لاہور میں طوفانی بارش سے نشیبی علاقے پانی میں ڈوب گئے، دو افراد جاں بحق اور 7 افراد زخمی ہو گئے۔
موسلادھار بارش کے باعث نشیبی علاقے زیر آب آ گئے، بارش سے انڈرپاس جیل روڈ پر پانی جمع ہو گیا، ٹریفک پولیس نے انڈر پاسز سے ڈائیورشن لگا دی۔
ریسکیو 1122 کے مطابق لاہورمیں بارش کے دوران مختلف حادثات میں 2 افراد جاں بحق جبکہ 7 دیگر زخمی ہو گئے، نشاط کالونی میں کرنٹ لگنے سے ایک شخص جبکہ گھجومتہ میں گھرکی چھت گرنے سے ایک بچی جاں بحق اور 5 افرادزخمی ہوئے۔ریسیکیو 1122 کے مطابق جوہر ٹاؤن لاہور میں گھرکی چھت گرنے سے 2 افراد زخمی ہوئے۔
لاہور میں بارش کا 44 سالہ ریکارڈ ٹوٹ گیا۔ شہر میں سب سے زیادہ 360 ملی میٹر بارش ائرپورٹ کے اطراف میں ریکارڈ کی گئی، پانی والا تالاب میں 319، نشتر ٹائون 312، فرخ آباد میں 295 ملی میٹر بارش ریکارڈ کی گئی۔
بلوچستان کو کراچی سے ملانے والا راستہ سیلابی ریلے میں بہہ گیا، آمد و رفت متاثر
جوہر ٹائون 275، اقبال ٹائون 262، تاج پورہ 260، چوک ناخدا 259، گلشن راوی میں 247 ملی میٹر بارش ریکارڈ کی گئی، بارش کے بعد مختلف علاقوں میں بجلی کی سپلائی معطل ہو گئی۔
لاہور کے علاقے سبزہ زار، حسن ٹاؤن، اعوان ٹاؤن اور اقبال ٹاؤن بھی بجلی سے محروم ہو گئے، موٹروے ایم ٹو، پنڈی بھٹیاں شیخوپورہ، مانگا منڈی، پتوکی، رینالہ خورد اور اوکاڑہ کے مقامات پر بارش ہوئی۔
موٹروے ایم تھری پر لاہور فیض پور سے ننکانہ صاحب تک بارش کا سلسلہ جاری ہے، پتوکی اور رائے ونڈ میں بھی بارش سے موسم خوشگوار ہو گیا،اسلام آباد کے مختلف سیکٹرزمیں بھی بارش ہوئی، مزید بارش کا امکان ظاہر کیا گیا ہے۔
آج ملک کے مختلف شہروں میں گرج چمک کے ساتھ بارش کی پیشگوئی
لاہور میں سروسز اسپتال کی ایمرجنسی میں بارش اور سیوریج کا پانی داخل ہو گیا، ایمرجنسی میں داخل ہونے والے پانی نے ہر طرف بدبو پھیلا دی ہے، لاہور میں بارش کا سلسلہ جاری ہے، کالج روڈ اور شوکت خانم روڈ پر درخت گر گئے۔
بارش کا پانی میو اسپتال کی ایمرجنسی میں بھی داخل ہو گیا، پنجاب اسمبلی کے عقب میں ڈیوٹی فری شاپ روڈ پر بارش کا پانی جمع ہو گیا ہے، انڈر پاسز میں پانی جمع ہونے سے ٹریفک کی آمد و رفت معطل ہو گئی ہے۔
تمام دفاتر کو چھٹی دے دی گئی، اسکولز بھی بند کر دیے گئے، کمشنر لاہور نے اپنے پیغام میں کہا ہے کہ شہری غیر ضروری سفر سے گریز کریں۔
لیسکو حکام کا کہنا ہے کہ لاہور میں بارش سے 400 سے زائد فیڈر ٹرپ کر گئے ہیں، بارش رکتے ہی بجلی کی بحالی کا کام شروع ہو جائے گا۔
