اسلام آباد: محکمہ موسمیات کے مطابق ملک کے اکثر علاقوں میں خشک سردی پڑنے کا امکان ہے اور کہیں بھی بارش متوقع نہیں۔
وفاقی دارالحکومت میں صبح کے وقت خنکی میں اضافہ ہوا اور درجہ حرارت بھی 13 ڈگری سینٹی گریڈ ریکارڈ کیا گیا۔
محکمہ موسمیات کےمطابق اسلام آباد کا درجہ حرارت کم سے کم 6 اور زیادہ سے زیادہ 23 ڈگری سینٹی گریڈ تک جا سکتا ہے۔
پنجاب کے اکثر اضلاع میں خشک سردی پڑنے کا امکان ہے اور آئندہ چند روز تک کہیں بھی بارش متوقع نہیں۔
محکمہ موسمیات کے مطابق سب سے زیادہ سردی مظفرآباد میں پڑنے کا اندیشہ ہے جہاں کا درجہ حرارت 6 ڈگری سینٹی گریڈ تک نیچے آنے کا امکان ہے۔
خیبرپختونخوا کے اکثر اضلاع میں جمعہ کے روز مطلع صاف رہے گا تاہم مانسہرہ اور بٹگرام میں سب سے زیادہ سردی پڑ سکتی ہے جہاں درجہ حرارت 5 ڈگری سینٹی گریڈ تک گر سکتا ہے۔
بلوچستان کے تمام اضلاع میں آئندہ چند روز تک خشک سردی پڑے گی اور کہیں بھی بارش کا امکان نہیں۔
گزشتہ 24 گھنٹوں کے دوران بھی ملک کے بیشتر حصوں میں موسم خشک اور سرد رہا۔ سب سے زیادہ سردی سکردو میں پڑی جہاں کا درجہ حرارت منفی 8 ڈگری سینٹی گریڈ ریکارڈ کیا گیا۔
