اسلام آباد: وفاقی دارالحکومت میں عید تعطیلات تک تفریحی مقامات بند کر دیے گئے۔
اسلام آباد کے ڈپٹی کمشنر حمزہ شفقات نے سماجی رابطے کی ویب سائٹ ٹوئٹر پر آگاہ کیا ہے کہ آج سے عید الاضحیٰ کی تعطیلات تک اسلام آباد کے تفریحی مقامات بند رہیں گے۔
انہوں نے کہا کہ تفریحی مقامات کورونا کو کنٹرول کرنے کے لیے بند رہیں گے۔ مری ایکسپریس وے، مارگلہ، پارکس، پکنک مقامات اور ہل اسٹیشن بند رہیں گے۔
کرونا کو کنٹرول کرنے کے لئے آج سے عید تعطیلات تک مری ایکسپریس وے،مارگلہ،پارکس،تفریحی مقامات،ہوٹل وغیرہ،پکنک کے مقامات،ہل اسٹیشن بند رہیں گے۔سب سے گزارش ہے کہ پلیز فی الحال کوئی سیاحت/گھومنے پھرنے کا پلان نہ بنائیں۔اس دفعہ تھوڑی سی تکلیف برداشت کر لیں اور انسانی جانیں بچائیں
— Deputy Commissioner Islamabad (@dcislamabad) July 27, 2020
ڈپٹی کمشنر اسلام آباد نے عوام سے گزارش کی کہ وہ گھومنے پھرنے کا منصوبہ نہ بنائیں۔
گزشتہ روز وزیر اعلیٰ پنجاب عثمان بزدار نے عید الاضحیٰ کے موقع پر صوبے بھر میں اسمارٹ لاک ڈاؤن کی منظوری دے دی ہے۔
چیف سیکرٹری پنجاب جواد رفیق کی سربراہی میں ہونے والے اجلاس میں فیصلہ کیا گیا کہ اسمارٹ لاک ڈاؤن پیشگی اعلان کے بجائے اچانک کیا جائے گا جبکہ صوبے بھر میں مارکیٹیں اور پلازے عید سے ایک دو روز قبل بند کرنے کا فیصلہ کیا گیا۔
اسمارٹ لاک ڈاؤن کے دوران مویشی منڈیاں، یوٹیلیٹی اسٹورز، دودھ، دہی، تندور اور میڈیکل اسٹورز کھلے رہیں گے۔
سول سیکرٹریٹ ذرائع کے مطابق اسمارٹ لاک ڈاؤن کا نوٹیفکیشن کسی بھی وقت جاری ہو سکتا ہے۔
