متحدہ عرب امارات کے قونصل جنرل بخیت عتیق الرومیثی نے کہا ہے کہ اگر یو اے ای سے آنے والے سرمایہ کاروں کو پاکستان میں فری ہینڈ ملے تو یہاں وہ سب کچھ نظر آنے لگے گا جو اس وقت دبئی میں ہے۔
یو اے ای کے قونصل خانے میں پاکستان کے یوم آزادی کے حوالے سے خصوصی تقریب سے خطاب کرتے ہوئے انہوں نے کہا کہ اس وقت پاکستان سیاسی و معاشی لحاظ سے انتہائی نازک دور سے گزر رہا ہے۔
اس لیے وقت کا تقاضہ ہے پوری قوم اندرونی و بیرونی دشمنوں کی سازشوں کو ناکام بنانے کے لیے صرف اور صرف پاکستان کی خاطر ایک ہو جائے اور سب مل کر اس وطن کو مضبوط کریں۔
انڈپینڈنٹ اردو سے گفتگو کرتے ہوئے بخیت عتیق الرومیثی نے کہا کہ یو اے ای سمیت دیگر عرب ممالک کے سرمایہ کاروں کے تجربے سے مستفید ہوکر پاکستان میں بہتر انداز میں کاروبار کیا جا سکتا ہے، اس سے دونوں ملکوں کے تعلقات میں بھی مزید بہتری آئے گی۔
ان کا کہنا تھا کہ حال ہی میں قائم ہونے والی خصوصی سرمایہ کاری سہولت کونسل کا مقصد بھی خلیجی ممالک سے پاکستان کے لیے ممکنہ سرمایہ کاری میں آسانی لاتے ہوئے اس میں تیزی لانا ہے جب کہ اماراتی سرمایہ کاروں کی آمد سے پاکستانی عوام کو بھی فائدہ ہوگا۔
انہوں نے کہا کہ پاکستان اگر ان سرمایہ کاروں کو یہاں کام کرنے کے لیے فری ہینڈ دے تو پاکستان میں بھی آپ کو وہی نظر آئے گا جو دبئی میں نظر آتا ہے۔
