قومی کرکٹرصائم ایوب کوپاکستانی اسکواڈ سے ریلیز کرکے ان کی جگہ صاحبزادہ فرحان کو تین ملکی ون ڈے سیریز میں شامل کرلیا گیا۔
گزشتہ روز لیفٹ آرم آف اسپنر سفیان مقیم کو بھی سہ ملکی ون ڈے سیریز سے ریلیز کیا گیا تھا۔
پیر کو پی سی بی کی جانب سے جاری کیے گئے اعلامیے میں دعویٰ کیا گیا ہے کہ ہیڈ کوچ سے گفتگو کے بعد ”صائم ایوب نے ڈومیسٹک کرکٹ میں واپس جانے کی خواہش ظاہر کی تاکہ وہ اپنی بیٹنگ فارم پر کام کر سکیں اور اپنا اعتماد بحال کر سکیں۔“
سب سے زیادہ پڑھی جانے والی
پی سی بی کی جانب سے جاری بیان میں مزید کہا گیا ہے کہ صائم کے فیصلے کا احترام کرتے ہوئے اور اپنی موجودہ فارم کے بارے میں ان کے دیانتدارانہ جائزے کو سراہتے ہوئے، ٹیم انتظامیہ اور قومی سلیکشن کمیٹی نے باہمی اتفاق رائے سے اس درخواست کو قبول کر لیا ہے۔
صاحبزادہ فرحان اس وقت پاکستانی ٹی ٹوئنٹی ٹیم کے کپتان ہیں، سری لنکا کے خلاف حالیہ سیریز میں ان کی کارکردگی شاندار رہی، یہ سیریز پاکستان نے 1-2 سے جیتی، 3 میچز میں 238 رنز بنا کر وہ سیریز کے بہترین کھلاڑی بھی قرار پائے تھے۔
اوپنر بلے باز کی مایوس کن کارکردگی
خیال رہے کہ 24 سالہ صائم ایوب پاکستان کی جانب سے 20 ون ڈے میچز میں تین سنچریوں کی مدد سے 772 رنز بنا چکے ہیں، تاہم اُن کی حالیہ فارم پر سوالات اُٹھائے جا رہے ہیں۔
صائم ایوب کی سہ ملکی سیریز میں کارکردگی انتہائی مایوس کن رہی ہے ، سری لنکا کے خلاف پہلے میچ میں وہ صرف 7 رنز بنا سکے اور کوئی وکٹ بھی حاصل نہیں کی۔
انگلینڈ کیخلاف دوسرے میچ میں بھی ان کا بلا نہیں چلا اور صرف 8 رنز بنا پائے جبکہ اس بار بھی کوئی وکٹ ان کے حصے میں نہ آئی۔
گزشتہ روز انگلینڈ کے خلاف تیسرے میچ میں بھی وہ صرف 6 رنز بنا سکے اور کوئی کھلاڑی آؤٹ بھی نہ کرسکے۔ اس طرح سہ ملکی سیریز کے تینوں میچوں میں صائم ایوب ایک وکٹ لیے بغیر صرف 21 رنز بنا سکے ہیں۔
پاکستانی ٹیم سیریز میں اب تک ناقابلِ شکست ہے اور اپنے 3 میچز جیت کر فائنل میں پہنچ چکی ہے، گرین شرٹس نے پہلے مقابلے میں سری لنکا کو 37 رنز سے ہرایا جبکہ دوسرے میچ میں انگلینڈ کو 87 رنز سے شکست دے کر اپنی برتری ثابت کی۔
تیسرے میچ میں آل راؤنڈر شاداب خان کی تاریخ ساز بلے بازی کی بدولت انگلینڈ کو سنسنی خیز مقابلے میں شکست دے گرین شرٹس نے فائنل کیلئے کوالیفائی کیا۔
