کیلیفورنیا: امریکی ریاست کیلیفورنیا میں عیدالفطر اور عیدالاضحیٰ کو ریاستی قانون کے تحت باضابطہ طور پر تسلیم کرلیا گیا ہے، جس کے بعد دونوں اسلامی تہواروں کو ریاستی سطح پر قانونی شناخت حاصل ہوگئی ہے۔
امریکی میڈیا کے مطابق نئے قانون کے تحت مسلمان ملازمین موجودہ بامعاوضہ رخصت استعمال کرکے عیدالفطر اور عیدالاضحیٰ کے مذہبی تہوار مناسکیں گے۔
امریکی میڈیا FOX40 کے مطابق عیدالفطراورعیدالاضحیٰ کو سرکاری تعطیلات کے طور پر تسلیم کرنے سے متعلق بل AB 2017 پر گورنرگیون نیوزوم نے دستخط کردیئے ہیں، یہ قانون 10 ستمبر سے ریاستی قانون کا حصہ بن گیا ہے۔
سب سے زیادہ پڑھی جانے والی
رپورٹ کے مطابق بل کا مقصد کیلیفورنیا میں مسلمانوں کے اہم مذہبی تہواروں کو ریاستی سطح پر باضابطہ شناخت دینا اور ان تہواروں کے موقع پر مذہبی فرائض کی ادائیگی کے لیے مناسب سہولت فراہم کرنا ہے۔
بل کیلیفورنیا کے رکن اسمبلی میٹ ہینی نے متعدد مسلم کمیونٹیز اور مسلم تنظیموں کے اشتراک سے رواں سال مارچ میں پیش کیا تھا۔
قانون کی منظوری کے بعد عیدالفطراورعیدالاضحیٰ کو کیلیفورنیا کے ریاستی قانون میں باضابطہ طور پر شامل کرلیا گیا ہے۔
مسلم کمیونٹی کی مذہبی روایات کے احترام پر زور
رکن اسمبلی میٹ ہینی نے بل کی منظوری کے حوالے سے کہا کہ کیلیفورنیا امریکا کی سب سے بڑی اور متحرک مسلم کمیونٹیز میں سے ایک کا گھر ہے، اس لیے مسلم شہریوں کی مذہبی روایات کو تسلیم اور ان کا احترام کیا جانا چاہیے۔
میٹ ہینی کے مطابق عید کو ریاستی قانون میں تسلیم کرنا اس بات کو یقینی بنانے کی جانب ایک اہم قدم ہے کہ کیلیفورنیا کے مسلمان اپنے اہل خانہ کے ساتھ مذہبی تہوار مناسکیں اور انہیں عید منانے کے لیے ملازمت یا دیگر ذمہ داریوں کے حوالے سے غیر ضروری مشکلات کا سامنا نہ کرنا پڑے۔
انہوں نے کہا کہ ریاست میں مختلف مذاہب اور ثقافتوں سے تعلق رکھنے والے افراد آباد ہیں اور ان کی مذہبی روایات کو تسلیم کیا جانا معاشرے میں احترام اور شمولیت کے فروغ کے لیے اہم ہے۔
اسکولوں اور سرکاری اداروں کیلئے بھی سہولت
رپورٹ کے مطابق AB 2017 کی منظوری سے صرف عیدالفطر اور عیدالاضحیٰ کو ریاستی سطح پر باضابطہ شناخت ہی نہیں ملی بلکہ اسکولوں اور سرکاری اداروں کو بھی ان تہواروں کے موقع پر مسلمان شہریوں کی ضروریات کو مدنظر رکھنے کے لیے عملی سہولت فراہم کی گئی ہے۔
قانون کے تحت مسلمان ملازمین اپنی موجودہ بامعاوضہ رخصت کو استعمال کرکے عید کے مذہبی اجتماعات اور دیگر مذہبی سرگرمیوں میں شرکت کرسکیں گے۔
اس طرح عید کے موقع پر مذہبی فرائض کی ادائیگی اور ملازمت کے تقاضوں کے درمیان توازن پیدا کرنے میں مدد مل سکے گی۔
اس اقدام کا تعلق ریاست میں موجود مسلم کمیونٹی کے مذہبی تہواروں کی باضابطہ شناخت سے ہے۔
عیدالفطر رمضان المبارک کے اختتام پر منائی جاتی ہے جبکہ عیدالاضحیٰ اسلامی کیلنڈر کے مطابق ذوالحجہ میں منائی جاتی ہے اور دونوں تہوار دنیا بھر کے مسلمانوں کے لیے مذہبی اہمیت رکھتے ہیں۔
ریاستی اداروں کو مسلمان شہریوں کی معاونت کا اختیار
کیلیفورنیا کمیشن کے چیئرمین جیسن پگیو نے بل کی منظوری پر کہا کہ AB 2017 ریاستی اداروں کے اس مشترکہ عزم کی عکاسی کرتا ہے کہ وہ ان کمیونٹیز کو تسلیم اور ان کا احترام کریں جن کی وہ خدمت کرتے ہیں۔
جیسن پگیو کے مطابق عیدالفطر اور عیدالاضحیٰ کو باضابطہ طور پر تسلیم کرکے کیلیفورنیا نے ان مذہبی تہواروں کی ثقافتی اہمیت کو تسلیم کیا ہے۔
ان کا کہنا تھا کہ قانون کے ذریعے اسکولوں اور سرکاری اداروں کو عید منانے والے افراد کی معاونت کے لیے عملی سہولتیں فراہم کی گئی ہیں۔
انہوں نے کہا کہ ریاستی اداروں میں مختلف پس منظر رکھنے والے افراد خدمات انجام دیتے ہیں اور مذہبی تہواروں کو تسلیم کرنے سے انہیں اپنی مذہبی روایات پر عمل کرنے کے لیے مناسب مواقع فراہم کیے جاسکتے ہیں۔
قانون کا مقصد مذہبی تہواروں کیلئے رکاوٹیں کم کرنا ہے
امریکی میڈیا کی رپورٹ کے مطابق نئے قانون کے ذریعے کیلیفورنیا میں عیدالفطر اور عیدالاضحیٰ کو ریاستی قانون میں باضابطہ طور پر درج کیا گیا ہے۔
اس کا ایک اہم پہلو یہ ہے کہ مسلمان ملازمین اپنے موجودہ رخصتی نظام کے تحت عید کے موقع پر چھٹی لے کر مذہبی تقریبات میں شریک ہوسکتے ہیں۔
قانون کی منظوری سے ریاستی اداروں اور تعلیمی مراکز کے لیے بھی یہ واضح کیا گیا ہے کہ عید منانے والے افراد کی مذہبی ضروریات کو مدنظر رکھتے ہوئے مناسب انتظامات کیے جاسکتے ہیں۔
یوں کیلیفورنیا میں عیدالفطر اور عیدالاضحیٰ کو ریاستی سطح پر قانونی شناخت ملنے کے بعد مسلمان شہریوں کے لیے ان دونوں مذہبی تہواروں کے حوالے سے ریاستی سطح پر ایک باضابطہ اعتراف سامنے آیا ہے۔
