چین کی پاکستانی قانون نافذ کرنے والے اداروں کی ٹریننگ کرانے کی یقین دہانی


وفاقی وزیر داخلہ محسن نقوی نے چینی ہم منصب کیو آئی یانجن سے ملاقات کی ہے جس میں چین کی طرف سے پاکستانی قانون نافذ کرنے والے اداروں کی ٹریننگ کرانے کی یقین دہانی کرائی گئی ہے۔

نیو یارک میں اقوام متحدہ کے پیپلز ری پبلک آف چائنا کے مشن کے آفس میں دونوں رہنماؤں کے درمیان ملاقات ہوئی۔ ملاقات میں پاک چین تعلقات، سکیورٹی امور، قانون نافذ کرنے والے اداروں کے لیے چین کے تعاون پر تفصیلی تبادلہ خیال کیا گیا۔

دونوں رہنماؤں نے ٹریننگ، جدید آلات اور ٹیکنالوجی کے استعمال کے بارے میں بھی گفتگو کی۔ کیوائی یانجن نے اسلام آباد میں غیر ملکیوں خصوصا چینی شہریوں کی حفاظت کے لئے ایس پی یو کے قیام کے اقدام کو سراہا۔

کوشش ہے کسی چینی شہری پر ذرہ بھر آنچ نہ آئے، وزیر داخلہ محسن نقوی

چینی وزیر داخلہ کی جانب سے پاکستانی قانون نافذ کرنے والے اداروں کی ٹریننگ و استعدادکار بڑھانے کے لئے بھرپور تعاون کی یقین دہانی کرائی گئی۔ کیوآئی یانجن نے داسو واقعے پر ہونے والی پیش رفت پر بھی اطمینان کا اظہار کیا۔

انہوں نے وزیر داخلہ محسن نقوی کو ستمبر میں چین میں ہونے والے گلوبل سکیورٹی فورم میں شرکت کی دعوت دی۔ محسن نقوی نے گلوبل سیکیورٹی فورم میں شرکت کی دعوت قبول کرتے ہوئے کیو آئی یانجن کا شکریہ ادا کیا۔

اس موقع پر چینی وزیر داخلہ کیو آئی یانجن کا کہنا تھا کہ پاکستان چین ہر موسم کے دوست اور دوستی فولاد سے زیادہ مضبوط ہے۔


ٹیگز :
متعلقہ خبریں