہے۔
محکمہ موسمیات نے مزید بتایا کہ سندھ کے بالائی اور وسطی علاقوں میں 12 اور 13 جولائی کے دوران بارش متوقع ہے۔ سکھر، لاڑکانہ، جیکب آباد، کشمور، شکارپور، گھوٹکی، خیرپور اور نوشہرو فیروز میں گرج چمک کے ساتھ بارش ہونے کی پیشگوئی کی گئی ہے۔
