سیلاب کی تباہ کاریاں پاک آرمی اور فرنٹیئر کور کے دستے سیلاب متاثرین کی امدادی کارروائیوں میں سول انتظامیہ کے مددگار ہیں۔
آئی ایس پی آر کے مطابق بلوچستان میں سیلاب سے متاثرہ شہروں میں امدادی سرگرمیاں جاری ہیں، کوئٹہ، پشین، قلعہ سیف اللہ، زیارت، ژوب، لورالائی اور نوشکی میں امدادی سرگرمیاں جاری ہیں، پاک آرمی، ایف سی، پی ڈی ایم اے اور سول انتظامیہ کی ٹیمیں لوگوں کو محفوظ مقامات پر منتقل کر رہی ہیں، بلوچستان میں سیلاب متاثرین کو پکا پکایا کھانا اور دیگر سہولیات فراہم کی جا رہی ہیں۔
یہ بھی پڑھیں: سیلاب متاثرین کی امداد: وزیراعظم کا آرمی چیف اور چیئرمین ایم ڈی ایم اے کو فون
نصیر آباد، دکی اور لسبیلہ کے علاقوں میں ریلیف کیمپ قائم کیے گئے ہیں، متاثرہ علاقوں میں فوج اور ایف سی کے فری میڈیکل کیمپ بھی لگائے گئے ہیں، سیلاب متاثرین کو مفت علاج کی سہولیات اور مفت ادویات بھی فراہم کی جا رہی ہیں، مواصلات کے بنیادی ڈھانچے کو جلد از جلد بحال کرنے کی تمام کوششیں کی جا رہی ہیں، اضلاع کے اندر، بین الاضلاعی روابط کے ساتھ ژوب ڈی آئی خان سڑک بحال کر دی گئی، پنجاب کے جنوبی اضلاع میں پاک فوج کی امدادی کارروائیاں جاری ہیں۔
آئی ایس پی آر کی جانب سے مزید بتایا گیا ہے کہ وہاڑی، راجن پور اور ڈیرہ غازی خان میں فوجی دستے امدادی سرگرمیوں میں مصروف ہیں جبکہ تینوں اضلاع میں متاثرہ آبادی کو طبی امداد فراہم کی جا رہی ہے۔
