اسلام آباد: چیئرمین سینیٹ صادق سنجرانی نے کہا ہے کہ پاکستان اور سعودی عرب دوستی کے لازوال رشتے میں بندھے ہوئے ہیں۔ انہوں نے کہا کہ دونوں ممالک کے مابین معاشی تعلقات میں موجودہ بہتری کا سہرا شہزادہ محمد بن سلمان کو جاتا ہے۔
ہم نیوز کے مطابق انہوں نے چیئرمین سعودی شوریٰ کونسل اور ان کے وفد کے اعزاز میں دیے گئے عشائیہ سے خطاب کرتے ہوئے کہا کہ سعودی عرب کی طرف سے بھاری سرمایہ کاری کے نتیجے میں بین الاقوامی برادری کا پاکستان پر اعتما د بڑھا ہے۔
چیئرمین سینیٹ صادق سنجرانی نے دوران خطاب اعتراف کیا کہ امت مسلمہ کو اس وقت مشکلات کا سامنا ہے۔ انہوں نے امید ظاہر کی کہ دونوں ممالک کے مابین تعلقات کی مضبوطی سے حالات بہتری کی جانب گامزن ہوں گے۔
ہم نیوز کے مطابق اس موقع پر سعودی شوریٰ کونسل کو سی پیک کے حوالے سے تفصیلی بریفنگ بھی دی گئی۔
Saudi Arabia is keen to benefit from Economic Prospects offered by Gwader: Members of the Saudi Shura Council. Pakistan now offers conducive environment for multi-sector investment and Saudi investors can benefit from the investment opportunities: observes Chairman Senate. pic.twitter.com/XPaXP2PZTv
— Senate of Pakistan (@SenatePakistan) April 25, 2019
سعودی عرب کے اعلیٰ سطحی وفد نے کہا کہ سعودی سرمایہ کار گوادر میں کثیر الجہتی شعبوں میں سرمایہ کاری کی خواہش رکھتے ہیں۔
ہم نیوز کے مطابق اعلیٰ سطحی وفد نے اس بات کا برملا اظہار کیا کہ سعودی سرمایہ کاروں کو گوادرکے مستقبل کے تجارتی و اقتصادی مرکز کی حیثیت اختیار کرنے کا ادراک ہے۔
چیئرمین سعودی شوریٰ کونسل نے اس موقع پر اپنے خطاب میں کہا کہ پاکستان سعودی عرب کے لیے انتہائی اہم ملک ہے۔ ان کا کہنا تھا کہ ہم پاکستان کے ساتھ اپنے دوطرفہ تعلقات کو انتہائی اہمیت دیتے ہیں۔
ہم نیوز کے مطابق چیئرمین سعودی شوریٰ کونسل نے کہا کہ دونوں ممالک کے عوام کا آپس میں ایک دوسرے سے باہمی محبت کا رشتہ ہے۔
چیئرمین سعودی شوریٰ کونسل نے اس امرکا بھی اظہار کیا کہ جو مسلمان نہیں ہیں ان کے بھی سعودی عرب کے حوالے سے جذبات انتہائی قابل قدر ہیں۔
انہوں نے کہا کہ دونوں ممالک کے تعلقات کو استحکام دینے میں خادم الحرمین الشریفین شاہ سلمان اور شہزادہ محمد بن سلمان کا کلیدی کردار ہے۔ انہوں نے کہا کہ دونوں ممالک کے مابین تعلقات فقید المثال ہیں۔
چیئرمین سعودی شوریٰ کونسل نے تجویز پیش کی کہ پاکستان سینیٹ اور سعودی شوریٰ کونسل کے مابین ادارہ جاتی تعاون پر مثبت پیش رفت ہونی چاہیے۔
چیئرمین سینیٹ صادق سنجرانی کی جانب سے اپنے اور وفد کے اعزاز میں دیے گئے عشائیہ سے خطاب کرتے ہوئے چیئرمین سعودی شوریٰ کونسل نے کہا کہ اسلامی دنیا میں پاکستان ایک الگ شناخت کا ملک ہے۔
