امریکی فوج نے مسلسل دسویں رات بھی ایران کے کئی شہروں پر فضائی حملے کئے جس میں میزائل ، ڈرون لانچنگ مقامات، اور فضائی دفاعی نظام کو نشانہ بنانے کا دعویٰ کیا گیا۔ دوسری جانب ایران نے کویت اور بحرین میں امریکی تنصیبات کو نشانہ بنایا۔
امریکی سینٹرل کمانڈ نے ایکس پر بیان جاری کرتے ہوئے بتایا ہے کہ ایران کے خلاف مزید مرحلہ وار حملے مکمل کر لیے۔ امریکی فورسز نے ایرانی فوجی کمانڈ سینٹرز، بحری صلاحیتوں، میزائل اور ڈرون لانچ سائٹس اور فضائی دفاعی نظام کو نشانہ بنایا۔
سینٹکام نے کہا کہ اہم بین الاقوامی بحری گزرگاہ سے تجارتی جہازوں کی آمدورفت بدستور جاری ہے۔ مئی کے آغاز سے اب تک سینٹکام کی فورسز نے تقریباً 900 تجارتی جہازوں اور 45 کروڑ بیرل خام تیل کی ترسیل میں مدد فراہم کی ہے۔
ایران وینزویلا نہیں ، برتری حاصل ہونے پر امریکا کیساتھ جنگ ختم کریں گے ، عباس عراقچی
سینٹکام نے کہا کہ امریکی فورسز آبنائے ہرمز سے آزادانہ اور کھلے عام گزرنے والے شہری ملاحوں کے خلاف بلاجواز جارحیت پر ایران کو جواب دہ بنانے کے لیے بدستور پوری طرح تیار اور مستعد ہیں۔
دوسری جانب ایرانی پاسداران انقلاب نے بحرین اور کویت میں امریکی فوجی تنصیبات پر حملوں کا دعویٰ کیا ہے۔
پاسداران انقلاب نے کہا کہ بحرین کے شہر محرق میں امریکی ریڈار اور فضائی دفاعی نظام جبکہ شہر رفاع میں نصب امریکی پیٹریاٹ فضائی دفاعی نظام کو میزائل اور ڈرون سے نشانہ بنایا۔
پاسداران انقلاب نے مزید کہا کہ کویت میں امریکی ریڈار، مواصلاتی نظام اور سیٹلائٹ تنصیبات کو میزائل اور ڈرون سے نشانہ بنایا۔ اس کے علاوہ کویت کے علی السالم ائیربیس پر موجود ایم کیو 9 ڈرون ہینگر اور کویت کے احمد الجابر ائیربیس پر موجود امریکی فوجی تنصیبات کو بھی ٹارگٹ کیا۔
پاسداران انقلاب نے دعویٰ کیا کہ کویت میں واقع امریکی فوجی کیمپ عریفجان میں موجود امریکی ہمارز میزائل سسٹمز کو زمین سے زمین پر مار کرنے والے میزائلوں سے نشانہ بنایا۔
