وزیراعظم محمد شہباز شریف کا کہنا ہے کہ گزشتہ رات بھارت نے جارحیت کرکے غلطی کی ہے، بھارت کو غلطی کا خمیازہ بھگتنا پڑے گا۔
قوم سے خطاب میں انہوں نے کہا کہ پاک فضائیہ نے بھارت کے5طیارے مار گرائے،بھارت کو لگا کہ پاکستانی قوم پیچھے ہٹ جائےگی۔ جو طیارے بھارت کا غرور تھے وہ اب خاک بن چکےہیں۔
وزیراعظم کا کہنا ہے کہ عہد کرتے ہیں شہیدوں کے خون کے ایک ایک قطرے کا حساب لیں گے، ہمارے شاہینوں نے فضا میں طوفان برپا کردیا،پاک فضائیہ نے اپنی حدود میں رہتےہوئے دشمن کے جہازوں کو نشانہ بنایا۔ان کا کہنا تھا کہ عوام کو اپنی افواج پر ناز اور فخر ہے۔
وزیراعظم نے کہا کہ ہماری افواج نے دشمن کو گھٹنے ٹیک پر مجبورکردیا، گزشتہ رات پوری دنیا نے دیکھا کہ عددی اعتبار سے کئی گنا بڑے دشمن کو گھٹنے ٹیکنے میں صرف چند گھنٹے لگے اور اللہ کے فضل و کریم سے ہمارے شاہینوں نے فضا میں ایسا طوفان برپا کیا کہ دشمن چیخ اٹھا، بھارت کے 5 جنگی طیارے مار گرائے، بھارت اپنے جنگی طیاروں پر بہت غرور کرتا تھا، ہمارے شاہینوں نے بھارت کو دندان شکن جواب دیا۔
شہباز شریف نے مزید کہا کہ یہ ہمارا دندان شکن جواب تھا جس میں اسکوارڈن لیڈر ایم ایم عالم کی گرج تھی، جو کل رات دوبارہ پورے زور سے گونجی اور ہمارے شاہینوں نے دشمن پر ایسی کاری ضربیں لگائیں، جو وقت کا مرہم بھی کبھی نہیں بھر سکے گا۔
ان کا کہنا تھا کہ بھارت کے بزدلانہ حملوں نے 26 معصوم شہری شہید اور 46 زخمی ہوئے، ان میں بچے اور خواتین شامل ہیں، ایک شہید بچے کاجنازہ ابھی پڑھ کرآئے ہیں، 7 برس کا ننھا پھول شہید کے رتبے پر فائز ہوگیا، شہادت کے بلند رتبے پر ایسے ہی فائز ہونے والے ہمارے دوسرے عظیم پاکستانیوں کو قوم خراج عقیدت پیش کرتی ہے اور پورا پاکستان ان شہدا کے خاندانوں کے ساتھ ہے اور زخمیوں کی صحت یابی کے لیے دعا گو ہے۔
فرانس کی بھارتی فضائیہ کے زیر استعمال رافیل طیارہ تباہ ہونے کی تصدیق
وزیراعظم نے کہا کہ ہم یہ عہد کرتے ہیں کہ دشمنوں سے ان شہیدوں کے خون کے ایک ایک قطرے کا ضرور حساب لیا جائے گا، یہ وہ بزدل دشمن ہے، جو نہتے انسانوں پر وار کرکے خود کو طاقتور سمجھتا ہے لیکن کل رات ہم نے ثابت کر دیا کہ پاکستان اپنے دفاع میں منہ توڑ جواب دینا جانتا ہے۔
شہباز شریف نے مزید کہا کہ ہمارے جوانوں نےدشمن کے جہازوں کو پرخچے اڑادیے، ہماری قوم کو اپنے جوانوں پر ناز ہے، اقوام متحدہ کی قراردادوں کے مطابق کشمیر متنازع علاقہ ہے، کشمیریوں کو حق خودارادیت ملے بغیر مسئلہ حل نہیں ہوگا۔
انہوں نے کہا کہ بھارت کے اقدامات سے حقیقت کبھی نہیں بدلے گی، خطے میں دہشت گردی سے سب سے زیادہ متاثر پاکستان ہوا ہے، ہم نے 80 ہزار سے زائد شہادتیں دی ہیں، 152 ارب ڈالر سے زائد کے مالی نقصانات ہوئے، بھارت کی موجودہ مہم جوئی دہشت گردی سے ہماری توجہ نہیں ہٹاسکتا، ہم دہشت گردی کے خلاف آخری دم تک لڑیں گے، پوری قوم پاک افواج کے ساتھ مل کر مقابلہ کرے گی، ملکی سالمیت کے لیے قوم کے جذبے کو سلام پیش کرتا ہوں۔
