سابق امریکی صدر ڈونلڈ ٹرمپ نے دعویٰ کیا ہے کہ بھارتی وزیر اعظم نریندر مودی نے انہیں یقین دلایا ہے کہ بھارت اب روس سے تیل خریدنا بند کر دے گا۔
انہوں نے وائٹ ہاؤس میں صحافیوں سے گفتگو کے دوران کہا کہ ‘مجھے خوشی نہیں تھی کہ بھارت روس سے تیل خرید رہا ہے، لیکن آج مودی نے مجھے یقین دلایا ہے کہ وہ ایسا نہیں کریں گے۔ یہ ایک بڑا قدم ہے۔ اب ہمارا اگلا ہدف چین ہے۔’
یہ بیان ایک ایسے وقت میں آیا ہے جب امریکہ روس کی توانائی آمدنی کو محدود کرنے کی کوششیں تیز کر رہا ہے تاکہ اسے یوکرین پر حملے سے باز رکھا جا سکے۔
یاد رہے کہ ٹرمپ نے روس سے تیل خریدنے کیوجہ سے بھارت پر 50 فیصد ٹیرف عائد کیا تھا۔
روس اس وقت بھارت کو سب سے زیادہ تیل فراہم کرتا ہے۔ ستمبر میں بھارت نے روزانہ 1.62 ملین بیرل روسی تیل خریدا، جو اس کی مجموعی درآمدات کا تقریباً ایک تہائی بنتا ہے۔
BREAKING
Donald Trump says that Narendra Modi has assured him on call that India will not buy Russian Oil anymore. 😳
Narendra Modi has completely surrendered in front of Trump just for Adani.
— Roshan Rai (@RoshanKrRaii) October 16, 2025
تاہم ابھی تک واشنگٹن میں بھارتی سفارت خانے نے اس دعوے پر کوئی ردعمل نہیں دیا ہے کہ مودی نے واقعی ٹرمپ سے ایسا کوئی وعدہ کیا ہے۔
ٹرمپ نے چین پر اسی قسم کا دباؤ ڈالنے کا عندیہ بھی دیا ہے، تاہم تجارتی کشیدگی کے باعث انہوں نے اب تک بیجنگ پر براہ راست دباؤ نہیں ڈالا۔
اس ہفتے کے اوائل میں ٹرمپ کے قریبی ساتھی سرجیو گور، جنہیں حال ہی میں بھارت میں امریکی سفیر نامزد کیا گیا ہے، نے مودی سے ملاقات کی جس میں دفاع، تجارت اور ٹیکنالوجی کے امور پر بات چیت ہوئی۔
اگر بھارت واقعی روسی تیل کی خریداری بند کرتا ہے تو یہ ماسکو کے لیے ایک بڑا دھچکہ ہوگا اور دیگر ممالک پر بھی دباؤ بڑھے گا کہ وہ روسی توانائی پر انحصار کم کریں۔
