ملک میں مہنگائی کی شرح میں اضافے کا رجحان برقرار ہے۔ گزشتہ ہفتے مہنگائی کی شرح میں مزید 0.33 فیصد اضافہ ہوا جبکہ سالانہ بنیاد پر مہنگائی کی شرح 29 فیصد ریکارڈ کی گئی ۔
ادارہ شماریات کے مطابق گزشتہ ہفتے 21 اشیائے ضروریہ مہنگی جبکہ 11 کی قیمتوں میں کمی ہوئی ۔ گزشتہ ہفتے چینی 6 روپے 89 پیسے فی کلو گرام مہنگی ہوئی ، اوسط قیمت 135 سے 139 رہی تاہم اسلام آباد، راولپنڈی اور پشاور سمیت مختلف شہروں میں 150 روپے تک بھی فروخت ہوتی رہی۔
سالانہ بنیادوں پر مہنگائی کی شرح 34.05 فیصد تک پہنچ گئی
اس کے علاوہ ملک میں 20 کلو آٹے کا تھیلا 116 روپے 28 پیسے مہنگا ہوا، دکانداروں نے اپنی من مانیاں جاری رکھیں اور2650 سے 3200 روپے کے درمیان تھیلا فروخت کرتے رہے، فی درجن انڈے 3 روپے 29 پیسے مہنگا ہونے کے بعد نرخ 230 سے 280 تک ریکارڈ کیے گئے۔
ٹماٹر 5 روپے سستے ہوکر 73 روپے ، پیاز کی قیمت 3 روپے کم ہو کر ساڑھے 64 سے ساڑھے 61 پر آ گئی، زندہ برائلر مرغی ایک روپے کی معمولی کمی کیساتھ 446 روپے میں فروخت ہوتی رہی۔ ادارہ شماریات کی رپورٹ کے مطابق ایل پی جی کی قیمت میں فی کلو گرام 37 روپے کمی کے بعد گھریلو سلنڈر کی اوسط قیمت 2484 ہو گئی۔
