وزیراعلی پنجاب کی معاون خصوصی اطلاعات فردوس عاشق اعوان نے اپنے عہدے سے استعفی دے دیا ہے۔
ہم نیوز کے مطابق فردوس عاشق اعوان نے اپنا استعفی وزیراعلی پنجاب عثمان بزدار کو بھجوایا جسے منظور کرلیا گیا ہے۔
اس ضمن میں بات کرتے ہوئے انہوں نے کہا ہے کہ ذاتی وجوہات کی بنیاد پر پنجاب حکومت کے ساتھ اس عہدے پر کام نہیں کر سکتی۔
مزید پڑھیں: عمران خان بلاتے ہیں، بزدار چھوڑتے نہیں، فردوس
ذرائع کے مطابق فردوس عاشق اعوان کو وفاق میں اہم ذمہ داری دیئے جانے کا امکان ہے۔
اس سے پہلے پریس کانفرنس کے دوران ایک سوال کے جواب میں انہوں نے کہا تھا کہ وزیراعظم عمران خان انہیں وفاق میں ذمہ داری سونپنا چاہتے ہیں لیکن وزیراعلیٰ پنجاب عثمان بزدار کی خواہش ہے کہ میں پنجاب حکومت کیلئے خدمات انجام دیتی رہوں۔
یہ بھی پڑھیں: کہا گیاجہانگیر ترین کو چھوڑو یا عہدہ، میں مستعفی ہو گیا، عون چودھری
فردوس عاشق اعوان نے کہا کہ عثمان بزدار نے آج ملاقات میں مجھے وزیراعظم کی خواہش کے متعلق بتایا، میں قیادت کی جانب سے فیصلے کی منتظر ہوں جو بھی فیصلہ ہوگا میں اس پر عملدرآمد کرنے کیلئے تیار ہوں۔
خیال رہے کہ اس سے قبل وزیراعلیٰ پنجاب عثمان بزدار کے معاون خصوصی عون چودھری نے بھی اپنے عہدے سے استعفیٰ دیا تھا۔
انہوں نے کہا کہ انہیں بلا کر کہا گیا کہ جہانگیر ترین کوچھوڑو یا عہدہ۔ اس پر گروپ سے علیحدگی کے بجائے استعفے کو ترجیح دی۔
