پنجاب حکومت نے مختلف شہروں کے لیے رینجرز کی خدمات طلب کر لیں

پاکستان تحریک انصاف (پی ٹی آئی) کے 27 مارچ کو ہونے والے لانگ مارچ سے قبل پنجاب حکومت نے وفاقی حکومت سے صوبے کے مختلف شہروں میں رینجرز تعینات کرنے کی درخواست کر دی۔

پی ٹی آئی نے سابق وزیر اعظم عمران خان کے علاج و رہائی اور دیگر مطالبات کے حق میں 27 ستمبر کو پورے ملک سے اسلام آباد کی جانب لانگ مارچ کرنے کا اعلان کر رکھا ہے۔

دوسری جانب وفاقی اور پنجاب حکومت نے مجوزہ احتجاج کو ملکی امن و امان کے لیے خطرہ اور ‘انتشار پھیلانے کو کوشش’ قرار دیتے ہوئے پارٹی رہنماؤں کے خلاف کارروائیوں کا آغاز کر رکھا ہے۔

بانی پی ٹی آئی کی تینوں بہنیں علیمہ خان، نورین نیازی، اور عظمیٰ خان نظر بند ہیں جبکہ پارٹی کے مطابق ان کے دیگر رہنماؤں کے گھروں پر چھاپے مارے جا رہے ہیں اور انہیں غیر قانونی طور پر ہراساں کیا جا رہا ہے۔

احتجاج کے خلاف اسلام آباد ہائی کورٹ میں درخواست بھی دائرکی گئی تھی جس پر عدالت نے فیصلہ سنایا تھا کہ کسی سیاسی جماعت یا رہنما کو عوامی سڑکوں، شاہراہوں یا دیگر مقامات پر قبضے یا شہریوں کی آزادانہ نقل و حرکت میں رکاوٹ ڈالنے کا قانونی اختیار نہیں۔

اس فیصلے کے بعد حکومتی نمائندوں نے واضح الفاظ میں کہا تھا کہ ‘کسی کو اسلام آباد پر چڑھائی نہیں کرنے دیں گے۔’

رینجرز کے دستوں کی تعیناتی کیلئے حکومت پنجاب نے وفاقی وزارت داخلہ کو مراسلہ لکھا جس میں راولپنڈی، اٹک، جہلم اور میانوالی میں تعیناتی کیلئے رینجرز کے دستے فراہم کرنے کی درخواست کی گئی۔

مراسلے کے مطابق راولپنڈی، اٹک، جہلم اور میانوالی میں رینجرز کے دستے 5 اکتوبر 2026 تک تعینات ہوں گے۔

ترجمان محکمہ داخلہ کے مطابق راولپنڈی میں رینجرز کی 3 کمپنیاں، اٹک میں 5 ونگز، جبکہ جہلم اور میانوالی میں ایک ایک کمپنی تعینات ہوگی۔

ترجمان نے واضح کیا کہ رینجرز کی تعیناتی کیلئے کابینہ کمیٹی برائے امن و امان کے 59ویں اجلاس میں منظوری دی گئی جبکہ وفاقی وزارت داخلہ کو مراسلہ پنجاب پولیس کی درخواست پر سکیورٹی میں معاونت کیلئے لکھا گیا۔

ترجمان کا مزید کہنا تھا کہ عوام کے جان و مال کا تحفظ حکومت پنجاب کی اولین ترجیح ہے۔

اس سے قبل اگست 22 کو وفاقی حکومت نے راولپنڈی میں 6 ماہ کے لیے پاک فوج کی 3 کمپنیاں تعینات کرنے کی منظوری دی تھی۔