آزاد جموں و کشمیر میں مسلم لیگ ن کی حکومت نے حکومت سازی کا اہم مرحلہ مکمل کرلیا، نئی کابینہ نے اپنے عہدوں کا حلف اٹھا لیا۔
صدر ہاؤس مظفرآباد میں آزاد کشمیر کی نئی کابینہ کی حلف برداری کی تقریب منعقد ہوئی، جہاں قائم مقام صدر آزاد کشمیر چوہدری طارق فاروق نے نو منتخب وزراء سے حلف لیا۔
کرنل (ر) وقار نور، اظہر صادق اور عبدالرحمن آرائیں نے بطور وزیر حلف اٹھایا، جبکہ راجہ ثاقب مجید، ڈاکٹر مصطفیٰ بشیر عباسی اور راجہ ریاست نے بھی وزارت کا حلف لیا۔سردار میر اکبر اور عمیر نعیم بھی آزاد کشمیر کی نئی کابینہ کا حصہ بن گئے ہیں۔
مزید پڑھیں
نئی کابینہ کی حلف برداری کے ساتھ آزاد کشمیر میں حکومت سازی کا اہم مرحلہ مکمل ہوگیا ہے جبکہ وزراء کے محکموں کی تقسیم آئندہ مرحلے میں کی جائے گی۔
نئی کابینہ سے توقع کی جا رہی ہے کہ وہ آزاد کشمیر میں حکومتی امور کو مزید فعال بنانے، انتظامی معاملات میں بہتری لانے اور عوامی مسائل کے حل کے لیے اقدامات کرے گی۔
واضح رہے کہ کابینہ کی حلف برداری کے بعد اب اگلے مرحلے میں وزراء کے درمیان محکموں کی تقسیم کی جائے گی، جس کے بعد حکومت کی جانب سے مختلف شعبوں میں پالیسی اور ترقیاتی ترجیحات پر عملی کام کا آغاز متوقع ہے۔
آزاد کشمیر میں نئی حکومت کو عوامی مسائل، معاشی معاملات، روزگار، صحت، تعلیم اور انفراسٹرکچر سمیت مختلف شعبوں میں چیلنجز کا سامنا ہے، نئی کابینہ کے لیے حکومتی امور کو مؤثر انداز میں چلانے اور عوامی توقعات پر پورا اترنا اہم ترجیح ہوگی۔
