تھائی لینڈ کی ملکہ سوتھیدا نے گزشتہ روز پہلی مرتبہ تنہا گریپن لڑاکا طیارہ اڑایا اس موقع پر تھائی لینڈ کے بادشاہ مہا وجیرالونگ کورن بھی موجود تھے۔
خبر رساں ادارے رائٹرز کے مطابق تھائی لینڈ کے شاہی دفتر نے بتایا کہ ملکہ سوتھیدا نے جنوبی تھائی لینڈ کے صوبے سورت تھانی میں واقع وِنگ 7 ایئربیس سے جے اے ایس 39 سی گریپن جنگی طیارہ اڑایا۔
شاہی دفتر کی جانب سے جاری ویڈیو میں ملکہ کو جنگی طیارہ اڑاتے ہوئے دکھایا گیا ہے جبکہ بادشاہ مہا وجیرالونگ کورن نے زمین سے اس پرواز کا مشاہدہ کیا۔
سب سے زیادہ پڑھی جانے والی
View this post on Instagram
پرواز کے بعد بادشاہ نے ملکہ کو پھولوں کا گلدستہ اور گریپن آرڈر گولڈن پیچ پیش کیا۔ شاہی دفتر کے مطابق یہ خصوصی بیج ان افراد کو دیا جاتا ہے جنہوں نے گریپن جنگی طیارہ اڑایا ہو۔
شاہی دفتر کے مطابق ملکہ سوتھیدا نے وِنگ 7 ایئربیس پر دو مراحل میں تربیت حاصل کی۔ پہلا مرحلہ 20 اگست سے 4 ستمبر 2026تک جاری رہا جبکہ دوسرا مرحلہ 25 ستمبر سے 8 اکتوبر 2026 تک مکمل ہوا۔
تربیت میں فلائٹ سمیولیٹر کا استعمال بھی شامل تھا اور یہ تمام مراحل رائل تھائی ایئر فورس کے مقررہ معیار کے مطابق مکمل کیے گئے۔
شاہی دفتر کے مطابق ملکہ سوتھیدا نے مئی 2010 میں طیارے اڑانا شروع کیے تھے اور اب تک انہیں مختلف اقسام کے طیاروں میں تقریباً 1,188 گھنٹے پرواز کا تجربہ حاصل ہوچکا ہے۔ان طیاروں میں بوئنگ 737 بھی شامل ہیں۔
شاہی دفتر کے مطابق ملکہ شاہی پروازوں کے دوران بادشاہ کی معاون پائلٹ کے طور پر بھی خدمات انجام دے چکی ہیں۔ ان پروازوں میں 2025 میں بھوٹان کا سرکاری دورہ بھی شامل تھا۔
