سمندر کی گہرائیوں میں موجود روسی آبدوز میں آگ لگنے سے عملے کے 14 افراد ہلاک ہو گئے ہیں۔
روسی وزارت دفاع کا کہنا ہے کہ آبدوز کو اس وقت آگ لگی جب وہ روسی سمندری حدود میں کچھ تجربات کر رہی تھی، عملے کی قربانیوں کے باعث آگ بجھا دی گئی۔
بتایا گیا ہے کہ ہلاک ہونے والے افراد زہریلے دھوئیں کے باعث اپنی جان سے ہاتھ دھو بیٹھے۔
عالمی خبر ایجنسے کے مطابق اگرچہ یہ ایٹمی آبدوز تھی لیکن عموماً یہ جاسوسی کے مشن پر کام کرتی تھی، اس پر زیادہ سے زیادہ 25 افراد کی گنجائش ہوتی ہے اور یہ سمندر کی گہرائی میں 3.7 میل تک جا سکتی ہے۔
حادثے کا شکار ہونے والی آبدوز اس وقت روس کے شمالی فلیٹ کے بیس سیورومارسک میں موجود ہے، آگ لگنے کی وجوہات معلوم کرنے کے لیے تحقیقات کا آغاز کر دیا گیا ہے۔
اگست 2000 میں روس کی ایٹمی آبدوز کرسک کو بیرنٹس کے سمندر میں حادثہ پیش آیا تھا جس کے باعث عملے کے تمام 118 افراد ہلاک ہو گئے تھے۔
