لاہور، پاکستانی امپائر راشد ریاض وقار کے لئے ایک اور بڑا اعزاز سامنے آ گیا ہے۔
انٹرنیشنل کرکٹ کونسل (آئی سی سی) نے انہیں اپنے انٹرنیشنل پینل سے ترقی دے کرایمرجنگ پینل میں شامل کر لیا ہے، جس کے بعد وہ پہلی مرتبہ ٹیسٹ کرکٹ میں امپائرنگ کے فرائض انجام دیں گے۔
50 سالہ راشد ریاض وقار اتوار سے اپنے ٹیسٹ امپائرنگ کیریئر کا باقاعدہ آغاز کریں گے وہ ہرارے میں بنگلہ دیش اور زمبابوے کے درمیان کھیلے جانے والے واحد ٹیسٹ میچ میں آن فیلڈ امپائر کی حیثیت سے ذمہ داریاں نبھائیں گے۔
اس تقرری کے ساتھ ہی وہ پاکستان کی جانب سے مینز ٹیسٹ کرکٹ میں امپائرنگ کرنے والے 34ویں امپائر بن جائیں گے، جو ان کے پیشہ ورانہ سفر کا ایک اہم سنگ میل ہے۔
ورلڈ کپ دیکھنا صحت کے لیے بھی فائدہ مند؟ تحقیق میں دلچسپ انکشاف
راشد ریاض وقار ماضی میں فرسٹ کلاس کرکٹر بھی رہ چکے ہیں انہوں نے اپنے 12 سالہ فرسٹ کلاس کیریئر کے دوران 50 میچز کھیلے جبکہ امپائر کی حیثیت سے اب تک 118 مینز اور ویمنزانٹرنیشنل وائٹ بال میچزمیں خدمات انجام دے چکے ہیں۔
انہوں نے اکتوبر 2018 میں دبئی میں پاکستان اور آسٹریلیا کے درمیان ٹی ٹوئنٹی انٹرنیشنل میچ کے ذریعے بین الاقوامی امپائرنگ کا آغازکیا تھا۔
آئی سی سی کی جانب سے ایمرجنگ پینل میں شمولیت اور ٹیسٹ کرکٹ میں پہلی تقرری کو ان کی محنت، تجربے اور صلاحیتوں کا عالمی سطح پر اعتراف قرار دیا جا رہا ہے، جس سے پاکستان کے امپائرنگ شعبے کو بھی نئی شناخت ملے گی۔
