آئل اینڈ گیس ریگولیٹری اتھارٹی (اوگرا) نے اکتوبر 2026 کے لیے ایل پی جی کی قیمت میں اضافہ کر دیا۔
نوٹیفکیشن کے مطابق ایل پی جی کی قیمت میں 20 روپے 69 پیسے فی کلو اضافہ ہونے کے بعد قیمت 279 روپے 34 پیسے ہو گئی ہے۔
اوگرا کے نوٹیفکیشن کے مطابق 11.8 کلوگرام کے گھریلو ایل پی جی سلنڈر کی قیمت میں 244 روپے 14 پیسے اضافہ کیا گیا ہے، جس کے بعد اس کی قیمت 3 ہزار 296 روپے 23 پیسے ہوگئی ہے۔
مزید پڑھیں
ستمبر میں ایل پی جی کی قیمت 258 روپے 65 پیسے فی کلو تھی جبکہ 11.8 کلوگرام کے گھریلو سلنڈر کی قیمت 3 ہزار 52 روپے 9 پیسے مقرر کی گئی تھی، یوں اکتوبر کے لیے فی کلو قیمت میں 20 روپے 69 پیسے اور گھریلو سلنڈر میں 244 روپے 14 پیسے اضافہ ہوا ہے۔
اوگرا کے مطابق نئی ایل پی جی قیمتوں کا اطلاق اکتوبر 2026 کے لیے ہوگا۔
پاکستان میں پیٹرولیم مصنوعات کی تازہ قیمتیں
دوسری جانب پاکستان میں پیٹرولیم مصنوعات کی قیمتوں میں بھی تازہ ردوبدل کیا گیا ہے، 30 ستمبر 2026 سے نافذ نئی قیمتوں کے مطابق پٹرول 1 روپے 49 پیسے فی لیٹر سستا کرکے 387 روپے 54 پیسے فی لیٹر مقرر کیا گیا تھا، جبکہ ہائی اسپیڈ ڈیزل کی قیمت میں 2 روپے 73 پیسے فی لیٹر کمی کے بعد نئی قیمت 402 روپے 24 پیسے فی لیٹر ہوگئی تھی۔
تازہ نرخوں میں پیٹرول کی سابقہ قیمت 389 روپے 3 پیسے اور ہائی اسپیڈ ڈیزل کی سابقہ قیمت 404 روپے 97 پیسے فی لیٹر تھی۔
حکام کے مطابق پیٹرول اور ڈیزل کی قیمتوں میں تبدیلی عالمی منڈی میں پیٹرولیم مصنوعات کے نرخوں، پلاٹس ریٹس، درآمدی پریمیم اور دیگر متعلقہ اخراجات میں تبدیلیوں کی بنیاد پر کی گئی ہے۔
