پی ٹی آئی نے خیبرپختونخوا میں گورنر راج اور ایمرجنسی کے نفاذ کو پشاور ہائیکورٹ میں چیلنج کر دیا

چیئرمین پاکستان تحریک انصاف (پی ٹی آئی) بیرسٹر گوہر نے خیبر پختونخوا میں گورنر راج اور ایمرجنسی کے نفاذ کو پشاور ہائی کورٹ میں چیلنج کر دیا۔

چیئرمین پی ٹی آئی نے علی زمان ایڈووکیٹ کی وساطت سے پشاور ہائی کورٹ میں درخواست دائر کی ہے۔

میڈیا سے بات کرتے ہوئے ان کا کہنا تھا کہ ایمرجنسی اور گورنر راج کے معاملے کو عدالت میں چیلنج کر دیا ہے۔

ان کا کہنا تھا کہ گورنر راج اور ایمرجنسی نافذ کر کے جمہوری حکومت ختم کر دی گئی، انہوں نے امید ظاہر کی کہ عدالت صوبے میں جمہوری حکومت بحال کرے گی۔عدالت سے استدعا کی گئی ہے کہ ایمرجنسی اور گورنر راج کے اقدامات کو کالعدم قرار دیا جائے۔

بیرسٹر گوہر نے کہا کہ عدالت سے جلد سماعت کی استدعا کی ہے، ان کا کہنا تھا کہ ہم آئینی اور قانونی جدوجہد جاری رکھیں گے۔

یاد رہے کہ وفاقی حکومت نے 11 اکتوبر کو صدر مملکت آصف علی زرداری کی منظوری کے بعد آئین کے آرٹیکل 232 کے تحت صوبے میں ایمرجنسی اور آرٹیکل 234 کے تحت گورنر راج نافذ کرنے کا اعلان کیا تھا۔ حکومت نے اس فیصلے کی وجہ صوبے میں بگڑتی ہوئی سکیورٹی صورتِ حال اور دہشت گردی کے خلاف اقدامات میں پاکستان تحریک انصاف (پی ٹی آئی) کی صوبائی حکومت کے مبینہ عدم تعاون کو قرار دیا۔

سینیٹ و قومی اسمبلی نے ایمرجنسی کے نفاذ کی توثیق کر دی

قومی اسمبلی کے آج ہونے والے اجلاس کے دوران خیبر پختونخوا میں ایمرجنسی کے نفاذ سے متعلق قرارداد کو کثرت رائے سے منظور کر لیا گیا جس کے بعد اس اقدام کی پارلیمنٹ کے ایوانِ زیریں سے باقاعدہ توثیق ہو گئی ہے۔  قرارداد وفاقی وزیر برائے پارلیمانی امور طارق فضل چوہدری نے پیش کی تھی۔

بعد ازاں سینیٹ میں بھی طارق فضل چوہدری نے خیبر پختونخوا میں ایمرجنسی کے نفاذ کی منظوری کے لیے پیش کی گئی جسے منظور کرلیا گیا۔ تاہم دونوں ایوانوں سے اپوزیشن نے واک آؤٹ کیا۔