کراچی: قومی کرکٹ ٹیم کے کپتان بابر اعظم اور کراچی کنگز کے تعلقات میں دراڑ پیدا ہو گئی۔
سال 2016 میں پاکستان سپر لیگ (پی ایس ایل) کے پہلے سیزن میں بابر اعظم نے اسلام آباد یونائیٹڈ کی نمائندگی کی تھی اور دو میچوں میں صرف 15 رنز ہی بنا سکے تاہم اس کے بعد وہ کراچی کنگز سے وابستہ ہو گئے۔
بابر اعظم 2017 میں 291 رنز بنا کر اپنی ٹیم کے دوسرے نمایاں بیٹسمین ثابت ہوئے جس کے بعد تیسرے سیزن میں 402 اور چوتھے سیزن میں 335 رنز بنانے میں کامیاب ہوئے۔
گزشتہ برس بابر اعظم نے سب سے زیادہ رنز 473 بنا کر کراچی کنگز کی فتح میں اہم کردار ادا کیا تھا۔ بابر اعظم فائنل اور ٹورنامنٹ کے اہم کھلاڑی بھی قرار پائے تھے۔
رواں سال بھی بابر اعظم کی کارکردگی بہتر رہی اور انہوں 554 رنز بنائے لیکن اب ان کے اپنی ٹیم کے ساتھ تعلقات بہتر نہیں رہے۔
یہ بھی پڑھیں: آزادی کرکٹ کپ: جیو کو شکست، ہم نیوز چیمپئن
ذرائع کے مطابق رواں سال بابر اعظم کے بعض مالی معاملات پر اختلافات ہوئے اور بڑی اشتہاری مہم میں بابر اعظم نظر نہیں آئے جبکہ بابر اعظم کے ایک نجی مسئلے کو مخصوص چینل پر حد سے زیادہ اچھالا گیا تھا۔
بابر اعظم نے اب کراچی کنگز کو چھوڑنے کا ذہن بنالیا ہے البتہ وہ پاکستان کرکٹ ٹیم کے سب سے مقبول کھلاڑی ہیں اس وجہ سے فرنچائز کسی صورت ان کی خدمات سے محروم نہیں ہونا چاہتی اس لیے بابر اعظم کو منانے کی کوششیں جاری ہیں۔
ایکسپریس نیوز کے مطابق بابر اعظم کے کراچی کنگز سے معاملات بہتر نہیں ہوئے تو جنوری میں پی ایس ایل 7 کے دوران بابر اعظم کسی اور ٹیم کی جانب سے ایکشن میں نظر آئیں گے۔
دوسری جانب کراچی کنگز کے ترجمان فیصل مرزا نے کہا کہ بابر اعظم اور فرنچائز کے تعلقات میں کوئی کشیدگی نہیں ہے۔
