آل پاکستان ٹرانسپورٹرز نے کورونا پابندیوں کے خلاف 15 ستمبر سے پہیہ جام کا اعلان کر دیا۔
ہم نیوز کے مطابق لاہور میں آل پاکستان پبلک ٹرانسپورٹ اونرز فیڈریشن ایسوسی ایشن کے جنرل سیکرٹری ملک ظفر اقبال نے دیگر عہدیداران کے ہمراہ پریس کانفرنس کی اور حکومت سے کورونا کے باعث بند ٹرانسپورٹ کو کھولنے کا مطالبہ کیا۔
انہوں نے کہا کہ پہلے جب کورونا کی شدت زیادہ تھی تو ٹرانسپورٹ کی بندش سے پہلے وقت دیا گیا اس بار دو گھنٹے پہلے لاک ڈائون کردیا گیا اور پبلک ٹرانسپورٹ بند کردی گئی۔
کورونا: 24 اضلاع، 15 ستمبر تک تعلیمی ادارے و انٹر سٹی ٹرانسپورٹ بند، جمز پر پابندی
ملک ظفر اقبال کا کہنا تھا کہ ریلوے چل رہی ہے، کاریں چل رہی ہیں اور کاریں پانچ گنا زیادہ پیسے لے رہے ہیں، جو عوام کا مالی نقصان ہورہا ہے اس کی ذمہ داری حکومت پر ہے۔
انہوں نے کہا کہ ہمارے ملازمین کے گھروں کے چولہے ٹھنڈے ہوگئے ہیں۔
ان کا کہنا تھا کہ ہماری درخواست ہے کہ حکومت اس فیصلے کو واپس لے، اگر 15 ستمبر تک ٹرانسپورٹ نہ چلائی گئی تو پہیہ جام کردیں گے۔
