اسلام آباد: وزیر اعظم شہباز شریف نے کہا ہے کہ بھارت پانی کو بطور ہتھیار استعمال کرنے کی کوشش کر رہا ہے۔
وزیر اعظم شہباز شریف نے تقریب سے خطاب کرتے ہوئے کہا کہ نیشنل ڈیزاسٹر مینجمنٹ اتھارٹی (این ڈی ایم اے) کثیر المقاصد اہم قومی ادارہ ہے۔ اور 2022 کے سیلاب کے بعد ادارے کو جدید خطوط پر استوار کیا گیا۔ خطرات سے آگاہی کے نظام کے حوالے سے بھی این ڈی ایم اے کا اہم کردار ہے۔
انہوں نے کہا کہ بروقت معلومات کی فراہمی کے لیے این ڈی ایم اے کے اقدامات قابل تعریف ہیں۔ تاہم بدقسمتی سے پاکستان کا شمار موسمیاتی تبدیلیوں سے متاثرہ ملکوں میں ہوتا ہے۔ اور ہمارا گرین ہاؤس گیسز کے اخراج میں حصہ بہت کم ہے۔
شہباز شریف نے کہا کہ موسمیاتی تبدیلیوں کو مدنظر رکھتے ہوئے انفرا اسٹرکچر کی تعمیر ضروری ہے۔ اور انفرا اسٹرکچر کی تعمیر کے لیے پبلک پرائیویٹ پارٹنر شپ کا فروغ بہت اہم ہے۔ موسمیاتی تبدیلیوں کے تناظر میں این ڈی ایم اے پر بھاری ذمہ داری عائد ہوتی ہے۔
انہوں نے کہا کہ سماجی اور معاشی ترقی کے اہداف کے حصول کے لیے کوششوں کو تیز کرنا ہے۔ جبکہ قدرتی آفات سے نمٹنے کے قومی ادارے کی استعداد کار میں اضافہ کریں گے۔
یہ بھی پڑھیں: اختیارات کا غلط استعمال کہیں نہیں ہونے دیں گے ،چیئرمین ایف بی آر
وزیر اعظم نے کہا کہ ہمیں مستقبل کے چیلنجز کو مدنظر رکھتے ہوئے خود کو تیار رکھنا ہے۔ اور موسمیاتی تغیرات کے تناظر میں این ڈی ایم اے کی صوبوں کے ساتھ ہم آہنگی ضروری ہے۔
سوات سانحہ سے متعلق گفتگو کرتے ہوئے انہوں نے کہا کہ سوات کے افسوسناک واقعے میں قیمتی جانیں ضائع ہوئیں۔ سیاست سے بالاتر ہو کر صورتحال کا ایمانداری سے جائزہ لینا چاہیے۔ اور اگر اس واقعے کی کوئی رپورٹ نہیں بنائی تو رپورٹ بنائی جائے۔ سوات واقعے پر پوری قوم اشکبار تھی۔
انہوں نے کہا کہ پی ڈی ایم اے کو صوبوں کے ساتھ مل کر ایک مربوط پروگرام بنانا چاہیئے۔
بھارتی رویئے پر شہباز شریف نے کہا کہ بھارت پانی کو بطور ہتھیار استعمال کرنے کی کوشش کر رہا ہے۔ اور عالمی ثالثی عدالت نے واضح کر دیا کہ بھارت یکطرفہ طور پر معاہدہ معطل یا ختم نہیں کرسکتا۔ ہمیں دشمن کے ناپاک عزائم کو ناکام بنانا ہے۔
انہوں نے کہا کہ آبی ذخائر کی تعمیر کو ترجیحی بنیادوں پر مکمل کریں گے۔ اور اپنے وسائل سے دیامر بھاشا ڈیم اوردیگر منصوبے مکمل کرنے کے لیے پرعزم ہیں۔
