وزیراعظم شہباز شریف نے بڑا اعلان کرتے ہوئے کہا ہے کہ مجھے بتایا گیا کہ ریڈیو کے ملازمین کو مئی کی تنخواہ نہیں دی گئی،ریڈیو ورکرز کو مئی کی تنخواہوں دینے کا اعلان کرتا ہوں۔
پشاور میں ریڈیو پاکستان کے دورے کے دوران وزیراعظم شہباز شریف نے تقریب سے خطاب کیا۔ انہوں نے کہا کہ تاریخی عمارت کی حالت دیکھ کر بہت دکھ ہوا، اسی ریڈیو پاکستان پشاور سے دنیا کو مملکت کی آزادی کی خوشخبری سنائی گئی تھی۔ جس جگہ سے آزادی کی صدا بلند ہوئی اس کو جلا دینا ملک دشمنی کی مثال ہے۔
وزیراعظم پاکستان کا کہنا تھا کہ 9 اور 10 مئی کے درمیان جو دلخراش واقعات ہوئے اس نےعوام کو صدمہ پہنچایا۔ یہ یادگاریں پاکستان کی دفاعی قوت ہیں، تاریخی اور قومی ورثے کو جلا دینا کہاں کی حب الوطنی ہے؟
ریڈیو پاکستان پشاور کا تاریخی پس منظر
انہوں نے بتایا کہ صوت القرآن چینل کی کسی ایک چیز کو بھی نقصان نہیں پہنچا جبکہ دوسری طرف شہدا کے مجسمے کو آگ لگادی گئی جس سے زیادہ ملک دشمنی کوئی نہیں ہوسکتی۔
وزیراعظم شہباز شریف نے مزید کہا کہ قیامت تک دشمن پاکستان کی طرف میلی آنکھ سے نہیں دیکھ سکتا۔ قومیں اپنی تاریخ کو جان سے عزیز رکھتی ہیں، اللہ نے پاکستان کو اجتماعی کاوشوں کے نتیجے میں ایٹمی قوت بنایا تھا۔
