اسلام آباد: سپریم کورٹ میں سابق وزیراعظم شاہد خاقان عباسی کے کاغذات نامزدگی چیلنج کر دیے گئے ہیں۔
چیف جسٹس پاکستان جسٹس ثاقب نثار نے شاہد خاقان عباسی کے کاغذات نامزدگی کے خلاف اپیل پر بینچ تشکیل دے دیا ہے جو جمعہ کو سماعت کرے گا، کاغذات نامزدگی مسعود احمد عباسی کی جانب سے چیلنج کیے گئے ہیں۔
درخواست گزار نے مؤقف اختیار کیا ہے کہ شاہد خاقان عباسی نے اپنے بیان حلفی اور کاغذات نامزدگی میں غلط بیانی کی ہے اس لیے ہائیکورٹ کے فیصلے کو کالعدم قرار دے کر کاغذات مسترد کیے جائیں۔
سابق وزیراعظم شاہد خاقان عباسی قومی اسمبلی کے حلقہ این اے 57 راولپنڈی ون سے مسلم لیگ نون کے ٹکٹ پر امیدوار ہیں۔
الیکشن کمیشن کی جانب سے اپیلٹ ٹربیونل نے شاہد خاقان عباسی کو تاحیات نااہل قرار دیا تھا جس کے خلاف سابق وزیراعظم نے لاہور ہائیکورٹ سے رجوع کیا اور لاہور ہائیکورٹ نے ٹربیونل کے فیصلے کو کالعدم قرار دیتے ہوئے انہیں انتخاب لڑنے کی اجازت دی تھی۔
