ساف چیمپئن شپ 2026 کے گروپ بی کے اہم مقابلے میں پاکستان نے مالدیپ کو یکطرفہ مقابلے کے بعد 3-0 سے شکست دے کر ٹورنامنٹ میں پہلی کامیابی حاصل کرلی۔
ساف چیمپئن شپ جنوبی ایشیا کا سب سے بڑا فٹبال ٹورنامنٹ ہے، جسے جنوبی ایشیائی فٹبال فیڈریشن منعقد کرواتی ہے اور یہ ٹورنامنٹ ہر دو سال بعد کھیلا جاتا ہے۔
ڈھاکا کے نیشنل فٹبال اسٹیڈیم میں کھیلے گئے میچ میں قومی ٹیم نے پہلے ہاف میں تین گول کرکے اپنی برتری مستحکم کرلی۔ پاکستان نے میچ کے آغاز سے ہی جارحانہ انداز اپنایا اور چوتھے منٹ میں پنالٹی حاصل کرنے میں کامیاب رہا۔ میکائل آرون عبداللہ نے پنالٹی کک پر گیند جال میں پہنچا کر پاکستان کو ابتدائی برتری دلائی۔
سب سے زیادہ پڑھی جانے والی
اس کے بعد نوجوان فارورڈ نجیب اللہ بیٹنی نے شاندار کھیل کا مظاہرہ کرتے ہوئے دو گول اسکور کیے۔ انہوں نے پہلے نویں منٹ میں جنید شاہ کے عمدہ کراس پر گول کرکے پاکستان کی برتری دگنی کی، جبکہ 24ویں منٹ میں ایک خوبصورت انفرادی کوشش کے ذریعے اپنا دوسرا اور ٹیم کا تیسرا گول اسکور کیا۔
پہلے ہاف کے اختتام پر پاکستان کو 3-0 کی واضح برتری حاصل تھی۔ دوسرے ہاف میں مالدیپ نے کھیل میں واپسی کی کوشش کی اور گیند پر قبضہ بھی بہتر بنایا، تاہم پاکستانی دفاع نے حریف ٹیم کو گول کرنے کا کوئی موقع نہیں دیا۔ یوں میچ کے اختتام پر پاکستان نے تین گول سے کامیابی اپنے نام کرلی۔
PAKISTAN BOUNCE BACK IN STYLE! 🇵🇰⚽
– After a narrow defeat in their opening match, Pakistan beat Maldives 3-0 to register their first win in the ongoing SAFF Championship 2026. https://t.co/0sgKneYe9w
— PTV Sports (@PTVSp0rts) November 8, 2026
اس کامیابی کے ساتھ پاکستان نے ٹورنامنٹ کے افتتاحی میچ میں روایتی حریف بھارت کے ہاتھوں 2-3 سے ہونے والی شکست کا ازالہ بھی کرلیا۔ بھارت کے خلاف میچ میں قومی ٹیم نے آخری لمحات میں دو گول کیے تھے، تاہم اسے کامیابی نہ مل سکی تھی۔
پاکستان نے 15 مرتبہ گول کرنے کی کوشش کی
میچ کے اعداد و شمار کے مطابق پاکستان نے مجموعی طور پر 15 مرتبہ گول کرنے کی کوشش کی، جن میں سے پانچ شاٹس ہدف پر تھے، جبکہ مالدیپ کی ٹیم سات کوششوں میں صرف ایک مرتبہ پاکستانی گول پوسٹ کو نشانہ بنا سکی۔
نجیب اللہ بیٹنی کی دو گول کی کارکردگی نے انہیں میچ کا نمایاں کھلاڑی بنا دیا، جبکہ قومی ٹیم کی فتح نے گروپ بی میں سیمی فائنل تک رسائی کی امیدیں بھی مضبوط کردی ہیں۔
واضح رہے کہ 2026 کی ساف چیمپئن شپ بنگلا دیش میں جاری ہے، جس میں پاکستان، بھارت اور مالدیپ گروپ بی میں شامل ہیں۔ پاکستان کو اب اگلے مرحلے میں رسائی کے لیے گروپ کی باقی صورتحال پر بھی نظر رکھنا ہوگی۔
