راولپنڈی ڈویژن میں چینی کی ذخیرہ اندوزی کیخلاف بڑے پیمانے پر کاروائی شروع کر دی گئی۔
تفصیلات کے مطابق راولپنڈی انتظامیہ کی جانب سے شوگر اور چاول کی ذخیرہ اندوزی کرنے والوں کیخلاف کاروائی عمل میں لائی جا رہی ہے۔
اس سلسلے میں انتظامیہ نے کئی گوداموں میں ریڈ کرکے غیرقانونی طور پر چینی اور چاول زخیرہ کرنے والوں کو گرفتار کرکے گوداموں کو سیل کر دیا اور بھاری جرمانے عائد کرنے کیساتھ ساتھ چینی اور چاول کی بڑی تعداد قبضے میں لے لی۔
اے سی سٹی کی جانب سے راولپنڈی کے دو گوداموں پر ریڈ کرکے اُنہیں سیل کردیا گیا اور ہزاروں من ذخیرہ کی گئی چینی برآمد کر لی گئی۔
اس کے علاوہ چکوال اور تلہ گنگ میں بھی ضلع انتظامیہ کی جانب سے آپریشن کا آغازکیا گیا اور بڑی تعداد میں ذخیرہ کی گئی چینی برآمد کی گئی۔
ذرائع کے مطابق عبدالوحید نامی شخص کے گودام حق ٹریڈرز تلہ گنگ روڈ چکوال پر ریڈ کیا گیا اور 174,550 کلو چینی برآمد کی گئی۔
جبکہ رحمال علی کے گودام بنجرا تلہ گنگ میں ضلعی انتظامیہ نے ریڈ کرکے 50,000 کلو ذخیرہ کی گئی چینی برآمد کی۔
اسی طرح صادق آباد لاوہ تلہ گنگ گودام سے 25,000 کلو اور عرفان گودام پجنند تلہ گنگ سے 15,000 کلو زخیرہ شدہ چینی برآمد کی گئی۔
شوگر مافیا کیخلاف راولپنڈی ڈویژن کی انتظامیہ کی کاروائی سے اہلِ علاقہ بہت خوش ہیں۔
