کراچی: وزیر برائے صنعت و تجارت سندھ جام اکرام اللہ دھاریجو کا بھی کورونا ٹیسٹ مثبت آگیا۔
جام اکرام اللہ دھاریجو کا کہنا ہے کہ وہ چند دنوں سے تھکن اور ہلکا بخار محسوس کررہے تھے۔ کورونا ٹیسٹ مثبت آنے کے بعد انہوں نے اپنی رہائش گاہ پر خود کو قرنطینہ کرلیا ہے۔
خیال رہے کہ اس سے قبل سابق وزیراطلاعات سندھ اور پیپلز پارٹی کے رہنما شرجیل انعام میمن کا بھی کورونا ٹیسٹ مثبت آگیا تھا، جس کے بعد انہوں نےخود کو قرنطینہ کرلیا ہے۔
خیال رہے کہ صوبہ سندھ میں 24 گھنٹوں کے دوران کورونا وائرس سے مزید 4 افراد جاں بحق جب کہ 848 متاثر ہوئے ہیں۔
وزیراعلیٰ سندھ مراد علی شاہ کی جانب سے جاری تازہ اعداد و شمار کے مطابق سندھ میں کورونا کیسز کی تعداد ایک لاکھ 56 ہزار 528 ہو گئی ہے جب کہ اموات کی تعداد 2751 تک پہنچ چکی ہے۔
ان کا کہنا تھا کہ سندھ میں کورونا کے 376 مریضوں کی حالت تشویشناک ہے جب کہ 37 مریض وینٹی لیٹرز پر موجود ہیں۔
وزیراعلیٰ سندھ مراد علی شاہ کے مطابق کراچی میں کورونا کے مزید 592 کورونا کیسز رپورٹ ہوئے ہیں جس کے بعد شہر میں وبا سے متاثرہ افراد کی تعداد ایک لاکھ 7 ہزار 375 ہو گئی ہے۔
یاد رہے کہ عالمی وبا کورونا وائرس کی دوسری لہر کے پیش نظر ملک بھر میں شادی ہالز میں تقاریب پر پابندی عائد کر دی گئی ہے۔
مزید پڑھیں: کورونا: حکومت سندھ، پابندیاں عائد کرانے کیلیے وفاق کو خط لکھنے کا فیصلہ
نیشنل کمانڈ اینڈ کنٹرول سینٹر (این سی او سی) کی جانب سے جاری اعلامیے کے مطابق شادی ہالوں پر پابندی 20 نومبر سے نافذ ہو گی۔
اعلامیے کے مطابق شادی ہال کے اندر تقاریب پر پابندی ہو گی۔ تقاریب کا انعقاد صرف کھلی جگہ پر کیا جا سکے گا۔
این سی او سی اعلامیے کے مطابق کھلی جگہ پر شادی کی تقریب میں زیادہ سے زیادہ ایک ہزار افراد شریک ہو سکیں گے۔
اس کے علاوہ این سی او سی نے ماسک نہ پہننے والوں کے لیے جرمانے کی شرح مقرر کر دی ہے۔
اعلامیے کے مطابق بغیر ماسک کے گھر سے باہر نکلنے والے فرد سے 100 روپے جرمانہ وصول کر کے 3 ماسک دیئے جائیں گے۔
این سی او سی اعلامیے کے مطابق تمام سرکاری اور نجی دفاتر میں 50 فیصد عملے کو گھر سے کام کرنے کی ہدایت کر دی گئی ہے۔
