دبئی: پاکستان سپر لیگ تھری کے 21ویں میچ میں اسلام آباد یونائیٹڈ نے پشاور زلمی کو 26 رنز سے شکست دے کر پہلی پوزیشن پر قبضہ جما لیا ہے۔
اسلام آباد یونائیٹڈ کی جانب سے دیے گئے 183 رنز کے بڑے ہدف کے تعاقب میں زلمی ٹیم 20 اوورز میں نو وکٹوں کے نقصان پر 156 رنز بنا سکی۔
زلمی اوپنرز اننگ کا آغاز کرنے میدان میں آئے تو پہلی وکٹ کی شراکت میں 32 رنز بنائے۔ ٹیم کو پہلا نقصان کامران اکمل کی صورت میں اٹھانا پڑا۔
اوپنر بلے باز ایک چھکے اور تین چوکوں کی مدد سے 22 رنز بنا کر سمیت پٹیل کی گیند کا شکار ہو گئے۔
دوسرے آؤٹ ہونے والے کھلاڑی آندے فلیچر بھی پٹیل کی نپی تلی بالنگ نہ سمجھ سکے اور53 رنز کے مجموعی اسکور پر پویلین لوٹ گئے۔
زلمی کی تیسری وکٹ بھی 53 کے مجموعی اسکور پر گری۔ ڈیوائن اسمتھ بھی آندرے رسل کے ہاتھوں آؤٹ ہوئے۔
نائب کپتان محمد حفیظ نے یونائیٹڈ بالرز کے سامنے مزاحمت کی کوشش کی اور ایک چھکے اور ایک چوکے کی مدد سے صرف 13 رنز بنا کر آؤٹ ہو گئے۔
حسن علی بھی 15 کے انفرادی اسکور پر سمیت پاٹیل کا چوتھا شکار بنے۔
دیگر کھلاڑی دوہرا ہندسہ عبور کیے بغیر پویلین لوٹ گئے۔ اسلام آباد کی جانب سے سمیت پاٹیل نے چار اوورز میں 34 رنز دے کر چار کھلاڑیوں کو میدان سے باہر کی راہ دکھائی۔
ظفر گوہر بھی تین کھلاڑیوں کو آؤٹ کرنے میں کامیاب رہے۔
اس سے پہلے میچ کے آغاز میں پشاور زلمی نے ٹاس جیت کر اسلام آباد یونائیٹڈ کو پہلے بیٹنگ کی دعوت دی۔
اننگ کا آغاز کرنے اسلام آباد کی ٹیم میدان میں آئی تو مقررہ 20 اوورز میں پانچ وکٹوں کے نقصان پر182 رنز بنائے۔
اسلام آباد کی جانب سے جین پال ڈومینی 73 رنز بنا کر ناقابل شکست رہے۔ ڈومینی نے 54 گیندوں کا سامنا کرتے ہوئے چار چھکے اور پانچ چوکے اپنے نام کیے۔
دیگر کھلاڑیوں میں آصف علی 45، حسین طلعت 29 اورلیوک رونکی 27 رنز بنانے میں کامیاب ہوئے۔
پشاور کی جانب سے وہاب ریاض نے تین کھلاڑیوں کو پویلین کی راہ دکھائی۔ فاسٹ بالر نے چار اوورز میں 30 رنز دیے۔
پشاور زلمی میں ڈیرن سیمی کی واپسی ہوئی ہے جب کہ یونائیٹڈ بلے باز فرحان صاحبزادہ کی جگہ ظفر گوہر کو ٹیم میں شامل کیا گیا ہے۔ زلمی کپتان ڈیرن سیمی انجری کے باعث گزشتہ دو میچوں میں شرکت نہیں کر سکے تھے۔
پشاور زلمی کو کپتان ڈیرن سیمی کی غیر موجودگی میں کھیلے گئے دونوں میچوں میں شکست کا سامنا کرنا پڑا تھا۔
پوائنٹس ٹیبل پر اسلام آباد یونائیٹڈ 8 پوائنٹس کے ساتھ تیسرے نمبر پر موجود ہے جبکہ پشاور زلمی 6 پوائنٹس کے ساتھ پانچویں پوزیشن پر ہے۔